ចេះតិចនិកនេះ ការពារកូនមិនឲ្យកើតចែងថ្ងៃលើស្បែក

ចែងថ្ងៃងាយកើតលើទារក និងកុមារតូចៗណាស់ដែលធ្វើឱ្យស្បែក​អាអូន​​ឡើងកន្ទួលក្រហមតូចៗ ហើយរមាស់។ តើចែងថ្ងៃបណ្តាលមកពីអ្វី? ម៉ាក់ប៉ាគួរថែទាំអាអូនបែបណាកុំឱ្យអាអូនឡើងចែងថ្ងៃ?

ជាទូទៅចែងថ្ងៃកើតនៅពេលអាកាសធាតុក្តៅ ហើយសើម​ ដែលធ្វើ​ឲ្យ​ក្រពេញ ឬរន្ធញើសស្ទះ នាំឱ្យញើសជាប់ក្រោមស្បែក​មិនអាចបញ្ចេញមកក្រៅបាន និងបង្កឱ្យស្បែក​ឡើង​កន្ទួលក្រហមតូចៗ មានពងទឹក រលាក និងរមាស់។

ម៉ាក់ប៉ាអាចការពារអាអូនពីការឡើងចែងថ្ងៃដោយ៖

១. ស្លៀកសម្លៀកបំពាក់រលុងៗ និងរលោងៗឱ្យអាអូន

ការស្លៀកសំលៀកបំពាក់ចង្អៀត ឬតឹងៗអាចបណ្តាលឱ្យស្បែកអាអូន​រលាកដោយសារសំលៀក​បំពាក់​កកិតនឹងស្បែក។ ដូច្នេះ ម៉ាក់ប៉ាគួរស្លៀក​សម្លៀកបំពាក់រលុងៗ រលោង ទន់ និងស្រាល​ ព្រោះថាសម្លៀកបំពាក់បែបនេះល្អចំពោះស្បែក ហើយអាចជួយការពារស្បែក​អាអូន​ពី​ការ​រលាក និងបែកញើសច្រើនដែលបណ្តាលឱ្យឡើងចែងថ្ងៃ ជាពិសេស​សម្លៀកបំពាក់​ដែល​ធ្វើ​ពី​កប្បាស។

២. ចៀសវាងស្លៀកពាក់ឱ្យអាអូនច្រើនជាន់

នៅខែក្តៅ ម៉ាក់ប៉ាគួរចៀសវាងពាក់ខោអាវឱ្យកូនច្រើនជាន់ ជាពិសេសទារក ព្រោះការពាក់​សម្លៀក​បំពាក់​ច្រើនជាន់អាចធ្វើឱ្យអាអូនស្អុះ និងបែកញើសច្រើន ហើយបង្កឱ្យស្ទះរន្ធ ឬក្រពេញញើស នាំ​ឲ្យកើត​ចែង​ថ្ងៃ​ដែរ​។

៣. ជូតស្បែកអាអូនឱ្យស្ងួតបន្ទាប់ពីងូតទឹករួច

ពេលអាកាសធាតុក្តៅ ម៉ាក់ប៉ាគួរចៀសវាងងូតទឹកក្តៅឧណ្ហៗឱ្យអាអូន ហើយគួរប្រើសាប៊ូដែល​មិន​ធ្វើឱ្យស្បែកប្រតិកម្ម ឬស្ងួត។ លើសពីនេះទៅទៀត បន្ទាប់ពីងូតទឹករួច ម៉ាក់ប៉ា​គួរ​ជូត​ខ្លូនអាអូនឱ្យស្ងួត ព្រោះអាកាសធាតុក្តៅ​បូកផ្សំនឹងសំណើមលើស្បែក​អាច​បណ្តាល​​ឱ្យស្បែក​អាអូនរលាក និងស្ទះរន្ធញើសដែលបង្កឱ្យឡើងចែងថ្ងៃ។

ចង់គណនាថ្ងៃសម្រាលកូន ចុចទីនេះ!

ចង់គណនាទម្ងន់ស្រ្តីពពោះ ចុចទីនេះ!

