ដល់ពេលមួយដែលប៉ាម៉ាក់ចង់ឲ្យកូនពាក់ក្រវិល គឺត្រូវយកកូនទៅចោះត្រចៀក ប៉ុន្តែដឹងអត់ ថាក្រោយចោះត្រចៀកម៉ាក់ៗត្រូវថែទាំបែបណាកុំឲ្យត្រចៀកកូនឆ្លងរោគ? ក្រោយចោះត្រចៀក បើថែទាំមិនបានល្អ អាចធ្វើឲ្យមានការឆ្លងរោគផងដែរ។ ទាំងនេះ ជាតិចនិកមួយចំនួនដែលម៉ាក់ៗគួរដឹង ដើម្បីការពារការឆ្លងរោគ និងកាត់បន្ថយអាការៈឈឺចាប់របស់កូនក្រោយចោះត្រចៀក។
១. កុំបង្វិល ឬផ្លាស់ប្តូរក្រវិលថ្មី
ការពីមុនចាស់ៗបង្វិលក្រវិលបន្ទាប់ចោះត្រចៀកកូនរួច ដើម្បីការពារមិនឱ្យក្រវិលជាប់ត្រចៀក បន្ទាប់ពីសាច់ត្រចៀកជាសះស្បើយ ប៉ុន្តែគ្រូពេទ្យបានណែនាំថា ប៉ាម៉ាក់មិនចាំបាច់បង្វិលក្រវិលកូនទេ ព្រោះក្រវិលអាចការពាររន្ធត្រចៀកមិនឱ្យដុះជិតវិញបាន។
ជាងនេះទៅទៀត ការបង្វិលក្រវិល ឬផ្លាស់ប្តូរក្រវិលថ្មីបន្ទាប់ពីចោះត្រចៀករួចអាចធ្វើឱ្យស្បែកជុំវិញរន្ធត្រចៀករលាកដែលអាចបណ្តាលឱ្យមានការឈឺចាប់ និងឆ្លងមេរោគ។
២. កុំឱ្យមានអ្វីទាក់ក្រវិល
ការទាក់សក់ អាវ ឬអ្វីផ្សេងទៀតជាមួយនឹងក្រវិលមិនត្រឹមអាចធ្វើឱ្យសាច់នៅជុំវិញរន្ធត្រចៀកហែកអាចបង្កឱ្យមានការឆ្លងមេរោគទេ ថែមទាំងបង្កឱ្យមានការឈឺចាប់ខ្លាំងទៀត។
ដូច្នេះ ប៉ាម៉ាក់ត្រូវប្រាប់អូនតូចឱ្យប្រយ័ត្នដោយត្រូវពាក់ ឬដោះអាវថ្នមៗ និងយឺតៗ ហើយចៀសវាងពាក់អាវដែលមានកតូចពេកដែលធ្វើឱ្យពិបាកពាក់ ឬដោះចេញ។
ម្យ៉ាងទៀត ប៉ាម៉ាក់គួរប្រាប់អូនតូចឱ្យទាញសក់ចេញពីត្រចៀក ហើយពេលសិតសក់ ឬកក់សក់ត្រូវប្រយ័ត្នកុំឱ្យសក់ទាក់ត្រចៀក។
[embed-health-tool-baby-poop-tool]
៣. កុំដោះក្រវិលចេញ
ទោះជាក្រោយចោះត្រចៀកហើយ អូនតូចមានការឈឺចាប់ ឬមានអាការៈមិនស្រួលនៅត្រចៀកក៏ដោយ ម៉ាក់ប៉ាចៀងវាងដោះក្រវិលចេញមុនពេលត្រចៀកអូនតូចជាសះស្បើយដែលជាទូទៅមានរយៈពេលពី ៤ ទៅ ៦ សប្តាហ៍ ព្រោះការដោះក្រវិលចេញអាចបង្កឱ្យមានការឆ្លងមេរោគ និងជំរុញល្បឿននៃការជាសះស្បើយដែលធ្វើឱ្យរន្ធត្រចៀកបិទជិតវិញ។
៤. ចៀសវាងឱ្យអូនតូចហែលទឹក
ការហែលទឹកក្នុងអាង ទន្លេ ឬសមុទ្រមុនពេលត្រចៀកមិនទាន់ជាសះស្បើយអាចបណ្តាលឱ្យរន្ធត្រចៀកឆ្លងមេរោគ ប៉ះពាល់នឹងសារធាតុគីមី ឬជាតិពុលនៅក្នុងទឹកអាង ទន្លេ ឬសមុទ្រ ប៉ុន្តែម៉ាក់ប៉ាអាចឱ្យអូនតូចងូតទឹកស្អាត និងកក់សក់ដូចធម្មតាបាន។
ចង់គណនាថ្ងៃមេជីវិតញីទុំធ្លាក់ ចុចទីនេះ!
