ឧស្សាហ៍ជួបបញ្ហាមិនរំលាយអាហារគួរដោះស្រាយបែបណា?

ការ​មិន​រំលាយ​អាហារអាចកើតឡើង នៅពេលយើងញុំាអាហារច្រើនជ្រុល ឬញុំាអាហារដែលធ្វើឱ្យពិបាករំលាយដែលបណ្តាលឱ្យយើងហើមពោះ ឆ្អល់​ពោះ ចង្អោរ និងពិបាកក្នុងខ្លួន។ បើយើង​ជួប​បញ្ហា​មិនរំលាយអាហារ យើង​គួរធ្វើបែបម៉េចដើម្បីកាត់បន្ថយអាការៈ?

កត្តាមួយចំនួនអាចបណ្តាលឱ្យយើងមានបញ្ហាមិនរំលាយអាហារ៖

• ញុំាភេសជ្ជៈមានជាតិអាល់កុល កាហ្វេអ៊ីន ឬហ្គាសច្រើនពេក
• ញ៉ាំច្រើនពេក ឬលឿនពេក
• ញុំាអាហារមានជាតិខ្លាញ់ ហឹរ ឬអាស៊ីដ
• មានភាពតានតឹង ឬថប់បារម្ភ
• ញុំាថ្នាំមួយចំនួនដូចជា អាស្ពីរីន ថ្នាំប្រឆាំងការរលាក ឬអ៊ីប៊ុយប្រូហ្វេនជាដើម ជាពិសេស​លេប​ពេល​ពោះ​ទទេ

ខាងក្រោមនេះជាវិធីសាស្រ្តមួយចំនួនដែលយើងអាចសាកល្បងដើម្បីកាត់បន្ថយអាការៈមិនរំលាយអាហារ៖

១. ញុំាតែជីរអង្កាម

ការញុំាតែជីរអង្កាមអាចជួយកាត់បន្ថយអាការៈដូចជា ចង្អោរ ក្អួត ឈឺ​ពោះ ហើមពោះជាដើម ព្រោះ​ជីរអង្កាមមានផ្ទុកសារជាតិ flavonoids, អាស៊ីដ phenolic, និង menthol ដែលអាចជួយ​សម្រួល​ដល់​សាច់ដុំផ្លូវរំលាយ​អាហារ និងអាចជួយរំលាយអាហារយ៉ាងមានប្រសិទ្ធភាព។

ម្យ៉ាងទៀត តែជីរអង្កាមមានសមត្ថភាពក្នុងការបញ្ចុះកម្តៅដែលអាច​ជួយ​កាត់បន្ថយ​អាការៈ​ក្រហាយ​ទ្រូង និងច្រាល់ទឹកអាស៊ីដក្រពះ។ ​​

២. ញុំាតែខ្ញី

ខ្ញីអាចព្យាបាលបញ្ហាក្រពះពោះវៀនជាច្រើនដូចជា ការមិនរំលាយអាហារ ក្រហាយទ្រូង ចង្អោរ ក្អួត និងហើមពោះ។ តាមការសិក្សាបានឱ្យដឹងថា ខ្ញីមានផ្ទុកសមាសធាតុ​ដែលអាចជួយ​ពន្លឿន​ការ​កន្ត្រាក់​ក្រពះដែល​ជួយ​ឱ្យអាហាររំលាយ និងឆ្លងកាត់ផ្លូវរំលាយអាហារលឿន។ យើង​អាច​ញុំា​តែខ្ញី​សុទ្ធ ឬលាយជាមួយក្រូចឆ្មារ និងទឹកឃ្មុំក៏បាន។

ចង់គណនា BMR ចុចទីនេះ!

ចង់គណនា BMI ចុចទីនេះ!

ចង់គណនារង្វាស់ចង្វាក់បេះដូង ចុចទីនេះ!

ចង់ពិនិត្យសុខភាពប្រព័ន្ធរំលាយអាហារ ចុចទីនេះ!

