ហឺត ជាជំងឺរ៉ាំរ៉ៃ ហើយបើមិនធ្លាប់កើត ច្បាស់ជាមិនយល់អារម្មណ៍គ្នាយើងដែលកំពុងកើតឡើយ។ បរិស្ថានមានផ្សែងពុល កង្វះខ្យល់បរិសុទ្ធ កាន់តែធ្វើឲ្យសុខភាពគ្នាយើងកើតហឺតអាក្រក់ឡើងៗ ហើយគ្នាយើងអត់កើតហឺត ក៏អាចប្រឈមគ្រប់ពេលដោយមិនដឹងខ្លួនដែរ។ ពិបាកការពារ និងព្យាបាល ហើយអាចឈានដល់ស្លាប់ក៏មាន។
“Hello គ្រូពេទ្យ” នឹងប្រាប់រោគសញ្ញាមួយចំនួនគ្នាយើងកើតហឺតឧស្សាហ៍ជួបប្រទះ៖
១-ក្អករ៉ាំរ៉ៃ
ក្អក ជាប្រតិកម្មធម្មជាតិ ពេលរាងកាយបញ្ចេញចោលធូលីដី ឬផ្សែងបារីហុយចូលតាមការដកដង្ហើម ប៉ុន្តែក៏អាចបង្កឡើងដោយកត្តាជាច្រើន រួមមាន រលាកច្រមុះ ឬផ្ដាសាយ។ ក្អកយូរអង្វែង អាចជារោគសញ្ញាកើតហឺត ហើយឧស្សាហ៍ក្រោក ពេលយប់ ដោយសារពិបាកដកដង្ហើមភ្លាមៗពេលកំពុងគេង ក៏ជាសញ្ញាដែរ។
២-ដកដង្ហើមឮសំឡេង
ដកដង្ហើមឮសំឡេង ជារោគសញ្ញាកើតហឺតពិតប្រាកដ ព្រោះពេលគ្នាយើងប្រឹងដកដង្ហើម មានសំឡេងហួចបានបន្លឺឡើងព្រមគ្នា។ យើងងាយប្រទះបញ្ហានេះ ដូចជា ហាត់ប្រាណ ពេលអាកាសធាតុត្រជាក់។ គួរប្រយ័ត្ន ពេលហាត់ប្រាណ ក្នុងខែត្រជាក់។
៣-សម្អាតបំពង់ក
ខាកស្ដោះ មិនសមរម្យក៏ពិតមែន ប៉ុន្តែសម្រាប់គ្នាយើងកើតហឺត ជាការសម្អាតបំពង់ក បញ្ចេញស្លេស្មជាប់ស្ទះនៅក្នុងបំពង់ក និងនៅក្នុងរន្ធច្រមុះ ព្រោះអាការៈសម្បូរស្លេស្មនៅក្នុងផ្លូវដង្ហើម អាចជារោគសញ្ញាហឺត។
៤-ហត់
គ្នាយើងអាចនឹងកើតហឺត បើមានអាការៈហត់ ក្រោយពេលហាត់ប្រាណស្រាលៗ ត្រូវអង្គុយចុះដើម្បីទប់ដង្ហើម មុននឹងបន្តទៀត។
៥-អស់កម្លាំង
គ្នាយើងខ្លះស្រាប់តែមានអាការៈដូចជាអស់កម្លាំង ថប់ដង្ហើម ណែនទ្រូង និងមានចង្វាក់ដង្ហើមខុសធម្មតា ដោយមិនដឹងមូលហេតុ។ នេះដោយសាររាងកាយយើង ស្រូបយកអុកស៊ីហ្សែនមិនគ្រប់។
៦-ងាយប្រតិកម្ម
រាងកាយឆាប់មានប្រតិកម្មពេលប៉ះពាល់លម្អងផ្កា រោមសត្វ និងអាកាសធាតុប្រែប្រួល ពិសេសប្រតិកម្មជាមួយអាហារសមុទ្រ អាហារកំប៉ុង និងគ្រាប់រុក្ខជាតិមួយចំនួន។
៧-រលាកទងសួតតាំងពីក្មេង
ឧស្សាហ៍រលាកទងសួតកាលពីក្មេង ធ្វើឲ្យបំពង់ទងសួតដឹកនាំអុកស៊ីហ្សែនទៅកាន់សួតអត់គ្រប់គ្រាន់ ជាហេតុបណ្ដាលឲ្យមានឱកាសកើតហឺត នៅពេលណាមួយ។
៨-និយាយមិនចេញញឹកញាប់
ករណីនិយាយមិនចេញញឹកញាប់ អាចមិនមែនជាសញ្ញាកើតហឺត តែបើរោគសញ្ញានេះកើតឡើងជាប្រចាំជាមួយរោគសញ្ញាដទៃទៀត វាអាចជាជំងឺហឺត។
បើគ្នាយើងប្រទះឃើញមានអាការៈរោគសញ្ញាដូចខាងលើ កុំអែអង់ឆាប់ទៅពិនិត្យ និងប្រឹក្សាយោបល់ជាមួយគ្រូពេទ្យជាបន្ទាន់។