អាការៈវិលមុខ ជាបញ្ហាទូទៅមួយ អាចកើតមានក្នុងអំឡុងពេលមានផ្ទៃពោះ ហើយអាចកើតមានឡើងគ្រប់ពេលបាន។ ទោះអាការៈនេះ ជាសញ្ញាធម្មតាក៏ពិតមែន ប៉ុន្តែពេលខ្លះអាចបង្កគ្រោះថ្នាក់ធ្ងន់ធ្ងរដល់យើងបាន ហេតុនេះស្រីៗកំពុងពពោះ គួរតែស្វែងយល់ឲ្យពីអាការៈនេះ។
ស្រីៗពពោះ ឧស្សាហ៍វិលមុខ ត្រូវដឹងរឿងទាំងនេះផង!
ត្រួតពិនិត្យដោយ គឹម កាណែល
១- មូលហេតុវិលមុខពេលពពោះ
នៅពេលមានផ្ទៃពោះ អ័រម៉ូនយើងនឹងប្រែប្រួល ហើយការផ្លាស់ប្តូរកម្រិតអ័រម៉ូន អាចធ្វើឲ្យមានការផ្លាស់ប្តូរទំហំសរសៃឈាមបាន ដោយវាធ្វើឲ្យសរសៃឈាមរីក ដើម្បីជំរុញលំហូរឈាមទៅកាន់កូនបានច្រើន ហើយលំហូរឈាមត្រឡប់មកវិញមានចំនួនតិច ឯសម្ពាធឈាម ក៏ទាបជាងធម្មតាដែរ ជាហេតុបណ្តាលឲ្យឈាមហូរចូលខួរក្បាលតិចតួច ធ្វើឲ្យយើងមានអាការៈវិលមុខនេះឯង។
អាការៈវិលមុខ ក៏អាចបណ្តាលមកពីមានការផ្លាស់ប្តូរប្រព័ន្ធសរសៃឈាមបេះដូងដូចគ្នា ដោយសារពេលបេះដូងច្របាច់ញាប់ អាចបណ្តាលឲ្យបរិមាណឈាមនៅក្នុងខ្លួនកើនឡើង។ មូលហេតុមួយទៀត មកពីកម្រិតជាតិស្ករក្នុងឈាមទាប ព្រោះតែរាងកាយយើង ត្រូវមានជាតិស្ករដើម្បីធ្វើមេតាបូលីសក្នុងខ្លួន។ អាការៈវិលមុខ ក៏អាចបណ្តាលមកពីការលូតលាស់របស់ស្បូនដែរ ព្រោះវាបានដាក់សម្ពាធលើសរសៃឈាមរបស់យើង។
២- វិធីការពារអាការៈវិលមុខពេលពពោះ
ខាងក្រោមនេះ ជាការណែនាំមួយចំនួន ដើម្បីជួយស្រីៗគ្នាយើង អាចកាត់បន្ថយអាការៈវិលមុខពេលពពោះបាន៖
– ដេក៖ ដេកផ្អៀងមួយចំហៀង អាចបង្កើនលំហូរឈាមទៅកាន់ខួរក្បាលបាន ដូច្នេះអាចជួយកាត់បន្ថយការវិលមុខ និងងងឹតមុខ។ ដើម្បីឲ្យការដេកចំហៀងកាន់តែមានភាពងាយស្រួល ស្រីៗគ្នាយើងអាចដាក់ខ្នើយមួយពីក្រោយខ្នង និងខ្នើយមួយទៀតនៅក្រោមត្រគាក ឯការគេងផ្ងារវិញ អាចធ្វើឲ្យស្ថានភាពកាន់តែធ្ងន់ធ្ងរបាន។
– ញ៉ាំឲ្យបានច្រើន៖ វារឿងល្អ បើយើងញ៉ាំអាហារតិច ប៉ុន្តែញ៉ាំច្រើនដង ដើម្បីឲ្យរាងកាយ អាចមានថាមពលគ្រប់គ្រាន់។
