ជំងឺគេងមិនលក់ អាចកើតលើយើងគ្រប់ពេល គ្រប់វ័យ នាំឲ្យប៉ះពាល់ច្រើនដល់សុខភាព។ អ្វីកាន់តែគួរឲ្យព្រួយបារម្ភខ្លាំង បើកើតលើស្រីៗកំពុងពពោះ ត្រូវតែប្រយ័ត្នប្រយែងឲ្យបានច្រើន ទោះធម្មតាមិនអាចប៉ះពាល់ដល់សុខភាពយើង និងកូនក្នុងផ្ទៃក៏ពិតមែន ប៉ុន្តែក៏មិនត្រូវព្រងើយកន្តើយដែរ។ បើស្រីៗយើងកំពុងពពោះ ហើយជួបបញ្ហានេះអាចសាកដោះស្រាយតាមវិធីក្នុងអត្ថបទនេះបាន។
គេងមិនលក់ពេលពពោះ ឧស្សាហ៍កើតមានណាស់ ត្រូវចេះវិធីដោះស្រាយទាំងនេះ
ត្រួតពិនិត្យដោយ វេជ្ជ. ចាន់ ស៊ីណេត · មន្ទីរពេទ្យបង្អែកមិត្តភាពកម្ពុជា-ចិន សែនសុខ
១- គេងមិនលក់ពេលពពោះកើតឡើងនៅពេលណា?
ជាធម្មតា បញ្ហាដំណេកតែងកើតមានគ្រប់ពេលចំពោះស្រីៗកំពុងពពោះ ប៉ុន្តែតាមបទពិសោធន៍ម៉ាក់ៗជាច្រើន ជំងឺគេងមិនលក់ពេលពពោះ អាចចាប់ផ្តើមចន្លោះត្រីមាសទី២ និង ទី៣ នៃការពពោះ ហើយក៏ជាអំឡុងពេលរោគសញ្ញាពពោះផ្សេងទៀតចាប់ផ្តើមកើតមាន ព្រោះជាពេលគភ៌កំពុងលូតលាស់កាន់តែខ្លាំងនាំឲ្យយើងពិបាកក្នុងការគេង។
២- គេងមិនលក់ពេលពពោះគ្រោះថ្នាក់ដែរទេ?
បញ្ហាគេងមិនលក់ពេលពពោះ មិនអាចបង្កហានិភ័យដល់សុខភាពយើង និងកូនទេ អ៊ីចឹងក៏មិនចាំបាច់បារម្ភខ្លាំងពេកនោះដែរ។ ពេលខ្លះស្រីៗយើងកុំខ្វាយខ្វល់ច្រើនពេក ព្រោះថាការមិនខ្វាយខ្វល់ច្រើន ក៏ជួយឲ្យយើងអាចគេងលក់ដូចធម្មតាវិញបាន។
៣- កត្តាអ្វីខ្លះនាំឲ្យគេងមិនលក់ពេលពពោះ?
មានកត្តាស្មុគស្មាញជាច្រើនរួមបញ្ចូលគ្នា ដែលអាចបង្កទៅជាបញ្ហាគេងមិនលក់ពេលពពោះ ក្នុងនោះរាប់បញ្ចូលទាំង៖
– បម្រែបម្រួលអ័រម៉ូន
– តម្រូវការទៅបន្ទប់ទឹកញឹកញាប់
– បញ្ហាក្រហាយទ្រូងពេលពពោះ
– រមួលក្រពើ
– ការធ្វើមេតាប៉ូលីសក្នុងរាងកាយនាំឲ្យឡើងកម្តៅ
– គេងមិនស្រណុក ដោយសារតែភគ៌ក្នុងផ្ទៃកាន់តែធំ និងកម្រើក
– បញ្ហាថប់បារម្ភមុនសម្រាល។
អត្ថបទពាក់ព័ន្ធ៖
- ហេតុផលស្រ្តីពពោះមិនគួរផឹកកាហ្វេ
- បើម្តាយមានជំងឺទាំងនេះ អាចឆ្លងដល់កូនក្នុងផ្ទៃបាន
- តិចនិកងាយៗ អាចជួយស្រីៗកាត់បន្ថយស្ត្រេសពេលពពោះ
៤- គេងមិនលក់ពេលពពោះគួរធ្វើម៉េច?
