ទម្លាប់ចាស់ៗពីមុនឲ្យតែស្ត្រីសម្រាលកូនរួចបានបង្គាប់បញ្ជាឲ្យធ្វើរឿងជាច្រើន មានទាំងផឹកស្រាថ្នាំ ឬស្រាឫសឈើ ថ្នាំចំណាំងឈើ ដើម្បីឲ្យមានសុខភាពល្អ សរសៃសសូងឆាប់រឹងមាំ។ ចំណែករឿងមួយទៀតដែលធ្ងន់ជាងទឹកស្រា ឬថ្នាំបុរាណនោះ គឺការផឹកទឹកនោមប្ដី ដើម្បីឲ្យសាច់ចាំល្អ មិនងាយចាស់ ហើយពេលចាស់ទៅក៏មិនងាយឈឺ។
អ្នកគ្រូពេទ្យផ្នែកឆ្មប សុំ សូរិយា បម្រើការនៅមន្ទីរពេទ្យបង្អែក ស្រុកខ្សាច់កណ្ដាល បានឲ្យដឹងថា កន្លងមក អ្នកគ្រូក៏ធ្លាប់ជួបប្រទះស្រ្តីដែលសម្រាលកូនរួច ហើយមកពិនិត្យសុខភាព និយាយពីបញ្ហានេះដែរ។ តែសម្រាប់ក្បួនពេទ្យវិញ គឺគ្មានជាដាច់ខាត ហើយការបន្តធ្វើរឿងទាំងនេះអាចធ្វើឲ្យម៉ាក់ៗមានបញ្ហា ឬជួបប្រទះជំងឺអ្វីមួយ ព្រោះថាទឹកនោមមិនមែនជារបស់ល្អទេ ផ្ទុយទៅវិញវាជាសំណល់អាក្រក់ដែលត្រូវតែបញ្ចេញចោល ហើយនៅពេលយកមកផឹកសំណល់អាក្រក់ទាំងនោះ ចូលទៅក្នុងរាងកាយវិញ។