ចង់គណនាថ្ងៃសម្រាលកូន ចុចទីនេះ!
ចង់គណនាទម្ងន់ស្រ្តីពពោះ ចុចទីនេះ!
ចង់ដឹងអត្ថន័យពណ៌ និងរូបរាងលាមកទារក ចុចទីនេះ!
៥. សម្អាតត្រចៀក និងក្រវិលកូនជាមួយទឹកអំបិល
ម៉ាក់ប៉ាអាចលាយអំបិលមួយភាគបួនស្លាបព្រាកាហ្វេជាមួយទឹកក្តៅឧណ្ហៗមួយពែង រួចយកកំប្រេស ឬសំឡីមកជ្រលក់ទឹកអំបិល ហើយសម្អាតត្រចៀក និងក្រវិលអូនតូច។ បន្ទាប់មកសម្អាតត្រចៀក និងក្រវិលអូនតូចជាមួយទឹកស្អាតឱ្យបានស្អាតល្អ កុំឱ្យនៅជាប់ជាតិអំបិល រួចជូតឱ្យស្ងួត។
ការសម្អាតត្រចៀក និងក្រវិលអូនតូចជាមួយទឹកអំបិលក្នុងអំឡុងពេល ២ ទៅ ៣ សប្តាហ៍បន្ទាប់ពីចោះត្រចៀករួចអាចការពារការឆ្លងមេរោគ បង្កើនចលនាឈាមរត់ ការពាររន្ធត្រចៀកកុំឱ្យឡើងដុំពក និងជំរុញល្បឿននៃការជាសះស្បើយ។
៦. ចៀសវាងលាបប្រេងកូឡា ឬគ្រីមនៅរន្ធត្រចៀក
ការលាបប្រេងកូឡា ឬគ្រីមការពារឆ្លងមេរោគនៅរន្ធត្រចៀកដែលទើបចោះហើយអាចបិទរន្ធត្រចៀក កាត់បន្ថយរំហូរខ្យល់ចេញចូលរន្ធត្រចៀក និងពន្យឺតល្បឿនជាសះស្បើយ។
លើសពីនេះ ការលាបប្រេងកូឡា ឬគ្រីមការពារឆ្លងមេរោគនៅរន្ធត្រចៀកអូនតូចអាចបណ្តាលឱ្យរន្ធត្រចៀកអូនតូចជាប់ធូលី មេរោគ និងភាគល្អិតក្នុងខ្យល់ផ្សេងទៀត ដែលអាចបង្កឱ្យមានការឆ្លងមេរោគ។
៧. កុំកិបគូទក្រវិលតឹងពេក
ម៉ាក់ប៉ាគួរពិនិត្យគូទក្រវិលរបស់អូនតូច កុំឱ្យកិបត្រចៀកអូនតូចតឹងពេក ព្រោះអាចបណ្តាលឱ្យចរន្តឈាមរត់មិនបានល្អ និងកាត់បន្ថយរំហូរខ្យល់ទៅកាន់រន្ធត្រចៀកដែលអាចបណ្តាលឱ្យមានការឈឺចាប់ និងឆ្លងមេរោគ។
៨. ដោះក្រវិលចេញពេលយប់បន្ទាប់ពី ៦ សប្តាហ៍
បន្ទាប់ពីចោះត្រចៀកបាន ៦សប្តាហ៍ នៅពេលដែលត្រចៀកអូនតូចជាសះស្បើយ ប៉ាម៉ាក់អាចដោះក្រវិលរបស់អូនតូចចេញនៅពេលយប់ មុនពេលចូលគេងដើម្បីឱ្យរន្ធត្រចៀកមានខ្យល់ចូលចេញ និងការពារការឆ្លងមេរោគ។ លុះពេលព្រឹកឡើងម៉ាក់ប៉ាអាចពាក់ក្រវិលឱ្យអូនតូចវិញដើម្បីការពាររន្ធត្រចៀកពីការបិទជិតវិញ។