បញ្ហាថប់បារម្ភមួយចំនួន ដូចជាការមានអារម្មណ៍ភ័យខ្លាចខ្លាំងចំពោះការសម្រាលកូន ជាកត្តាចម្បងនាំឲ្យប៉ះពាល់ដល់ដំណេក និងក៏ជាកត្តានាំឲ្យស្រីៗភាគច្រើនគេងមិនលក់ស្រួល រើខ្លួនចុះឡើងពេញមួយយប់ដែរ។ បើយើងមានអារម្មណ៍ភ័យខ្លាចការសម្រាល ក៏មិនមែនជារឿងចម្លែក ព្រោះស្រីៗពពោះភាគច្រើនតែងមានបញ្ហានេះ ប៉ុន្តែបើបញ្ហានេះធ្វើឲ្យយើងគេងមិនលក់ ឬគេងមិនគ្រប់គ្រាន់ គួរសាកល្បងដោះស្រាយតាមវិធីសាស្ត្រខាងក្រោមនេះបន្តិចលមើល៍។
– ក្រោកឡើង៖ បើព្យាយាមគេងប្រមាណ ២០-៣០ នាទី ហើយបើនៅតែគេងមិនលក់ អាចក្រោកទៅធ្វើអ្វីយើងគិតថាមិនទាន់ធ្វើរួចកាលពីល្ងាច (ចំណាយត្រឹម ១៥នាទីបានហើយ) ហើយព្យាយាមត្រឡប់មកគេងវិញ ប្រហែលជាជួយឲ្យយើងមានអារម្មណ៍ល្វើយជាងមុន ងាយគេងលក់ស្រួល។
– កុំគិតពីចំនួនម៉ោងយើងគេងអី៖ គិតថា ពេលវេលាគេងសម្រាប់យើងទូទៅ ៨ម៉ោងក្នុងមួយថ្ងៃ ប៉ុន្តែគ្នាយើងខ្លះអាចនឹងមានតម្រូវការគេងច្រើន ឬតិចជាងនេះ។ អ្វីល្អបំផុត សួរខ្លួនយើងមានអារម្មណ៍ស្រួលខ្លួន ឬយ៉ាងណាជាមួយរយៈពេលយើងគេង។ បើយើងគ្មានអារម្មណ៍ល្វើយ អស់កម្លាំងទេនោះ មានន័យថាយើងគេងគ្រប់គ្រាន់ហើយ។
អត្ថបទពាក់ព័ន្ធ៖
- ពេលពពោះ ម៉ាក់ៗញ៉ាំពងក្ងាន ពងអូទ្រីស កូនកើតមកឆ្លាត?
- ពិតអត់ ផឹកទឹកដូងទុំច្រើន ឈឺពោះឆាប់ ស្រួលសម្រាលកូនមែន?
- ពេលពពោះចេះតែឈឺខ្នង អាចសាកតិចនិកទាំងនេះអាចជួយបាន
- ពពោះចំខែក្តៅ ស្រីៗគួរចេះតិចនិកទាំងនេះ ដើម្បីរក្សាសុខភាពឲ្យបានល្អ
៥- យើងអាចបង្ការបញ្ហាគេងមិនលក់ពេលពពោះបានអត់?
