ពេលយើងមានអាការៈឈឺក្បាលកាន់តែអាក្រក់ និងនៅបន្តឈឺជាប់មិនបាត់ទៅណា នោះជាពេលមួយដែលអាចចាប់ផ្ដើមគិតថាវាជារោគសញ្ញាគ្រោះថ្នាក់ឬយ៉ាងណា ឬអាចជាដុំសាច់ខួរក្បាល? អាការៈឈឺក្បាលជាប់ជាប្រចាំគឺជារោគសញ្ញាមួយនៃដុំសាច់ក្នុងខួរក្បាល តែថាដុំសាច់ខួរក្បាលមិនមែនមានជារោគសញ្ញាតែមួយមុខនោះទេ។
ឈឺក្បាលខ្លាំងព្រឹកៗ អាចជារោគសញ្ញាមួយនៃដុំសាច់ខួរក្បាល
ត្រួតពិនិត្យដោយ វេជ្ជ. ចាន់ ស៊ីណេត · មន្ទីរពេទ្យបង្អែកមិត្តភាពកម្ពុជា-ចិន សែនសុខ
បញ្ហាដុំសាច់ខួរក្បាលនៅមានរោគសញ្ញាផ្សេងៗមួយចំនួនទៀត ក្រៅពីអាការៈឈឺក្បាល។ ដុំសាច់ក្នុងខួរក្បាលអាចជាដុំសាច់មិនបង្កមហារីក ឬដុំសាច់បង្កមហារីក។ រោគសញ្ញានៃបញ្ហាដុំសាច់ទាំងពីរប្រភេទនេះ មានលក្ខណៈប្រហាក់ប្រហែលគ្នា។ រោគសញ្ញាអាចលេចចេញនៅពេលដែលផ្នែកខ្លះនៃខួរក្បាលពិបាកដំណើរការនៅត្រង់កន្លែងមានដុំសាច់ ឬការកើនឡើងសម្ពាធក្នុងខួរក្បាល ដែលបានសង្កត់ទៅលើទីតាំងនៅជុំវិញខួរក្បាល។ ឧទាហរណ៍ថាដុំសាច់មាននៅខួរក្បាលប៉ះផ្នែកដំណើរការគំហើញ វានាំឲ្យគំហើញមានបញ្ហា។
១. ប្រកាច់
អាការៈប្រកាច់ច្រើនជារោគសញ្ញាដំបូងដែលអ្នកមានបញ្ហាដុំសាច់ក្នុងខួរក្បាលជួបប្រទះ មិនមែនជាអាការៈឈឺក្បាល ដូចមនុស្សមួយចំនួនគិតនោះទេ។ មនុស្សរហូតដល់១ភាគ៣ ត្រូវបានគេរាយការណ៍ថាមានអាការៈប្រកាច់ មុនពេលរកឃើញថាមានដុំសាច់ក្នុងខួរក្បាល។
២. ឈឺក្បាល
មនុស្សប្រហែលជាពាក់កណ្ដាលដែលមានបញ្ហាដុំសាច់ក្នុងខួរក្បាល ជួបបញ្ហាឈឺក្បាល។ បញ្ហាឈឺក្បាលដោយសារដុំសាច់ក្នុងខួរក្បាល ច្រើនកើតឡើង និងធ្វើឲ្យឈឺខ្លាំងនៅពេលព្រឹក ហើយអាចប្រសើរឡើងវិញនៅពេលថ្ងៃបន្តិច។ អាការៈឈឺក្បាលបែបនេះ អាចកើតមានពេញទាំងក្បាល ឬក៏ឈឺខ្លាំងនៅតែមួយចំហៀងក្បាល។ អាការៈឈឺក្បាលនេះ ទៀតសោតនឹងកាន់តែឈឺខ្លាំងពេលយើងធ្វើសកម្មភាពរាងកាយ ពេលកណ្ដាស់ ក្អក ឱនចុះឡើង ឬពេលប្រឹងបត់ជើងធំ។
៣. ក្អួត