បន្ទាប់ពីចោះត្រចៀកហើយ ម៉ាក់ប៉ាមិនគួរសម្អាតរន្ធត្រចៀកអូនតូចជាមួយទឹកអុកស៊ីសែន (អ៊ីដ្រូសែនពែអុកស៊ីត) ឬអាល់កុលទេ ព្រោះសារធាតុទាំងនេះអាចបណ្តាលឱ្យស្បែកត្រចៀកអូនតូចស្ងួត និងរលាក។ ម្យ៉ាងទៀត ប៉ាម៉ាក់គួរជូតត្រចៀក រន្ធត្រចៀក និងក្រវិលរបស់អូនតូចឱ្យស្ងួត កុំឱ្យនៅសើមដើម្បីចៀសវាងការឡើងខ្ទុះ។ លើសពីនេះទៅទៀត មុនប៉ះត្រចៀកអូនតូច ម៉ាក់ប៉ាត្រូវលាងសម្អាតដៃឱ្យស្អាតសិនចៀសវាងចម្លងមេរោគដល់ត្រចៀកអូនតូច។
អត្ថបទគួរអាន៖
- អាមេរិក បង្កើត App ទូរស័ព្ទ ពិនិត្យបញ្ហាត្រចៀកក្មេងៗ
- Otoplasty In Children (វះកាត់កែត្រចៀករីកធំលើកុមារ)
- កូនតូចគួរត្បារយកអាចម៍ត្រចៀកចេញអត់ ហេតុអី?
- តិចនិកយកអាចម៍ត្រចៀកក្មេងត្រឹមត្រូវ កុំឲ្យមានរបួស
- យករបស់ទាំងនេះត្បារអាចម៍ត្រចៀក ប្រៀបបានយកមេរោគទៅដាក់ត្រចៀក
- ម៉ាក់ប៉ាមានទម្លាប់បែបនេះ ទើបកូនកើតអំបៅអំបែក
ចំណុចសំខាន់
- ប៉ាម៉ាក់ចៀសវាងបង្វិល ឬផ្លាស់ប្តូរក្រវិលថ្មីព្រោះអាចបណ្តាលឱ្យអូនតូចមានការឈឺចាប់ និងឆ្លងមេរោគ
- ប៉ាម៉ាក់ចៀសវាងមានអ្វីទាក់ក្រវិលអូនតូចដែលបង្កឱ្យសាច់នៅជុំវិញរន្ធត្រចៀកហែក និងការឆ្លងមេរោគ
- ប៉ាម៉ាក់ចៀសវាងដោះក្រវិលចេញមុនរន្ធត្រចៀកជាសះស្បើយ ព្រោះអាចធ្វើរន្ធត្រចៀកបិទជិតវិញ
- ប៉ាម៉ាក់គួរសម្អាតត្រចៀក និងក្រវិលអូនតូចជាមួយទឹកអំបិលដើម្បីជំរុញល្បឿនជាសះស្បើយ
- ប៉ាម៉ាក់គួរចៀសវាងលាបប្រេងកូឡា ឬគ្រីមនៅរន្ធត្រចៀកអូនតូច ព្រោះអាចអាចបណ្តាលឱ្យរន្ធត្រចៀកអូនតូចជាប់ធូលី មេរោគ និងភាគល្អិតក្នុងខ្យល់ផ្សេងទៀត ដែលអាចបង្កឱ្យមានការឆ្លងមេរោគ
- ប៉ាម៉ាក់ចៀសវាងកិបគូទក្រវិលតឹងពេក ព្រោះអាចបណ្តាលឱ្យអូនតូចមានការឈឺចាប់ និងឆ្លងមេរោគ
- ប៉ាម៉ាក់គួរចៀសវាងឱ្យអូនតូចហែលទឹកមុនពេលរន្ធត្រចៀកជាសះស្បើយ ដើម្បីការពារឆ្លងមេរោគពីក្នុងអាងទឹក ទន្លេ ឬសមុទ្រ
- បា៉ម៉ាក់គួរដោះក្រវិលអូនតូចចេញពេលយប់បន្ទាប់រន្ធត្រចៀកជាសះស្បើយ ដើម្បីរន្ធត្រចៀកមានខ្យល់ចូលចេញ និងការពារការឆ្លងមេរោគ
