សារធាតុរាវចេញតាមចុងសុដន់ ភាគច្រើនមិនមែនជារោគសញ្ញាគ្រោះថ្នាក់ធ្ងន់ធ្ងរអ្វីនោះទេ ប៉ុន្តែពេលខ្លះជាការល្អ ដែលយើងគួរត្រូវទៅជួបពេទ្យ ព្រោះវាក៏ជារោគសញ្ញាមួយក្នុងចំណោមរោគសញ្ញាជាច្រើនទៀតរបស់ជំងឺមហារីកសុដន់ផងដែរ។
ស្រ្តីជាច្រើនតែងមានសារធាតុរាវចេញពីចុងសុដន់ ហើយវាអាចជារឿងធម្មតាប៉ុណ្ណោះ។ ប៉ុន្តែបើសម្រាប់ក្មេងតូចប្រុសឬស្រី ទើបកើតអាចជារឿងផ្សេង និងគួរឲ្យបារម្ភ។ ក្មេងទើបកើតអាចចេញសារធាតុរាវតាមចុងសុដន់ តែនឹងបាត់ទៅវិញនៅពីរបីសប្ដាហ៍បន្ទាប់ បើមិនបាត់ទៅវិញគួរនាំកូនទៅជួបគ្រូពេទ្យ។
ដូចគ្នាដែរ សម្រាប់មនុស្សប្រុសមានចេញសារធាតុរាវពីចុងសុដន់ក៏ជារឿងមិនធម្មតាដែរ។ គួរពិគ្រោះជាមួយគ្រូពេទ្យ។ សារធាតុរាវចេញពីចុងសុដន់អាចមានច្រើនពណ៌ និងពិបាកកំណត់ថាពណ៌ណាមានគ្រោះថ្នាក់ណាស់ដែរ។
១.ពេលណាគួរទៅជួបពេទ្យ?
បើសិនជាមានរោគសញ្ញាដូចខាងក្រោមនេះ គ្នាយើងដែលមានសារធាតុរាវចេញពីចុងសុដន់គួរទៅជួបពិភាក្សាជាមួយគ្រូពេទ្យ៖
កើតឡើងជាប្រចាំ មិនមែនកើតមានតែម្ដង ចេញសារធាតុរាវពីសុដន់តែម្ខាង មានលាយឈាម ឬក្លិន មានចេញសារធាតុរាវតាមចុងសុដន់សម្រាប់ស្រ្តីមិនបំបៅដោះកូន និងចេញដោយមិនមានការប្របាច់ អាយុលើសពី៥០ឆ្នាំ មានរោគសញ្ញាខ្លះទៀតដូចជា មានដុំ ឈឺ ឡើងក្រហម ឬហើមនៅលើសុដន់ ជាមនុស្សប្រុស និងចេញសារធាតុរាវពីចុងសុដន់ អ្វីដែលបានរៀបរាប់នេះ មិនប្រាកដថាបញ្ហាធ្ងន់ធ្ងរនោះទេ ប៉ុន្តែក៏នៅតែអាចមានឱកាសតិចតួចជាជំងឺមហារីកសុដន់។ ដូចនេះហើយដើម្បីដឹងច្បាស់ គួរតែពិភាក្សាជាមួយគ្រូពេទ្យដោយផ្ទាល់។
![មហារីកសុដន់](https://cdn.hellokrupet.com/wp-content/uploads/2021/05/2687747a--300x200.jpg)
២. អាចពិនិត្យបែបណា?
ពេលទៅដល់មន្ទីរពេទ្យដើម្បីប្រឹក្សារឿងនេះ គ្រូពេទ្យអាច៖
- ពិនិត្យសុដន់
- ស្កែនដោយប្រើ X-ray ឬឆ្លុះអេកូ
- ច្រឹបសាច់សុដន់ពិនិត្យ ដោយគ្រូពេទ្យអាចស៊កម្ជុលតូចមួយទៅក្នុងសុដន់ដើម្បីចាប់យកកោសិកាខ្លះមកធ្វើតេស្ត។
ការធ្វើតេស្តបែបនេះច្រើនធ្វើក្នុងថ្ងៃតែមួយ ហើយលទ្ធផលក៏អាចបង្ហាញក្នុងថ្ងៃតែមួយដែរ ប៉ុន្តែសម្រាប់ការច្រឹបសាច់ពិនិត្យ អាចស៊ីពេលយូរជាងនេះរហូតដល់មួយ ឬពីរសប្ដាហ៍។