ម៉ាក់ប៉ា តែងតែចង់ចិញ្ចឹមកូនបានល្អ និងឲ្យកូនមានរបស់ញ៉ាំគ្រប់គ្រាន់ ដើម្បីឲ្យកូនបានលូតលាស់ល្អ ទាំងប្រាជ្ញា និងកាយសម្បទា ជាពិសេស ឲ្យមានមាឌកាម៉ាប់ៗ គួរឲ្យក្នាញ់។ តែមានម៉ាក់ប៉ាខ្លះ ឆ្ងល់ថា កូនគាត់ញ៉ាំច្រើនដែរ បបរអស់១ចានរហូតទេ ហេតុអីបានជាអាអូនមិនសូវឡើងគីឡូអ៊ីចឹង?
ម៉ាក់ប៉ាសាកល្បងវិធីនេះ បើអាអូនញ៉ាំបបរអស់ៗគ្រប់ពេល តែគីឡូមិនគ្រប់ស្ដង់ដារ
ត្រួតពិនិត្យដោយ វេជ្ជ. ចាន់ ស៊ីណេត · មន្ទីរពេទ្យបង្អែកមិត្តភាពកម្ពុជា-ចិន សែនសុខ
តាមពិតទៅ ទម្ងន់កូនមិនគ្រង់ស្តង់ដារ មិនមែនដោយសារតែអាហារមួយមុខទេ។ វាអាចបណ្ដាលមកកត្តាច្រើនផ្សេងទៀតដូចជា អាអូនមានបញ្ហាផ្នែកសុខភាព ទាមទារឲ្យមានការពិនិត្យសុខភាពជាមួយគ្រូពេទ្យជំនាញ និងកំណត់ប្រភពបញ្ហាឲ្យបានច្បាស់។ នេះបើតាមការឲ្យដឹងរបស់លោកស្រីវេជ្ជបណ្ឌិត កុសល កណិការ ឯកទេសជំងឺកុមារ សញ្ញាប័ត្រពីប្រទេសបារាំង។
ស្របគ្នានេះដែរ ការចិញ្ចឹមកូន មានដំណាក់កាលប្រែប្រួល បត់បែនទៅតាមការលូតលាស់ វ័យកូន និងការបន្ថែមអាហារូបត្ថម្ភថ្មីៗ អាស្រ័យទៅតាមវ័យរបស់កូនយើង។ តែបើយើងសង្កេតឃើញថា ពីមួយពេលទៅមួយពេល អាអូនដូចញ៉ាំបបរច្រើនដែរ តែគីឡូមិនឃើញឡើងសោះ អាចសាកល្បងដោះស្រាយតាមតិចនិកនេះ៖
- ត្រឹមបបរគ្រប់គ្រឿងមួយមុខ នៅមិនទាន់គ្រប់គ្រាន់ឲ្យកូនលូតលាស់បានពេញលេញទេ ដូចនេះម៉ាក់ប៉ាត្រូវចេះបន្ថែម ឬឆ្នៃអាហារកូនប្លែកៗ ដើម្បីជួយឲ្យកូនលូតលាស់ល្អ និងមិនឆាប់ធុញនឹងបបរ
- ពេលអាអូនអាយុ១ខួប បើអាច គួរផ្លាស់ប្ដូររវាងបាយ និងបបរខាប់គ្រប់គ្រឿងឲ្យកូនញ៉ាំ ពោលគឺពេលកូនចាប់ផ្ដើមចេះញ៉ាំបាយ កុំទាន់ចោលបបរខាប់គ្រប់គ្រឿង គួរតែប្ដូរគ្នាត្រលប់ទៅ ត្រលប់មក។
- ពេលខ្លះ យើងអាចផ្លាស់ប្តូរពីបាយ បបរ ទៅជាគុយទាវ មីធម្មជាតិ បាយជ្រាយ ទឹកស៊ុបប្លែកមាត់កូនខ្លះ
- ម៉ាក់ប៉ាអាចឲ្យកូនញ៉ាំនំចំណីសុខភាព នំបន្លែសេរីរាង្គ ទឹកផ្លែឈើសុខភាព ទឹកក្រឡុក smoothies។ល។
បន្ថែមពីលើនេះ វេជ្ជបណ្ឌិតឯកទេសជំងឺកុមាររូបនេះ បន្តឲ្យដឹងថា ក្មេងថ្លោសទ្រលុកទ្រលុនមិនមែនសុទ្ធតែគ្មានបញ្ហាសុខភាពទេ រីឯក្មេងមានមាឌតូចល្អិតក៏មិនប្រាកដថាមានបញ្ហាដែរ។ អ្វីដែលសំខាន់នោះ គឺម៉ាក់ប៉ាផ្ដល់អាហារសម្បូរជីវជាតិឲ្យកូនគ្រប់គ្រាន់ និងផ្ដល់សេចក្ដីស្រលាញ់ ការយកចិត្តទុកដាក់ឲ្យកូនបានល្អ នោះអាអូននឹងមានសុខភាពល្អ លូតលាស់បានពេញលេញ ទោះពេលខ្លះកូនមិនមានមាឌធំក៏ដោយ។
បដិសេធ
Hello Health Group និង “Hello គ្រូពេទ្យ” មិនចេញវេជ្ជបញ្ជា មិនធ្វើរោគវិនិច្ឆ័យ ឬព្យាបាលជូនទេ៕
ផ្សព្វផ្សាយពាណិជ្ជកម្មតើអត្ថបទនេះមានប្រយោជន៍ដែរទេ?
ផ្សព្វផ្សាយពាណិជ្ជកម្មផ្សព្វផ្សាយពាណិជ្ជកម្ម