– កុំឈរយូរ៖ ឈរយូរ អាចធ្វើឲ្យលំហូរឈាមធ្លាក់ចុះបាន តែបើចាំបាច់ត្រូវឈរយូរ អាចព្យាយាមដើរតិចៗជាការល្អជាង។
– មិនត្រូវអង្គុយ ឬក្រោកឈរលឿនៗពេកទេ៖ ដោយសារឈាម អាចចាលនៅក្នុងកំភួនជើង ហើយវាមិនអាចមានគ្រប់គ្រាន់ទៅកាន់ខួរក្បាល ជាហេតុធ្វើឲ្យមានអាការៈ វិលមុខបាន។ ដូច្នេះនៅពេលដេក ត្រូវងើបអង្គុយថ្នមៗ បន្ទាប់ពីអង្គុយបាន ២-៣ នាទី ត្រូវក្រោកឈរយឺតៗ។
– កុំត្រាំ ឬងូតទឹកក្តៅយូរពេក៖ ការត្រាំ ឬងូតទឹកក្តៅយូរពេក អាចធ្វើឲ្យសរសៃឈាមរីកបាន។
អត្ថបទពាក់ព័ន្ធ៖
- ស្រីៗមានជំងឺ២មុខនេះ ត្រូវព្យាបាលឲ្យមានលំនឹងសិន បានអាចមានកូនបាន
- ៦ចំណុចងាយៗ កាត់បន្ថយអាការៈឈឺចង្កេះពេលពពោះ
៣- ពេលត្រូវទៅរកគ្រូពេទ្យ
អាការៈវិលមុខ អាចកាត់បន្ថយតាមរយៈតិចនិកមួយចំនួនក៏ពិតមែន ទោះយ៉ាងណាក៏ដោយ ត្រូវទាក់ទងទៅវេជ្ជបណ្ឌិត បើសម្គាល់ឃើញពីរោគសញ្ញាមិនប្រក្រតីផ្សេងទៀត ដូចជា ហូរឈាមតាមទ្វារមាស ឈឺចាប់នៅតំបន់ពោះ មើលលែងឃើញ ឈឺក្បាល ឬរោគសញ្ញាផ្សេងទៀតនៃសភាពស្លេកសាំង ព្រោះអាការៈទាំងនេះអា ចជារោគសញ្ញាបញ្ហាសុខភាពមួយចំនួន។
អាកាៈរវិលមុខក្នុងអំឡុងពេលពពោះ អាចបណ្តាលឲ្យយើងដួលសន្លប់ និងធ្វើឲ្យមានអារម្មណ៍មិនស្រួលបាន។ វាជាស្ថានភាពធម្មតា ហើយអាចធូរស្បើយបាន ដោយធ្វើការផ្លាស់ប្តូរនូវរបៀបរស់នៅមួយចំនួន។ ទោះជាយ៉ាងណាក៏ដោយ ត្រូវទៅជួបនឹងគ្រូពេទ្យបើមានស្ថានភាពកាន់តែធ្ងន់ធ្ងរ។
ក្នុងករណីមានសំណួរ ឬមន្ទិលសង្ស័យជុំវិញសុខភាពអ្នក ជម្រើសល្អបំផុតសូមពិគ្រោះ និងប្រឹក្សាយោបល់ផ្ទាល់ជាមួយគ្រូពេទ្យជំនាញ។ Hello Health Group មិនចេញវេជ្ជបញ្ជា មិនធ្វើរោគវិនិច្ឆ័យ ឬព្យាបាលជូនទេ៕
បដិសេធ
Hello Health Group និង “Hello គ្រូពេទ្យ” មិនចេញវេជ្ជបញ្ជា មិនធ្វើរោគវិនិច្ឆ័យ ឬព្យាបាលជូនទេ៕
ត្រួតពិនិត្យដោយ
គឹម កាណែល
ផ្សព្វផ្សាយពាណិជ្ជកម្មតើអត្ថបទនេះមានប្រយោជន៍ដែរទេ?
ផ្សព្វផ្សាយពាណិជ្ជកម្មផ្សព្វផ្សាយពាណិជ្ជកម្មផ្សព្វផ្សាយពាណិជ្ជកម្ម