ជំងឺស្លេកស្លាំងអាចកើតលើកុមារដែលបណ្ដាលមកពីខ្វះជាតិដែកហើយបណ្តាលឱ្យកុមារស្លេកស្លាំង។ ម៉េចបានជាខ្វះជាតិដែកបង្កឱ្យកុមារស្លេកស្លាំង? ហើយជំងឺនេះបង្កផលវិបាកសុខភាពអ្វីខ្លះដល់កុមារ? ម៉ាក់ប៉ាគួរការពារកូនពីការខ្វះជាតិដែកដោយរបៀបណា?

លោកវេជ្ជបណ្ឌិត ទ្រី លីធាង ឯកទេសរោគកុមារ និងជំងឺឈាមលើកុមារនៅមន្ទីរពេទ្យកុមារជាតិបានឱ្យដឹងថា ជាតិដែកជាសារធាតុរ៉ែដែលមានមុខងារក្នុងការចូលរួមសំយោគ DNA នៅក្នុងកោសិកា និងជាសារធាតុផ្សំមួយយ៉ាងសំខាន់របស់ហ៊ីម (Heme) ដែលមាននៅក្នុងម៉ូលេគុលហេម៉ូក្លូប៊ីន (Hemoglobin) របស់គ្រាប់ឈាមក្រហម។

ដូច្នេះហើយនៅពេលខ្វះជាតិដែក ការផលិតហ៊ីមនៅក្នុងគ្រាប់ឈាមក្រហមមិនបានល្អ ទើបបង្កឱ្យទៅជាខ្វះគ្រាប់ឈាមក្រហម ហើយស្តែងជាភាពស្លេកស្លាំង។

១. រោគសញ្ញាស្លេកស្លាំងដោយសារខ្វះជាតិដែកលើកុមារ

កុមារដែលស្លេកស្លាំងដោយសារខ្វះជាតិដែកអាចមានរោគសញ្ញាដូចជា៖

ស្លេកស្លាំងជាងក្មេងធម្មតា
ចង្វាក់បេះដូងដើរញាប់ (ដកដង្ហើមញាប់)
ឆាប់អស់កម្លាំង ឬខ្សោយ
មិនសូវលូតលាស់
ក្រចកស្តើង និងងាយរបក
ឬអាចរើសញុំាចំណីប្លែកៗដូចជា ដី ធ្យូង ក្បឿង។ល។

លោកវេជ្ជបណ្ឌិត ទ្រី លីធាង ឯកទេសរោគកុមារ និងជំងឺឈាមលើកុមារនៅមន្ទីរពេទ្យកុមារជាតិ

ចង់គណនាថ្ងៃមេជីវិតញីទុំធ្លាក់ ចុចទីនេះ!

ចង់គណនាថ្ងៃសម្រាលកូន ចុចទីនេះ!

ចង់គណនាទម្ងន់ស្រ្តីពពោះ ចុចទីនេះ!

ចង់ដឹងអត្ថន័យពណ៌ និងរូបរាងលាមកទារក ចុចទីនេះ!

២. ផលប៉ះពាល់នៃជំងឺស្លេកស្លាំងដោយសារខ្វះជាតិដែកលើកុមារ

ក. លូតលាស់យឺត

គ្រាប់ឈាមក្រហមមានមុខងារដឹកនាំអុកស៊ីសែន និងសារធាតុចិញ្ចឹមទៅគ្រប់កោសិកា។ បើកុមារខ្វះជាតិដែក ការផលិតគ្រាប់ឈាមក្រហមក៏ថយចុះ។ ដូច្នេះការដឹកនាំអុកស៊ីសែន និងសារធាតុចិញ្ចឹមទៅគ្រប់កោសិកាក៏អត់ល្អដែលជាហេតុធ្វើឱ្យកុមារខ្វះសារធាតុចិញ្ចឹម និងលូតលាស់យឺត។

ខ. ខ្សោយបេះដូង

បេះដូងមាននាទីច្រចាច់ឈាមដើម្បីនាំយកសារធាតុចិញ្ចឹម និងអុកស៊ីសែនទៅឱ្យកោសិកា។ នៅពេលកុមារស្លេកស្លាំងខ្លាំងដោយសារខ្វះជាតិដែក មានន័យថាការផលិតគ្រាប់ឈាមមានការថយចុះ។ ពេលនោះបេះដូងត្រូវខំធ្វើការច្របាច់ឈាមជាងធម្មតា ហើយយូរៗទៅសាច់ដុំបេះដូងដែលខំប្រឹងច្របាច់ឈាមបន្ថែមនឹងចុះខ្សោយ។

