១. ត្រូវត្រៀមលក្ខណៈ
ពេលកូនឈឺយើងត្រូវត្រៀមលក្ខណៈជាមុន និងត្រូវដឹងពីចំណង់ចំណូលចិត្តរបស់កូន តើកូនចូលចិត្តញ៉ាំថ្នាំប្រភេទម្សៅ ឬក៏ប្រភេទទឹក? ចូលចិត្តរសជាតិបែបណា? នៅពេលទៅពេទ្យយើងអាចសួររកប្រភេទថ្នាំដែលកូនចូលចិត្ត នោះទើបមិនពិបាកបញ្ចុកថ្នាំកូន។
២. ត្រូវចេះសម្រួលអារម្មណ៍
ពេលបញ្ចុកថ្នាំកូនត្រូវសម្រួលអារម្មណ៍ទាំងម្តាយទាំងកូន មិនត្រូវភ័យស្លន់ស្លោនោះទេ បើយើងភ័យធ្វើឲ្យកូនមានអារម្មណ៍ភ័យខ្លាចដូចគ្នា។ យើងមិនត្រូវចាត់ទុកការបញ្ចុកថ្នាំកូនជាកិច្ចការដ៏លំបាក ញ៉ាំទៅកូនឈ្លក់ ញ៉ាំទៅក្អួតចេញមកវិញនោះទេ ត្រូវសម្រួលអារម្មណ៍ បញ្ចុកថ្នាំកូនដោយសន្សឹមៗ។
ក្មេងដូចយើងមនុស្សចាស់ដែរ មិនចូលចិត្តបង្ខំទេ រឹតតែមិនចូលចិត្តឲ្យយើងចាប់បញ្ច្រកថ្នាំ ផ្ទុយទៅវិញក្មេងចូលចិត្តលេង ហើយចូលចិត្តអ្វីដែលសាមញ្ញៗ។ អ៊ីចឹងហើយយើងត្រូវនិយាយពាក្យផ្អែមល្ហែមទៅកូន ចៀសវាងការចាប់បង្ខំ ដូចជាចាប់ក្បាល ចាប់ច្របាច់ច្រមុះ ឬមាត់កូន។