ទ្វារមាសរបស់មនុស្សស្រីយើងគ្រប់រូប គឺមានលក្ខណៈពិសេសមួយ ដោយវាចេះធ្វើការសម្អាតដោយខ្លួនឯង។ ប្រសិនបើយើងមានសុខភាពល្អធម្មតា យើងមិនចាំបាច់ខ្វាយខ្វល់ច្រើន រកវិធីសម្អាតកន្លែងសម្ងាត់នេះទេ។ យើងអាចមិនចូលចិត្ដ ពេលមានសធ្លាក់តាមទ្វារមាស ប៉ុន្តែបើសដែលធ្លាក់មកនោះមិនមានក្លិន ឬមិនមានព័ណ៌ប្លែកទេនោះ វាគឺជារឿងធម្មតារបស់ប្រព័ន្ធបន្តពូជមនុស្សស្រីយើងទេ។ មានមនុស្សស្រីមួយចំនួនព្យាយាមសម្អាតសនោះចេញ ដោយលាងសម្អាតទ្វារមាសឲ្យស្អាត។ ប៉ុន្តែការសម្អាតនោះ អាចធ្វើឲ្យប៉ះពាល់ដល់តុល្យភាពបាក់តេរីក្នុងទ្វារមាសទៅវិញ និងធ្វើឲ្យមានការបង្ករោគ និងរលាកក្នុងទ្វារមាសថែមទៀត។ ដូចនេះ តើស្រីយើងគួរលាងសម្អាតទ្វារមាសដូចម្ដេចទើបត្រឹមត្រូវ?
១- កុំប្រើសាប៊ូក្រអូប
ជាការពិតដែលផលិតផលអនាម័យទាំងអស់របស់ស្រីមានក្លិនក្រអូប ប៉ុន្តែក្លិននេះអាចធ្វើឲ្យរំខានដល់ទ្វារមាសបាន។ បើចង់ប្រើសាប៊ូដុំ គួរទិញសាប៊ូធម្មតាមិនមានក្លិន។ យើងត្រូវយកសាប៊ូមកលាងសម្អាតតែផ្នែកខាងក្រៅបានហើយ ឯផ្នែកខាងក្នុងរបស់ទ្វារមាសវិញ មិនត្រូវសម្អាតទេ ព្រោះជាធម្មជាតិផ្នែកខាងក្នុងនេះចេះសម្អាតដោយខ្លួនឯងហើយ។
បើយើងមិនលាងសម្អាតទ្វារមាសនឹងមានញើស ហើយធ្លាក់ស ប៉ុន្តែបើដុសលាងញឹកពេកនឹងធ្វើឲ្យទ្វារមាសស្ងួត មានបម្រែបម្រួលបាក់តេរីល្អក្នុងទ្វារមាស កើតរមាស់ ឬធ្លាក់សខុសធម្មតា និងអាចមានមេរោគផ្សិតទៀត។ លាងសម្អាតទ្វារមាសមួយថ្ងៃម្ដង គឺគ្រប់គ្រាន់ហើយ។ ចំពោះពេលមករដូវវិញ ស្រីៗយើងត្រូវសម្អាតទ្វារមាសឲ្យបានញឹកញាប់ និងច្រើនជាងធម្មតាបន្តិច។ ការសម្អាត មិនមែនសម្អាតតែប្រដាប់ភេទទេ យើងត្រូវសម្អាតតំបន់ចន្លោះទ្វារមាស និងរន្ធគូទដែរ។
![ធ្លាយទ្វារមាស២](https://cdn.hellokrupet.com/wp-content/uploads/2022/07/ធ្លាយទ្វារមាស២.jpg)
៣- កុំបាញ់ទឹកលាងទ្វារមាស
Douching មានន័យថា ជាការបាញ់ទឹកលាងសម្អាតទ្វារមាសដោយផ្ទាល់ ដើម្បីបាញ់សម្អាតពេលធ្លាក់ស។ ប៉ុន្តែការលាងសម្អាតបែបនេះ នឹងធ្វើឲ្យបាត់បង់ពពួកបាក់តេរីល្អៗនៅខាងក្នុងទ្វារមាស និងធ្វើឲ្យបាក់តេរីមិនល្អកើតឡើង។ អ្នកជំនាញខាងរោគស្រ្តី ជឿថាការបាញ់សម្អាតទ្វារមាស គឺមិនល្អដល់ទ្វារមាសទេ។ វាមិនត្រឹមតែមិនអាចការពារយើងពីជំងឺកាមរោគបានហើយ ថែមទាំងធ្វើឲ្យយើងប្រឈមជាមួយការបង្ករោគក្នុងទ្វារមាសកាន់តែខ្លាំង។
ចង់គណនា BMR ចុចទីនេះ!
ចង់គណនារង្វាស់ចង្វាក់បេះដូង ចុចទីនេះ!
ចង់ពិនិត្យជំងឺមហារីកសុដន់ ចុចទីនេះ!
ចង់ពិនិត្យជំងឺមហារីកមាត់ស្បូន ចុចទីនេះ!
៤- កុំប្រើក្រដាសសើម ឬប្រដាប់លញ់បំបាត់ក្លិន
មិនខុសគ្នាពីសាប៊ូមានក្លិននោះទេ ក្រដាសសើម ឬប្រដាប់លញ់បំបាត់ក្លិន ក៏មិនអាចជួយអ្វីបានទេ ថែមទាំងនាំឲ្យឈឺចាប់ទៀតផង។ បើទ្វារមាសមិនមានក្លិនផ្កាកូលាបជាប់មកពីពេលកើត នោះបានន័យថាវាមិនត្រូវការឲ្យយើងយកក្លិននេះទៅដាក់លើវាទេ។ ទ្វារមាសមានក្លិនធម្មជាតិរបស់វា ហើយអាចប្រែប្រួលទៅតាមបម្រែបម្រួលអ័រម៉ូន។ ក្នុងករណី ប្រដាប់ភេទយើងជះក្លិនខ្លាំងដល់ថ្នាក់បាត់ទាំងទំនុកចិត្ត ហើយពិបាកទ្រាំ គួរទៅជួបពេទ្យ ព្រោះយើងអាចមានបញ្ហាសុខភាពប្រដាប់បន្តពូជហើយ។ មេរោគដែលឧស្សាហ៍បង្កឲ្យមានការរលាកនៅទ្វារមាស គឺពពួកបាក់តេរី vaginosis ដែលគេអាចព្យាបាលបាន ដោយប្រើថ្នាំអង់ទីប៊ីយ៉ូទិក។ មួយវិញទៀត ប្រសិនបើប្រដាប់ភេទ មានបញ្ហាមិនប្រក្រតីណាមួយកើតឡើង យើងគួរទៅជួបពិគ្រោះជាមួយគ្រូពេទ្យ មិនត្រូវព្យាយាមដោះស្រាយបញ្ហាទាំងអស់នោះដោយខ្លួនឯងទេ ព្រោះពេលខ្លះអាចធ្វើឲ្យបញ្ហាកើតឡើងកាន់តែធ្ងន់ថែមទៀត។