គ. បាក់ទឹកចិត្ត

ខួរក្បាលត្រូវការជាតិដែកដើម្បីផលិតអ័រម៉ូនដូប៉ាមីន( dopamine) ដែលធ្វើឱ្យយើងរីករាយ។ កាលណារាងកាយកូនខ្វះជាតិដែក ខួរក្បាលផលិតអ័រម៉ូនដូប៉ាមីនតិច ឬមិនផលិតដែលបណ្តាលឱ្យកូនមានបញ្ហាផ្លូវចិត្តដូចជា បាក់ទឹកចិត្ត ឬថប់បារម្ភដែលប៉ះពាល់ដល់ការអភិវឌ្ឍខួរក្បាល និងប្រាជ្ញាសា្មរតី។

៣. វិធីការពារ

ម៉ាក់ប៉ាអាចការពារ ឬកាត់បន្ថយកុំឱ្យកូនកើតជំងឺស្លេកស្លាំងដោយសារខ្វះជាតិដែកដោយ៖

– ម៉ាក់ៗពពោះ៖ ម៉ាក់ៗត្រូវការពារកូនពីការខ្វះជាតិដែកតាំងពីពេលម៉ាក់ៗពពោះម្ល៉េះ ព្រោះឈាមរបស់ម៉ាក់ៗក៏ដឹកនាំចូលទៅឈាមកូនដែរដើម្បីចិញ្ចឹមកូនឱ្យលូតលាស់។ ដូច្នេះ ម៉ាក់ៗត្រូវញុំាថ្នាំជាតិដែកឱ្យបានគ្រប់ចំនួនដើម្បីចៀសវាងឱ្យជាតិដែករបស់កូនក្នុងផ្ទៃមានគ្រប់គ្រាន់។

– ម៉ាក់ៗបំបៅដោះ៖ ម៉ាក់ៗត្រូវញុំាំចំណីអាហារដែលមានសារធាតុចិញ្ចឹម និងមានជាតិដែកគ្រប់គ្រាន់ដូចជា សាច់ក្រហម ថ្លើម បន្លែបៃតង សណ្តែក ទំពាំងបាយជូរក្រៀមជាដើមដើម្បីផ្តល់ជាតិដែកដល់កូនបានគ្រប់គ្រាន់តាមរយៈទឹកដោះ។

– កូនអាយុចាប់ពី ៦ ខែឡើង៖ ម៉ាក់ៗត្រូវឱ្យកូនញុំាបបរខាប់គ្រប់គ្រឿងដែលមានអង្ករ បន្លែបៃតង សាច់ ស៊ុត ល្ពៅជាដើមបន្ថែមពីលើការបំបៅដោះ ឬទឹកដោះគោម្សៅដើម្បីឱ្យកូនទទួលបានសារធាតុចិញ្ចឹម និងជាតិដែកគ្រប់គ្រាន់។

ជំងឺស្លេកស្លាំងដោយសារខ្វះជាតិដែកលើកុមារងាយការពារទេ ម៉ាក់ប៉ាគួរអនុវត្តតាមការណែនាំរបស់លោកវេជ្ជបណ្ឌិតដើម្បីការពារកូនពីការលូតលាស់រាងកាយ និងបញ្ញាស្មារតីយឺត។

អត្ថបទគួរអានៈ

ចំណុចសំខាន់

– ជំងឺស្លេកស្លាំងដោយសារខ្វះជាតិដែកបណ្តាលឱ្យកុមារ៖

លូតលាស់យឺត
ខ្សោយបេះដូង
បាក់ទឹកចិត្ត

– ម៉ាក់ប៉ាអាចការពារ ឬកាត់បន្ថយកុំឱ្យកូនកើតជំងឺស្លេកស្លាំងដោយសារខ្វះជាតិដែកដោយ៖

ម៉ាក់ៗពពោះត្រូវញុំាថ្នាំជាតិដែកឱ្យបានគ្រប់ចំនួន
ម៉ាក់ៗបំបៅដោះត្រូវញុំាំអាហារសម្បូរជាតិដែកដូចជា សាច់ក្រហម ថ្លើម បន្លែបៃតង សណ្តែក ទំពាំងបាយជូរក្រៀមជាដើម
កូនអាយុចាប់ពី ៦ ខែឡើងញុំាបបរខាប់គ្រប់គ្រឿង

កូនមានសភាពស្លេកស្លាំង ដោយសារកង្វះជាតិដែក អាចជាបញ្ហាមួយនេះ