ទារកកើតមិនគ្រប់ខែ អាចបណ្ដាលមកពីទាំងកត្តាដូចជាម្ដាយក្មេងពេក ចាស់ពេក ម៉ាក់ៗមិនប្រយ័ត្ន ឬបែកទឹកភ្លោះមុនពេលសម្រាលជាដើម។ បើទារកកើតមកមិនគ្រប់ខែ អាអូនអាចជួបនឹងបញ្ហាសុខភាពច្រើនជាងទារកធម្មតា ទាមទារការថែទាំពិសេស។
ផលប៉ះពាល់ ពេលទារកកើតមិនគ្រប់ខែ
ជុំវិញបញ្ហានេះ លោកវេជ្ជបណ្ឌិត ឃួន សុវណ្ណារិទ្ធ ឯកទេសផ្នែកសម្ភព និងរោគស្ត្រីបានពន្យល់ឲ្យដឹងថា កាលណាទារកកើតមិនគ្រប់ខែ ទារកនឹងប្រឈមបញ្ហាដំណកដង្ហើម ព្រោះសួតមិនទាន់ទុំល្អ តួនាទីសួត ដំណើរការស្រូបអុកស៊ីសែន និងបញ្ចេញឧស្ម័នកាបូនិចមិនល្អ។ លើសពីនេះ ទារកងាយនឹងឆ្លងមេរោគផ្សេងៗ ព្រោះប្រព័ន្ធភាពស៊ាំនៅខ្សោយ ហើយទារកក៏ប្រឈមនឹងបញ្ហាហូរឈាមក្នុងខួរក្បាល ធ្វើឲ្យមានអត្រាស្លាប់ជុំវិញកំណើតខ្ពស់។
វិធីបង្ការទារកកើតមិនគ្រប់ខែ
ដើម្បីការពារសុខភាពកូន ម៉ាក់ៗពពោះគួរតែដឹង និងអនុវត្តតិចនិកថែរក្សាខ្លួនឲ្យបានត្រឹមត្រូវតាមការណែនាំរបស់វេជ្ជបណ្ឌិតឯកទេសសម្ភព និងរោគស្ត្រី ដូចជា៖
- ពិនិត្យសុខភាពតាមការកំណត់អំឡុងពេលពពោះ
- បើអំឡុងពេលពពោះ ម៉ាក់ៗមានជំងឺប្រចាំកាយ ត្រូវតែជួបពិគ្រោះជាមួយគ្រូពេទ្យ
- រកមូលហេតុ និងព្យាបាលជំងឺពាក់ព័ន្ធ រោគស្ត្រីផ្សេងៗ ឲ្យបានជាសះស្បើយ ដែលជាមូលហេតុបង្កឲ្យទារកកើតមិនគ្រប់ខែ
- មានរបបអាហារត្រឹមត្រូវ បរិភោគអាហារសម្បូរជីវជាតិ សម្បូរប្រូតេអ៊ីន បន្លែផ្លែឈើ ញ៉ាំទឹកដោះគោ ១-២កែវ/ថ្ងៃ
- ទទួលជាតិដែកឲ្យបានត្រឹមត្រូវតាមវេជ្ជបញ្ជា
- បញ្ចុះគីឡូបើម្ដាយធាត់ពេក ព្រោះអាចប្រឈមនឹងជំងឺទឹកនោមផ្អែមអំឡុងពេលពពោះ
- សម្រាក និងថែទាំសុខភាពឲ្យបានល្អ ចៀសវាងធ្វើការងារហួសកម្លាំង
[embed-health-tool-baby-poop-tool]
លោកវេជ្ជបណ្ឌិតបានណែនាំបន្ថែមថា ក្នុងករណីដែលម៉ាក់ៗមានរោគសញ្ញាសង្ស័យដូចជា ធ្លាក់ឈាម ក្ដៅខ្លួនខ្លាំង ចុកពោះ ម៉ាក់ៗត្រូវទៅពិនិត្យជាមួយគ្រូពេទ្យឲ្យបានឆាប់ ព្រោះវាអាចជាសញ្ញាទារកកើតមិនគ្រប់ខែ មិនអាចបន្លាយយូរឡើយ។
អត្ថបទគួរអាន៖
- ក្រោយសម្រាលកូន បើនៅមានបញ្ហាទាំងនេះ កុំទាន់រួមដំណេក
- ស្បែកយារធ្លាក់ក្រោយសម្រាល សាកអនុវត្តតិចនិក ៥ នេះ
- ក្រោយសម្រាលកូនដើមទ្រូងឡើងសរសៃខៀវខ្វាត់ខ្វែង ធ្វើម៉េចទើបបាត់វិញ?
- ហេតុអ្វីក្រោយសម្រាលកូន ពេទ្យឲ្យម៉ាក់ៗលេបថ្នាំទម្លាក់សត្វល្អិត?
- ហេតុអីសម្រាលកូនរួច វដ្តរដូវម៉ាក់ៗមិនទៀងដូចមុន?
- សម្រាលកូនរួច ពេលណាម៉ាក់ៗអាចងូតទឹកបាន?