គ្នាយើងប្រហែលជាមិនអាចចៀសផុតពីបញ្ហាគេងមិនលក់ពេលពពោះក៏ពិតមែន ប៉ុន្តែយើងអាចកាត់បន្ថយបានតាមរយៈតិចនិកខាងក្រោមនេះ៖
– កម្ចាត់អារម្មណ៍ស្មុគស្មាញចេញឲ្យអស់
– កុំផឹកកាហ្វេ ឬញ៉ាំសូកូឡា ពិសេសនៅពេលរសៀល និងពេលល្ងាច
– ញ៉ាំអាហារពីព្រលប់ អាចជួយឆាប់ងងុយគេងបាន
– ញ៉ាំអាហារសម្រន់ខ្លះដែលជួយឲ្យយើងឆ្អែតពេញមួយយប់
– ផឹកទឹកឲ្យបានច្រើនពេញមួយថ្ងៃ ប៉ុន្តែពេលល្ងាចកុំផឹកច្រើនពេក ព្រោះធ្វើឲ្យក្រោកទៅបង្គន់ច្រើនដង
– ហាត់ប្រាណអំឡុងពេលពពោះជារឿងល្អ បានទាំងសុខភាព និងជួយដល់ការគេងស្កប់ស្កល់
– គេងឲ្យបានទៀងពេល ដើម្បីនាឡិកាក្នុងរាងកាយអាចកំណត់ពេលគេងច្បាស់លាស់
– កុំមើលអេក្រង់ឧបករណ៍អេឡិចត្រូនិកពេលចូលគេង ព្រោះពន្លឺរបស់ចេញពីឧបករណ៍ទាំងនេះនឹងរំខានដល់ភាពងងុយគេងបាន
– ពិនិត្យសីតុណ្ហភាពបន្ទប់ឲ្យបានត្រឹមត្រូវ ត្រជាក់ល្មមមានផាសុកភាពពេលគេង
– ប្រើខ្នើយជំនួយសម្រាប់ស្រីៗពពោះ អាចធ្វើឲ្យការគេងកាន់តែស្រួល
– ប្រើក្លិនក្រអូបៗក្នុងបន្ទប់ កម្រាលពូក ភួយ និងខ្នើយ ពិសេសក្លិនផ្កាឡាវេនឌឺ អាចជួយឲ្យយើងឆាប់គេងលក់បាន។
៦- ថ្នាំជំនួយការគេងមានសុវត្ថិភាពអំឡុងពេលពពោះអត់?
ថ្នាំងងុយគេងមួយចំនួន ត្រូវគេជឿថាមានសុវត្ថិភាពប្រើប្រាស់អំឡុងពេលពពោះ រាប់បញ្ចូលទាំងថ្នាំ Unisom, Tylenol PM, Sominex, Nytol, Ambien និងថ្នាំ Lunesta ជាដើម។ យ៉ាងណា គ្នាយើងមិនគួរប្រើប្រាស់ថ្នាំជំនួយការគេងអំឡុងពេលពពោះនោះទេ (ទាំងថ្នាំមានវេជ្ជបញ្ជា និងឱសថបុរាណ) បើសិនជាមិនមានវេជ្ជបញ្ជា។
អត្ថបទពាក់ព័ន្ធ៖
- គេងអត់លក់ពេលពពោះ ប្រើថ្នាំងងុយគេង ប៉ះពាល់អត់?
- ពិបាកគេងលក់ សាកវិធីសាមញ្ញនេះ អាចបានផល
- ស្រីៗមានបញ្ហាបែបនេះពេលគេង អាចប្រឈមជំងឺមហារីក
ពេលខ្លះ ពេទ្យអាចណែនាំយើងឲ្យញ៉ាំថ្នាំបំប៉នម៉ាញ៉េស្យូម ដើម្បីជួយដោះស្រាយបញ្ហាទល់លាមក និងរមួលក្រពើបាន។ បើយើងមានបញ្ហាគេងមិនលក់ដោយបញ្ហាទាំងពីរនេះ មុនចូលគេងអាចញ៉ាំថ្នាំបំប៉នម៉ាញ៉េស្យូមបាន ព្រោះអាចសម្រួលសាច់ដុំ និងការគេងបានស្រួល។
បដិសេធ
Hello Health Group និង “Hello គ្រូពេទ្យ” មិនចេញវេជ្ជបញ្ជា មិនធ្វើរោគវិនិច្ឆ័យ ឬព្យាបាលជូនទេ៕
ផ្សព្វផ្សាយពាណិជ្ជកម្មតើអត្ថបទនេះមានប្រយោជន៍ដែរទេ?
ផ្សព្វផ្សាយពាណិជ្ជកម្មផ្សព្វផ្សាយពាណិជ្ជកម្មផ្សព្វផ្សាយពាណិជ្ជកម្ម