ម៉ាក់ៗបំបៅដោះកូន តើអាចញុំាថ្នាំគ្រាប់ពន្យារកំណើតបានអត់?

ថ្នាំគ្រាប់ពន្យារកំណើតគឺជាមធ្យោបាយមួយក្នុងចំណោមមធ្យោបាយ​​ពន្យារកំណើតជាច្រើនដែលអាចការពារស្រ្តីពីការមានកូនបានដល់ទៅ ៩៩%។ តើថ្នាំគ្រាប់ពន្យារកំណើតមានសុវត្ថិភាពសម្រាប់ម៉ាក់ៗបំបៅ​ដោះ​​ដែរឬទេ? មានផលប៉ះពាល់ដល់ទារកដែរឬទេ?

ទាក់ទងនឹងចម្ងល់នេះ លោកវេជ្ជបណ្ឌិត ចាន់ ស៊ីណេត ប្រធានផ្នែកសម្ភព និងរោគស្រ្តីនៃមន្ទីរពេទ្យ​បង្អែកមិត្តភាពកម្ពុជា​ចិនសែន​សុខបានឱ្យដឹងថា ការបំបៅដោះគឺជាមធ្យោបាយពន្យារ​កំណើត​តាម​បែបធម្មជាតិដែលជួយពន្យារការបញ្ចេញមេជីវិតញីរបស់ស្រ្តី។ ម៉ាក់ៗបំបៅ​ដោះ​មិនគួរញុំា​ថ្នាំ​ពន្យារ​កំណើតទេ បើ៖

• អាអូនមានអាយុតិចជាងអាយុ ៦ ខែ
• ម៉ាក់ៗមិនទាន់មករដូវ
• ម៉ាក់ៗបំបៅដោះកូនតែមួយមុខគត់រយៈពេល ៦ ខែ
• ម៉ាក់ៗបំបៅដោះកូនទៀងទាត់ (យ៉ាងហោចណាស់ ៤ ម៉ោងម្តងនៅពេលថ្ងៃ និង ៦ ម៉ោងម្តង​នៅ​ពេលយប់)

ចង់គណនាថ្ងៃសម្រាលកូន ចុចទីនេះ!

ចង់គណនាទម្ងន់ស្រ្តីពពោះ ចុចទីនេះ!

ចង់គណនាថ្ងៃមេជីវិតញីទុំធ្លាក់ ចុចទីនេះ!

ចង់ដឹងអត្ថន័យពណ៌ និងរូបរាងលាមកទារក ចុចទីនេះ!

ម៉ាក់ៗបំបៅដោះដែលមិនមានលក្ខខណ្ឌដូចខាងលើមិនអាចប្រើការបំបៅដោះជាមធ្យោបាយពន្យារកំណើតទេ។ ដូច្នេះម៉ាក់ៗអាចជ្រើសរើសមធ្យោបាយពន្យារកំណើតណាមួយដែលស័ក្តិសមនឹងម៉ាក់ៗ។

លោកវេជ្ជបណ្ឌិតបានបន្ថែមថា ម៉ាក់ៗបំបៅដោះដែលមិនមានលក្ខខណ្ឌដូចលោកបានលើកឡើង គួរពិគ្រោះ​ជាមួយគ្រូពេទ្យជំនាញសិនមុននឹង​ញុំាថ្នាំពន្យារកំណើត។

បើម៉ាក់ៗជ្រើសរើសការញុំាថ្នាំគ្រាប់ពន្យាកំណើត ម៉ាក់ៗអាចញុំាថ្នាំគ្រាប់ពន្យារកំណើតដែលមិនមានផ្ទុកជាតិអ័រម៉ូនអ៊ីស្រ្តូសែន ព្រោះថ្នាំគ្រាប់ពន្យារកំណើតដែលមានផ្ទុកជាតិអ័រម៉ូន​អ៊ីស្រ្តូសែន​អាចកាត់​បន្ថយ​ការផលិតទឹកដោះរបស់ម៉ាក់ៗ។

តាមសៀវភៅថ្នាំគ្រាប់ពន្យារកំណើតដែលបោះពុម្ភដោយសមាគមថែទាំសុខភាពគ្រួសារកម្ពុជា រ៉ាក់​បានឱ្យដឹងថា ថ្នាំគ្រាប់ពន្យារកំណើតមានពីរប្រភេទគឺ៖

១. ថ្នាំគ្រាប់ស៊ីអូស៊ី

ថ្នាំគ្រាប់ស៊ីអូស៊ីជាថ្នាំដែលមានថ្នាំគ្រាប់ពណ៌លឿង ២១ គ្រាប់ និងក្រហម ៧ គ្រាប់។ ថ្នាំនេះ​មាន​ជាតិអ័រម៉ូន ២ មុខគឺអ៊ីស្រ្តូសែន និងប្រូហ្សេស្ទីនដែល​ដូចគ្នានឹងអ័រម៉ូនធម្មជាតិរបស់ស្រ្តី។

២. ថ្នាំគ្រាប់ភីអូភី

ថ្នាំគ្រាប់ភីអូភីជាថ្នាំដែលមានថ្នាំតែមួយពណ៌ចំនួន ២៨ គ្រាប់ ហើយមានជាតិអ័រម៉ូនប្រូហ្សេស្ទីន​តែ​មួយមុខគត់ដែលដូចគ្នានឹងអ័រម៉ូនធម្មជាតិរបស់ស្រ្តី។

ការញុំាថ្នាំគ្រាប់ពន្យារកំណើតក្នុងអំឡុងពេលបំបៅដោះមិនបង្កគ្រោះថ្នាក់​ដល់ទារកទេ គ្រាន់តែថ្នាំ​គ្រាប់ពន្យាកំណើត​ដែលមានផ្ទុកជាតិ​អ័រម៉ូន​អ៊ីស្រ្តូសែន​អាចកាត់បន្ថយ​ការផលិត​​ទឹកដោះ​របស់​ម៉ាក់ៗ។

អត្ថបទគួរអាន៖

• ឆាប់មានកម្លាំង សម្បូរទឹកដោះ​​ក្រោយសម្រាលកូនរួច សាកតិចនិកទាំងនេះ
• ម៉ាក់ៗបំបៅដោះកូនគួររក្សាជាតិទឹកឲ្យបានត្រឹមត្រូវ កុំឲ្យ​ខ្វះទឹកដោះសម្រាប់អូនៗ
• ម៉ាក់ៗបំបៅដោះកូន អាចញ៉ាំថ្នាំ Gluta ឲ្យស្បែកសបានអត់?
• ម៉ាក់ៗស្ទះទឹកដោះក្រោយសម្រាល គួរដោះស្រាយបែបណា?
• បំបៅដោះកូន បើម៉ាក់ៗញ៉ាំថ្នាំជាតិដែកបន្ថែម អាចបន្ថយស្លេកស្លាំង ឯកូនមិនប្រឈមបញ្ហាធ្ងន់ធ្ងរមួយនេះ
• បំបៅដោះកូន បើម៉ាក់ៗញ៉ាំអាហារឆៅអាចប៉ះពាល់អីខ្លះ?