កញ្ជ្រឹលជាជំងឺឆ្លង បង្កឡើងដោយវីរុស Rubeola ដែលជាវីរុសរស់នៅតាមភ្នាសសើមរបស់ចម្រុះ បំពង់ក ភាគច្រើនកើតលើក្មេងៗខ្វះអាហារូបត្ថម្ភ ក្មេងខ្វះវីតាមីន A ក្មេងដែលមិនបានចាក់ប៉ាក់សាំងការពារ។ ត្បិតតែជំងឺនេះឧស្សហ៍កើតលើក្មេងៗ តែក៏អាចកើតលើមនុស្សចាស់ដែរ ហើយបើស្ត្រីមានផ្ទៃពោះកើតកញ្ជ្រឹល នោះកូនកើតមកមានបញ្ហាធ្ងន់ធ្ងរ នេះបើតាមការបញ្ជាក់របស់លោកវេជ្ជបណ្ឌិត ចាន់ ស៊ីណេត ឯកទេសជំងឺទូទៅ។

១- រោគសញ្ញាជំងឺកញ្ជ្រឹល

– ក្តៅខ្លួនខ្លាំង

– អស់កម្លាំង

– មិនឃ្លានអាហារ

– ក្អក

– រាករូស

– ហៀរសំបោរ ហៀរទឹកភ្នែក

– ភ្នែកឡើងក្រហម

– ឈឺសាច់ដុំ

– ចេញស្នាមក្រហមក្នុងមាត់ និងលើស្បែក។

២- ផលប៉ះពាល់នៃការកើតជំងឺកញ្ជ្រឹលអំឡុងពពោះ

– រលូតកូន

– កូនកើតមិនគ្រប់ខែ

– កូនលូតលាស់យឺត

– កូនពិការបញ្ញា

– ថ្លង់

– រលាកសួត

– រលាកខួរក្បាល។

អត្ថបទពាក់ព័ន្ធ៖ មិនចង់គ្រោះថ្នាក់ដល់កូន ម៉ាក់ៗចៀសពីជំងឺ ៣ មុខនេះឲ្យបានអំឡុងពពោះ

៣- វិធីបង្ការជំងឺកញ្ជ្រឹល

ការចាក់វ៉ាក់សាំងការពារមានប្រសិទ្ធភាពបំផុត តែបើពុំបានចាក់វ៉ាក់សាំងការពារទេ យើងមិនត្រូវទៅក្បែអ្នកជំងឺកញ្ជ្រឹលឡើយ វីរុសកញ្ជ្រឹលអាចរស់នៅក្នុងខ្យល់ច្រើនម៉ោង និងងាយឆ្លងពីមនុស្សម្នាក់ទៅមនុស្សម្នាក់ទៀត តាមការកណ្តាស់ ក្អក និងប៉ះពាល់អ្នកជំងឺ។

ស្រ្ដីដែលត្រៀមយកកូនទាំងអស់គួរចៀសវាងកុំឲ្យកើតកញ្ជ្រឹល ត្រូវចាក់វ៉ាក់សាំងការពារមុនពេលមានមានផ្ទៃពោះ យ៉ាងហោចណាស់ ១ ខែ មុនពេលមានផ្ទៃពោះ។ តែក្នុងករណីម្តាយសង្ស័យថាកើតមានជំងឺកញ្ជ្រឹល ប្រញាប់ទៅគ្រូពេទ្យជាបន្ទាន់។

ក្នុងករណីមានសំណួរ ឬមន្ទិលសង្ស័យជុំវិញសុខភាពអ្នក ជម្រើសល្អបំផុត សូមពិគ្រោះ និងប្រឹក្សាយោបល់ផ្ទាល់ជាមួយពេទ្យជំនាញ។ Hello Health Group មិនចេញវេជ្ជបញ្ជា មិនធ្វើរោគវិនិច្ឆ័យ ឬព្យាបាលជូនទេ៕

កើតកញ្ជ្រឹលពេលពពោះ កូនកើតមកមានបញ្ហាធ្ងន់ធ្ងរ