រាល់ការពពោះទាំងអស់មិនមែនជាការងាយស្រួល ឬអាចពពោះបានយ៉ាងរលូននោះទេ។ ទម្រាំបានសម្រាលម្ដងៗ ម៉ាក់ៗពពោះត្រូវជួបប្រទះបញ្ហាច្រើនយ៉ាង ហើយបើមិនប្រយ័ត្នអាចមានផ្ទៃពោះមិនប្រក្រតីដូចជា កូននៅក្រៅស្បូន ឬអាចមានហានិភ័យប្រឈមដល់ជីវិតទៀតផង។
ស្រីៗទាំងនេះ មានហានិភ័យខ្ពស់ប្រឈមមានកូនក្រៅស្បូន
លោកវេជ្ជបណ្ឌិត ចាន់ រស្មី ជំនាញផ្នែកសម្ភព និងរោគស្ត្រី បានឲ្យដឹងថា ករណីកូនក្រៅស្បូន កើតឡើងនៅពេលស៊ុតបង្កកំណើតតភ្ជាប់ខ្លួនវានៅកន្លែងមួយក្រៅពីស្បូន។ ការមានផ្ទៃពោះស្ទើរតែទាំងអស់កើតមាននៅក្នុងបំពង់ដៃស្បូនរួចត្រូវបន្តដំណើរទៅកាន់ស្បូនដើម្បីកាច់សំបុក បើមិនទៅហើយកាច់សំបុកនៅក្នុងស្បូន វាទៅកាច់សំបុកនៅក្រៅពីស្បូននោះនឹងកើតជំងឺហៅថាកូនក្រៅស្បូននេះ។ ទាក់ទងនឹងបញ្ហានេះ ស្ត្រីដែលមានហានិភ័យនៃការមានផ្ទៃពោះក្រៅស្បូនដូចជា៖
– អាយុពី ៣៥-៤៤ឆ្នាំ
– ធ្លាប់មានផ្ទៃពោះក្រៅស្បូនកាលកូនមុន
- ការវះកាត់ឆ្អឹងត្រគាក ឬពោះកាលកូនមុន
– ជំងឺរលាកអាងត្រគាក (PID)
– ធ្លាប់មានការរំលូតកូនជាច្រើនលើកមក
– ធ្លាប់ចងបំពង់មេជីវិត ឬដាក់កងក្នុងស្បូន
– ជក់បារី
– មានជំងឺឈាមរដូវ
– កំពុងតែទទួលការព្យាបាលឲ្យមានកូន ឬកំពុងប្រើប្រាស់ថ្នាំឲ្យមានកូន។
វេជ្ជបណ្ឌិតឯកទេសសម្ភពរូបនេះបានបន្តថា ក្រៅពីកត្តាប្រឈមរបស់ស្ត្រី វាអាចបណ្ដាលមកពីមូលហេតុច្រើនទៀតតែបញ្ហាទូទៅអាចបង្កដោយការបង្ករោគ ឬការរលាកបំពង់ដៃស្បូន អាចបណ្ដាល ឲ្យស្ទះដៃស្បូន មួយផ្នែក ឬទាំងស្រុង និងបញ្ហាផ្សេងៗ។
ក្នុងករណីដែលស្ត្រីមានកូនក្រៅស្បូន ទៅជួបពេទ្យមិនទាន់ពេលវេលា អាចហូរឈាមនៅក្នុងពោះច្រើន រហូតឈានដល់មានគ្រោះថ្នាក់ដល់ជីវិតទៀតផង ហើយមធ្យោបាយដែលអាចជួយស្ត្រីបាន គឺត្រូវវះកាត់យកគភ៌ចេញ ព្រោះកូនមិនអាចលូតលាស់បានក្រៅស្បូនទេ។
Hello Health Group និង “Hello គ្រូពេទ្យ” មិនចេញវេជ្ជបញ្ជា មិនធ្វើរោគវិនិច្ឆ័យ ឬព្យាបាលជូនទេ៕