មធ្យោបាយនៃការពន្យារកំណើតមានច្រើនដូចជា ការប្រើប្រាស់ថ្នាំគ្រាប់ ថ្នាំចាក់ កងដាក់ក្នុងស្បួន កងដាក់ក្រោមស្បែក ឬការប្រើស្រោមអនាម័យ។ល។ ស្ត្រីភាគច្រើន នៅពេលដែលមិនទាន់ចង់បានកូន និយមប្រើប្រាស់ថ្នាំគ្រាប់ពន្យារកំណើត ប៉ុន្តែនៅពេលដែលប្រើយូរទៅ មានស្ត្រីខ្លះលើកឡើងថា ប្រើប្រាស់ថ្នាំគ្រាប់ពន្យារកំណើតរាប់ឆ្នាំ អាចប៉ះពាល់ដល់សុខភាព ពិសេសប៉ះពាល់ដល់លទ្ធភាពការបង្កកំណើត ឬអត់?
ឆ្លើយតបនឹងចម្ងល់នេះ លោកវេជ្ជបណ្ឌិត ឃួន សុវណ្ណារិទ្ធ ឯកទេសផ្នែកសម្ភព និងរោគស្ត្រី ថា ទោះបីជាថ្នាំគ្រាប់ពន្យារកំណើតមានផលរំខានតិចតួចទៅតាមប្រភេទនៃសារធាតុអ័រម៉ូន និងករណីប្រើដោយពុំបានពិគ្រោះជាមួយគ្រូពេទ្យ តែបញ្ហានេះបណ្ដាលឲ្យអត់កូន ឬពិបាកមានកូន គឺពុំមែនបណ្ដាលមកពីការប្រើថ្នាំគ្រាប់ពន្យារកំណើតនោះទេ។ ការសិក្សាបានបង្ហាញឲ្យដឹងថា ស្ត្រីដែលបានប្រើប្រាស់ថ្នាំគ្រាប់ពន្យារកំណើត គឺលទ្ធភាពបង្ករកំណើត មានផ្ទៃពោះដូចរាល់ស្ត្រីពុំធ្លាប់បានប្រើថ្នាំពន្យារកំណើតដូចគ្នាដែរ។
លោកបន្តថា លើកលែងតែការប្រើថ្នាំគ្រាប់ពន្យារកំណើតបន្ទាន់ (ថ្នាំ៧២ ម៉ោង) រយៈពេលយូរ និងញឹកញាប់ពេក ទើបបណ្ដាលឲ្យមានផលប៉ះពាល់ដល់បញ្ហាបង្កកំណើត។ ចំណែកប្រភេទថ្នាំពន្យារកំណើតប្រចាំថ្ងៃ ពុំមានផលប៉ះពាល់ដល់លទ្ធភាពបង្កកំណើតនោះទេ ហើយស្ត្រីទាំងអស់នឹងចាប់ផ្ដើមមានរដូវឡើងវិញ នៅខែបន្តបន្ទាប់ ហើយសារធាតុអ័រម៉ូនដែលមាននៅក្នុងខ្លួននឹងបញ្ចេញអស់ពីរាងកាយភ្លាមៗ ក្រោយពេលបញ្ឈប់ការប្រើប្រាស់។
ស្ត្រីមួយចំនួនប្រើថ្នាំពន្យារកំណើត ស្របពេលមានបញ្ហាវិបត្តិអត់កូន ពិបាកមានកូនដោយពុំបានដឹង ឬពិនិត្យព្យាបាលពីមុន ដូចជាជំងឺពងញីកណ្ដាញ់ (PCOS) ធ្វើឲ្យស្ត្រីរាំងរដូវ រដូវមកមិនទៀងទាត់ស្រាប់ ជំងឺដុំឈាមរដូវ ឬស្បូនក្រិន វិបត្តិមេជីវិតញីផ្សេងៗ ដែលជាបញ្ហាធ្វើឲ្យស្ត្រីពិបាកមានកូន។
ស្វែងយល់ពីការពន្យារកំណើតផ្សេងទៀត៖
- ក្រោយប្រើថ្នាំពន្យារកំណើតបន្ទាន់ មានអាការៈទាំងនេះ មិនបាច់ភ័យទេ
- ៣ សំណួរ អ្នកពន្យារកំណើតដោយចងដៃស្បូនច្រើនចង់ដឹង
- ចងដៃស្បូនរួច បើភ្លាត់មានផ្ទៃពោះ ត្រូវប្រញាប់ជួបគ្រូពេទ្យ
វេជ្ជបណ្ឌិតផ្នែកសម្ភពរូបនេះ បានណែនាំដល់ស្ត្រីគ្រប់រូបជ្រើសយកវិធីពន្យារកំណើតឲ្យបានសមស្រប និងសុវត្ថិភាពសម្រាប់ខ្លួន ដោយពិគ្រោះជាមួយគ្រូពេទ្យច្បាស់លាស់ និងស្វែងរកសេវាពិនិត្យ តាមដានសុខភាពដែលខ្លួនអាចទុកចិត្តបាន។
[embed-health-tool-ovulation]