៣. ញុំាម្សៅបេកឃីងសូដា

តាមការសិក្សាបានឱ្យដឹងថា យើងអាចមានបញ្ហាមិនរំលាយអាហារ នៅ​ពេល​ក្រពះ​យើងកើន​ទឹក​អាស៊ីដ​ក្រពះ។ យើងអាចលាយម្សៅ​បេកឃីង​សូដា​កន្លះស្លាបព្រាកាហ្វេជាមួយទឹកមួយកែវ រួចកូរ​ឱ្យ​សព្វ ហើយញុំា ព្រោះ​ម្សៅបេកឃីងសូដាមានកម្រិត pH អាល់កាឡាំង​ដែលអាចបន្សាប​ជាតិអាស៊ីដ​ក្នុងក្រពះបាន។

៤. ញុំាទឹកខ្មេះផ្លែប៉ោម

ពេលខ្លះយើងអាចមានបញ្ហាមិនរំលាយអាហារដោយសារក្រពះមិនផលិតជាតិអាស៊ីដគ្រប់គ្រាន់ដើម្បីរំលាយអាហារ។ អាស៊ីដអាសេទិចនៅក្នុងទឹកខ្មេះ​ផ្លែប៉ោមអាចជួយយើងកម្ចាត់បាក់តេរី រំលាយ​អាហារ បំបាត់អាកាៈច្រាល់ទឹកអាស៊ីដក្រពះ និងហើមពោះ។

យើងអាចញុំាទឹកខ្មេះផ្លែ​ប៉ោម​ដោយលាយ​ទឹកខ្មេះផ្លែប៉ោមមួយស្លាបព្រាបាយជាមួយទឹកក្តៅឧណ្ហៗមួយពែង និងទឹកឃ្មុំបន្តិច។

៥. ញុំាម្នាស់

ម្នាស់មានផ្ទុកជាតិសរសៃខ្ពស់ និងសារធាតុ bromelain ដែលជាអង់ស៊ីម​ជួយដល់ការរំលាយអាហារ ជា​ពិសេស​ជួយបំបែកប្រូតេអ៊ីន។ សារធាតុ bromelain ក៏ជួយកាត់បន្ថយអាការៈក្រហាយទ្រូង ឈឺពោះ ហើមពោះ និងទល់លាមកដែរ។

យើងអាចញុំាម្នាស់មួយជ្រុងដើម្បីជួយដល់ការរំលាយអាហារ តែ​មិន​ត្រូវ​ញុំា​ច្រើនទេ ព្រោះអាចបណ្តាលឱ្យមានបញ្ហាក្រពះពោះវៀន​ដោយសារ​ម្នាស់​​មានផ្ទុក​ជាតិ​អាស៊ីដ​ច្រើន។

ការ​មិន​រំលាយ​អាហារ​កម្រិត​ស្រាល និង​យូរៗម្តងដែលជាទូទៅមានរយៈពេល ១-២ ម៉ោង​អាច​ជា​រឿង​ធម្មតាមិន​គួរឱ្យបារម្ភទេ តែបើយើងមានបញ្ហាមិនរំលាយអាហារដែលបណ្តាលឱ្យមានការឈឺចាប់ខ្លាំង និងមានរយៈពេល​លើសពី ២ សប្តាហ៍ យើងគួរទៅជួបគ្រូពេទ្យ​ព្រោះអាចបណ្តាល​មកពី​បញ្ហា​សុខភាព​មួយចំនួន។

អត្ថបទគួរអាន៖

• ប្រភេទអាហារទាំងនេះ មិនគួរញុំាក្នុងពេលជាមួយគ្នា អាចពិបាករំលាយ
• អាហារយើងញ៉ាំត្រូវការពេលប៉ុន្មានទើបរំលាយអស់?​
• ម៉េចបានកើតស្ត្រេស អាចបង្កឲ្យ​មានបញ្ហាក្រពះពោះវៀន?
• ដើរបន្តិចបន្តួចក្រោយញ៉ាំអាហារ​មានប្រយោជន៍ដល់ក្រពះពោះវៀន
• ញ៉ាំផ្លែម្នាស់អាចជួយពង្រឹងប្រព័ន្ធភាពស៊ាំ និងប្រព័ន្ធរំលាយអាហារ
• សុខភាពពោះវៀនល្អ ផ្ដល់គុណប្រយោជន៍​ច្រើន​ដល់រាងកាយ