ចង់គណនាថ្ងៃមេជីវិតញីទុំធ្លាក់ ចុចទីនេះ!

ចង់ដឹងអត្ថន័យពណ៌ និងរូបរាងលាមកទារក ចុចទីនេះ!

៤. ចៀសវាងឱ្យអាអូនត្រូវកម្តៅថ្ងៃ

អាកាសធាតុក្តៅបូកនឹងកម្តៅព្រះអាទិត្យទៀតអាចបណ្តាលឱ្យអាអូនបែកញើសច្រើន និងងាយ​ឡើង​ចែងថ្ងៃណាស់។ ដូច្នេះ​ ម៉ាក់ប៉ាគួរ​ចៀសវាង​ឱ្យអាអូនលេងក្រៅផ្ទះ ឬដើរក្រោមកម្តៅថ្ងៃ។ ម៉ាក់ប៉ា​គួរ​ឱ្យ​អាអូន​លេង ឬនៅក្នុងម្លប់ដើម្បីកាត់បន្ថយការបែក​ញើស។

៥. ឱ្យកូនគេង ឬលេងកន្លែងត្រជាក់

ម៉ាក់ប៉ាគួរឱ្យអាអូននៅកន្លែងដែលមានសីតុណ្ហភាពត្រជាក់ល្មម។ ម្យ៉ាងទៀត ម៉ាក់ប៉ាអាចបើកកង្ហារ ឬបង្អួចដើម្បីឱ្យមានខ្យល់ចេញចូលល្អដែលមិនបណ្តាលឱ្យអាអូនស្អុះ និងបែកញើស។

៦. ចៀសវាងលាបឡេមានសាច់ឡេក្រាស់ឱ្យអាអូន

ម៉ាក់ប៉ាគួរចៀសវាងលាបឡេ ឬគ្រីមផ្តល់សំណើមដែលមានសាច់ឡេ ឬ​គ្រីម​ក្រាស់ឱ្យអាអូនព្រោះ​អាចបណ្តាលឱ្យស្ទះរន្ធញើស ឬក្រពេញញើសរ​បស់​កូន ​ដែលនឹង​បង្កឱ្យ​កើតចែង​ថ្ងៃ ​ជាពិសេស​នៅរដូវក្តៅដែលជាពេលវេលាដែលអាអូនអាចបែកញើសច្រើន។

ចែងថ្ងៃកើតឡើងដោយសារការបែកញើសច្រើ​ន ហើយស្ទះរន្ធ​ញើស។ ដូច្នេះ ម៉ាក់ប៉ា​គួរ​ការពារ​អាអូនពីការបែកញើសច្រើន។

អត្ថបទគួរអាន៖

• ម៉ាក់​ៗ​ដឹង​អត់?​​ សារធាតុសៗជាប់ស្បែកទារកមានប្រយោជន៍​អ្វី​ខ្លះ​?
• ទារករលាកស្បែកមុខ ទៅជាគ្រើម ឡើងពណ៌ក្រហមៗ អាចមកពីបញ្ហាប៉ុន្មាននេះ
• ចង់​ឲ្យ​ស្បែក​អា​អូន​​ទន់រលោង មិនងាកៗប្រតិកម្ម តិចនិក​ប៉ុន្មាន​ចំណុច​​នេះ​អាច​ជួយ​ម៉ាក់​ប៉ា​បាន
• ទារក​ទើប​កើត​របក​ស្បែក​បណ្ដាល​មក​ពី​អ្វី​? គួរ​បារម្ភ​អត់​?​​​​​​​​​​​​​​​​​​​​​​​​​​​​​​​​​​​​​​​​​​​​​​​​​​​​​​​​​​​​​​​​​​​​​​​​​​​​​​​​​​​​
• ទារកឡើងកន្ទួលលើស្បែក ប្រើថ្នាំលាបច្រើនអាចផ្ដល់ផលរំខានដល់កូន
• បេប៊ីទើបនឹងកើតមានស្បែកមុខស្ងួត ម៉ាក់ៗគួរធ្វើបែបណា?