អាការៈ ក្អួត ឬចង្អោរ ពិសេសកើតឡើងនៅពេលព្រឹក ក៏ជារោគសញ្ញាមួយនៃដុំសាច់ក្នុងខួរក្បាលដែរ។ អាការៈក្អួតនេះ អាចកើតឡើងនៅពេលព្រឹក មុនក្រោកពីដំណេកពេលយើងបែរខ្លួនចុះឡើង ធ្វើឲ្យយើងមានអារម្មណ៍ចង់ក្អួត។
៤. ការចងចាំធ្លាក់ចុះ
ដុំសាច់ក្នុងខួរក្បាលអាចធ្វើឲ្យយើងមានកាភ្លេចភ្លាំងខ្លះៗ ឬធ្លាក់ចុះការផ្ទង់អារម្មណ៍ជាដើម។ អ្នកខ្លះធ្លាប់តែពូកែបើកបររថយន្ត តែពេលមានបញ្ហាដុំសាច់ក្នុងខួរក្បាលអាចធ្វើឲ្យអារម្មណ៍ប្រែប្រួលខ្លះពេលបើកបរ និងអាចបង្កជាគ្រោះថ្នាក់ចរាចរណ៍។
មួយវិញទៀត ដូចជាអ្នកធ្លាប់តែពូកែដោះស្រាយលំហាត់គណិតវិទ្យា ឬលេងអុក តែបែរជាភាន់ភាំងពេលត្រូវដោះស្រាយលំហាត់ ឬលេងអុក ជាដើម។
៥. បាត់បង់ស្មារតី
ពេលមានសម្ពាធក្នុងខួរក្បាលឡើងខ្លាំង វាធ្វើមានសម្ពាធខ្លាំងលើខួរក្បាលដែរ។ ការបាត់បង់ស្មារតី អាចកើតឡើងបានដោយហេតុផលមួយចំនួន។ អ្នកខ្លាំងអាចមានអារម្មណ៍អស់កម្លាំងខ្លាំង ដែលអាចឈានដល់បាត់បង់ស្មារតី ឬអ្នកខ្លះអាចបាត់បង់ស្មារតីភ្លាមៗតែម្ដង។ ការបាត់បង់ស្មារតីនេះអាស្រ័យលើមូលហេតុបង្ក ហើយការបាត់បង់ស្មារតីខ្លះអាចបង្កទៅជាការសន្លប់ក្នុងរយៈពេលយូរ។
៦. អារម្មណ៍ប្រែប្រួល
អ្នកមានបញ្ហាដុំសាច់ក្នុងខួរក្បាលខ្លះអាចជួបបញ្ហាអារម្មណ៍ប្រែប្រួលដែរ។ ដូចជាអ្នកខ្លះក៏ស្រាប់តែ មានអារម្មណ៍ផ្លូវភេទខ្លាំងភ្លាមៗ ឬនៅសុខៗសើចមិនត្រូវពេលជាដើម។
៧. បញ្ហាគំហើញ
បញ្ហាគំហើញ ឬស្ដាប់ អាចកើតមានដែរចំពោះអ្នកមានបញ្ហាដុំសាច់ក្នុងខួរក្បាល។ បញ្ហាគំហើញចំពោះអ្នកមានដុំសាច់ក្នុងខួរក្បាលមានដូចជាព្រិលភ្នែក មើលឃើញវត្ថុអ្វីមួយបែកជាពីរ ឬបាត់បង់គំហើញ។ ចំពោះបញ្ហាការស្ដាប់វិញ អាចបាត់បង់ការស្ដាប់ឮនៅត្រចៀកម្ខាង ឬឮសំឡេងងឺងៗនៅក្នុងត្រចៀក។
Hello Health Group និង “Hello គ្រូពេទ្យ” មិនចេញវេជ្ជបញ្ជា មិនធ្វើរោគវិនិច្ឆ័យ ឬព្យាបាលជូនទេ៕
ផ្សព្វផ្សាយពាណិជ្ជកម្មផ្សព្វផ្សាយពាណិជ្ជកម្មផ្សព្វផ្សាយពាណិជ្ជកម្មផ្សព្វផ្សាយពាណិជ្ជកម្ម