ការសិក្សាថ្មីមួយបានចុះផ្សាយដោយ សារព័ត៌មាន CNN កាលពីថ្ងៃទី៤ ឧសភា កន្លងទៅបង្ហាញលទ្ធផលថា អ្នកដែលតែងតែមានជំងឺផ្លូវចិត្ដច្រើន ដូចជា ជំងឺបាក់ទឹកចិត្ដ ជំងឺថប់បារម្ភជាដើមនោះ គឺងាយនឹងវិវត្ដឲ្យកើតមានទៅជាជំងឺរ៉ាំរ៉ៃច្រើនប្រភេទ។ ជាក់ស្ដែងណាស់ថា ផ្នែកស្មារតី ក៏ដូចជា ខួរក្បាលរបស់យើងគឺមានតួនាទីសំខាន់ខ្លាំងណាស់ក្នុងការបញ្ជាដឹកនាំរាងកាយឲ្យធ្វើចលនាជាប្រចាំថ្ងៃ ដូច្នេះការណ៍ដែល ខួរក្បាលរបស់យើងរវល់នឹងគិតរឿងពិបាកចិត្ដច្រើន ធុញថប់ច្រើន ក៏ដូចជាស្ពាយជំងឺបាក់ទឹកចិត្ដទៀតនោះ គឺជាមូលហេតុចំបងឈានទៅរកការកើតមានជំងឺរ៉ាំរ៉ៃផ្សេងទៀតក្នុងរាងកាយ។
ការសិក្សានេះបានធ្វើការពិសោធន៍ទៅលើអ្នកចូលរួមចំនួន ៤០ ៣៦០នាក់ ក្នុងតំបន់ Olmsted County សហរដ្ឋអាមេរិក ដោយពួកគេត្រូវបានកំណត់បែងចែកទៅតាមភេទ អាយុ ដែលមាន ២០ឆ្នាំ ៤០ឆ្នាំ និង ៦០ឆ្នាំ។ ក្នុងដំណើរការពិសោធន៍អ្នកទាំងនោះត្រូវបែងចែកជា ៤ក្រុម ដោយក្រុមទី១ គឺអ្នកដែលមានជំងឺថប់បារម្ភ ក្រុមទី២គឺអ្នកដែលមានជំងឺបាក់ទឹកចិត្ដ ក្រុមទី៣គឺអ្នកជំងឺបាក់ទឹកចិត្ដ និងថប់បារម្ភ និង ក្រុមទី៤គឺអ្នកមិនមានទាំងជំងឺថប់បារម្ភ ឬបាក់ទឹកចិត្ដ។
អត្ថបទគួរអាន៖
អ្នកស្រីសាស្ដ្រាចារ្យ Jasmin Wertz ផ្នែកចិត្ដសាស្រ្ដនៅសាកលវិទ្យាល័យ University of Edinburgh នៅចក្រភពអង់គ្លេសមានប្រសាសន៍អំពីការពិសោធន៍នេះថា ទាំងស្រ្ដីដែលស្ថិតក្នុងវ័យទាំង៣ដែលចាត់ថ្នាក់ខាងលើ និង ប្រុសរសដែលស្ថិតក្នុងវ័យ២០ឆ្នាំ ហើយពួកគេទាំងអស់ដែលស្ថិតក្នុងក្រុមដែលមានជំងឺថប់បារម្ភ និង ជំងឺបាក់ទឹកចិត្ដមានភាគរយហារនិភ័យខ្ពស់កើតមានជំងឺរ៉ាំរ៉ៃ បើធៀបទៅនឹងអ្នកដែលមិនមានជំងឺផ្លូវចិត្ដ។ ជំងឺរ៉ាំរៃដែលចង់បង្ហាញពេលនេះ គឺមានដូចជា ជំងឺលើសឈាម ជំងឺហឺត ជំងឺថប់ដង្ហើមរ៉ាំរ៉ៃ និង ពពួកមហារីកជាច្រើនប្រភេទ។ ការសិក្សានេះមានទំនោរទៅលើវ័យក្មេងច្រើនជាងវ័យចំណាស់ព្រោះថា ពួកគេមានសុភាពល្អស្រាប់ ហើយកន្លងមកមនុស្សចាស់ យើងក៏បានដឹងដែរថា គាត់ភាគច្រើនប្រឈមនឹងកើតជំងឺរ៉ាំរៃ រួចទៅហើយ។
ចង់គណនារង្វាស់ចង្វាក់បេះដូង ចុចទីនេះ!
ចង់ពិនិត្យសុខភាពប្រព័ន្ធរំលាយអាហារ ចុចទីនេះ!
លទ្ធផលពិសោធន៍បានបង្ហាញថា ស្ដ្រីដែលមានវ័យ២០ឆ្នាំមានបញ្ហាផ្លូវចិត្ដដូចជាជំងឹបាក់ទឹកចិត្ដ ថប់បារម្ភ មានភាគរយនឹងកើតមានជំងឺរ៉ាំរៃ ៦១% បើធៀបទៅនឹងអ្នកដែលគ្មានជំងឺផ្លូវចិត្ដ។ ចំណែកស្រី្ដវ័យ៦០ឆ្នាំ មានត្រឹមតែ ៥%ប៉ុណ្ណោះធៀបទៅនឹងករណីដូចគ្នា។ ចំពោះបុរសវិញវ័យ២០ឆ្នាំដែលមានជំងឹបាក់ទឺកចិត្ដ និងជំងឺថប់បារម្ភ ក៏មានភាគរយខ្ពស់អាចនឹងកើត ជំងឺរ៉ាំរៃដល់ទៅ ៧១%បើធៀបទៅនឹងអ្នកធម្មតា។ បើវ័យ៦០ឆ្នាំមាន៨%ប៉ុណ្ណោះ។
លោកវេជ្ជបណ្ឌិត Dr. William Bobo បុគ្គលសំខាន់មួយរូបក្នុងគម្រោងសិក្សាមួយនេះ មានប្រសាសន៍ថា លោកក៏មិនហ៊ានធ្វើការសម្រេចបានដែរ ពីមូលហេតុដែលបុរសបែជាមានភាគរយកើតជំងឺរ៉ាំរៃច្រើនជាងស្ដ្រីទៅវិញ តាមទិដ្ឋភាពជាក់ស្ដែងស្ដ្រីគឺទទួលរងទំហំនៃផ្នែកផ្លូវចិត្ដខ្លាំងជាងបុរស តែហេតុអ្វីបានជាបុរសបែរជាមានភាគរយច្រើនជាង។ ប៉ុន្ដែមានជំងឺមួយប្រភេទដែលស្ដ្រីអាចមានភាគរយខ្ពស់ជាបុរសនោះគឺ លើសឈាម ដែលនេះប្រហែលមកពីកត្តាអ័រម៉ូន ជីវសាស្ត្រ និងផ្លូវចិត្តក៏អាចដើរតួនាទីផងដែរ។ ក្នុងការសិក្សានេះ លោកគ្រាន់តែចង់បញ្ជាក់ថា ការណ៍ដែលរស់នៅឱបជាមួយនឹងជំងឺផ្លូវចិត្ដ នោះមិនមែនជារឿងល្អសម្រាប់ជីវិតនោះទេ វាអាចបង្កផលប៉ះពាល់ដល់សុខភាព ក្នុងនោះមិនមែនមានត្រឹមតែជំងឺដែលលោកបានលើកឡើងទេ នៅមានជំងឺជាច្រើនប្រភេទទៀត ដែលគង់នឹងកើតមាន។