ការផ្ដល់ជាតិទឹកដល់រាងកាយ ពិតជាមានសារសំខាន់ណាស់។ ជាក់ស្ដែង រាងកាយរបស់មនុស្សយើងភាគច្រើនមានផ្ទុកទៅដោយជាតិទឹក ហើយប្រព័ន្ធទាំងអស់នៅក្នុងរាងកាយ គឺត្រូវការទឹកដើម្បីដំណើរការ។ ការបង្រៀនកូនឲ្យដឹងពីតម្លៃនៃទឹក គឺពិតជាមានសារសំខាន់ខ្លាំងណាស់ ដើម្បីឲ្យក្មេងទទួលបានបែបបទជីវិតប្រកបសុខភាពល្អ។
៣. ដឹងពីអ្វីដែលខ្លួនកំពុងញ៉ាំ
ជាមួយគ្នានេះដែរ ប៉ាម៉ាក់គួរបង្រៀនកូនឲ្យដឹងពីអ្វីដែលពួកគេកំពុងញ៉ាំ។ ការជ្រើសរើសញ៉ាំតែអាហារដែលយើងអាចដឹងពីគ្រឿងផ្សំបាន គឺជាវិធីដ៏ល្អមួយក្នុងការតាមដានអាហារដ៏ត្រឹមត្រូវ។ កត្តានេះក៏អាចជួយកាត់បន្ថយអាហារដែលមិនល្អចំពោះរាងកាយ ដូចជាអាហារកែច្នៃ ស្ករ ឬអាហារដែលមានជាតិខ្លាញ់ច្រើនជ្រុល។ បន្ថែមពីនេះ អាហារដែលមានសារជាតិបំប៉នខ្ពស់ មានដូចជាបន្លែ ផ្លែឈើ សាច់ដែលគ្មានខ្លាញ់ គ្រាប់ធញ្ញជាតិ និងខ្លាញ់សុខភាព គឺមានជម្រើសដ៏ល្អបំផុតដែលយើងគួរណែនាំកូនឲ្យញ៉ាំជាប្រចាំ។ រីឯការបែងចែកអាហារ ក៏មានសារសំខាន់ដូចទៅនឹងការជ្រើសរើសអាហារផងដែរ ហើយការញ៉ាំច្រើនជ្រុល ទោះបីជាអាហារសុខភាពក៏ដោយ ក៏មិនល្អចំពោះរាងកាយនោះដែរ។