លាមកក្មេងជុះមកមានច្រើនសណ្ឋាន និងច្រើនពណ៌ ហើយពណ៌នីមួយៗក៏អាចបញ្ជាក់ពីបញ្ហាសុខភាពរបស់គេដែរ។ លោកស្រី គុជ ឆោមដាលីន វេជ្ជបណ្ឌិតឯកទេសរោគកុមារ ដែលធ្លាប់បម្រើការងារនៅមន្ទីរពេទ្យកុមារអង្គរ នឹងរៀបរាប់ពីពណ៌លាមកទារក និងសញ្ញាគួរឲ្យបារម្ភ។
លោកស្រីវេជ្ជបណ្ឌិតដែលបច្ចុប្បន្នបម្រើការងារនៅមជ្ឈមណ្ឌលវេជ្ជសាស្ត្រសិង្ហបុរីរូបនេះ ថា លាមកក្មេងប្រែប្រួលពីក្មេងម្នាក់ទៅក្មេងម្នាក់ខុសៗគ្នា គឺមានពណ៌លឿង លឿងខ្ចី លឿងចាស់ ពណ៌ត្នោត ពណ៌បៃតងចាស់ ក្រហម ស ជាដើម ហើយម៉ាក់ប៉ាអាចសម្គាល់ថា កូនមានបញ្ហាសុខភាពទៅតាមពណ៌ និងសណ្ឋានរបស់លាមកបាន។
១- ពណ៌លាមកធម្មតា បញ្ជាក់ថាកូនមានសុខភាពល្អ
លាមកមានពណ៌លឿង លឿងខ្ចី លឿងចាស់ ពណ៌ត្នោត និងពណ៌បៃតងចាស់ (លាមកព្រៃ) បញ្ជាក់ថា ទារកមានសុខភាពល្អធម្មតា ម៉ាក់ប៉ាមិនចាំបាច់ព្រួយបារម្ភនោះទេ ហើយពណ៌ខុសគ្នានេះវាប្រែប្រួលទៅតាមរបបអាហារកូន។
២- លាមកពណ៌មិនធម្មតា បញ្ជាក់ថាកូនមានបញ្ហាសុខភាព
លាមកពណ៌ក្រហម (លាមកមានឈាម) លាមកពណ៌ខ្មៅ ហើយស្អុយខុសធម្មតា (មានឈាមហូរតាមប្រដាប់រំលាយអាហារ លាមកមានពណ៌ស (អាចស្ទះទឹកប្រមាត់ ឬអត់មានថង់ទឹកប្រមាត់)។ បើលាមកមានពណ៌ទាំង៣នេះ ម៉ាក់ប៉ាត្រូវប្រញាប់នាំកូនទៅជួបគ្រូពេទ្យ។
តារាងអត្ថន័យលាមករបស់កូនទៅតាមពណ៌ដែលគេបន្ទោរបង់
អត្ថបទពាក់ព័ន្ធ៖
- ចង់ដឹងថា កូនមានបញ្ហាសុខភាពអត់ សង្កេតមើលពណ៌លាមកទាំងនេះ
- ប្រភេទអាហារធ្វើឲ្យកូនតូចញ៉ាំទៅទល់លាមក និងវិធីដោះស្រាយ
- តិចនិកងាយៗ ជួយកូនបៅរួច កុំឲ្យក្អែរចេញមកវិញ
លោកស្រីវេជ្ជបណ្ឌិតក៏បានបញ្ជាក់ថា ចំនួននៃការជុះរបស់ក្មេងខុសគ្នាពីក្មេងម្នាក់ទៅម្នាក់ ទោះក្មេងជុះច្រើនដង ឬតិចដងខុសធម្មតា តែមិនមានសញ្ញាអ្វីត្រូវបារម្ភទេនោះ មិនចោទជាបញ្ហាឡើយ។ រីឯសញ្ញាដែលត្រូវបារម្ភខ្លាចកូនរលាកពោះវៀន ឬស្ទះពោះវៀន គឺលាមកកូនជុះមករាវ មានឈាម មានលាយសំបោរ រួមនឹងអាការៈហើមពោះ ក្អួត ក្តៅខ្លួន ជាដើម។
រឿងដែលម៉ាក់ប៉ាគួរកត់ចំណាំនោះ គឺក្មេងបៅដោះម្តាយ ជុះញឹកញាប់ជាងក្មេងបៅទឹកដោះគោ ក្មេងនៅតូច ជុះច្រើនជាងក្មេងធំ។
គួរស្វែងយល់បន្ថែមពី
- កូនអាយុក្រោម ៦ ខែ ឲ្យញ៉ាំទឹកក្រូចច្របាច់ពេលទល់លាមកបានអត់?
- ៣ ក្បាច់នេះអាចជួយកូនតូចទល់លាមកបានយ៉ាងល្អ
- លាមកកូនប្រែប្រួលក្រោយដូរឲ្យបៅទឹកដោះគោម្សៅ គួរឲ្យបារម្ភអត់?
- កូនតូចយំពេលជុះម្ដងៗ អាចមកពីមូលហេតុទាំងនេះ
- ហេតុអ្វីទារកជុះមានឈាម? គួរដោះស្រាយបែបណា?
[embed-health-tool-vaccination-tool]
