home

រោគសញ្ញា

ចំណេះដឹងទូទៅ

រោគសញ្ញា

លើស​ជាតិ​ស្ករ លើស​សម្ពាធ​ឈាម ជា​បញ្ហា​សុខភាព​មួយ​ដែល​គ្នា​យើង​ធ្លាប់​បាន​ឭ​ញឹក​ញាប់ ដោយសារ​ប្រជាជន​ខ្មែរ​យើង​ភាគ​ច្រើន​សុទ្ធ​តែ​ជួប​បញ្ហា​សុខភាព​ទាំង​ពីរ​នេះ។ ប៉ុន្តែ គ្នា​យើង​មាន​ដែល​ឮ​ពី​បញ្ហា​លើស​ជាតិ​ប្រូឡាក់​ទីន​ក្នុង​រាងកាយ​ឬ​អត់? អ្វី​ទៅ​ជា​បញ្ហា​លើស​ជាតិ​ប្រូឡាក់ទីន? ការ​លើស​អ័រម៉ូន​ប្រូឡាក់ទីន (ភាសា​បច្ចេក​ទេស Hyperprolactinemia) គឺ​ជា​ការ​បញ្ចេញ​អ័រម៉ូន​ប្រូឡាក់ទីន​ច្រើន​លើស​លុប​ក្នុង​រាងកាយ ដែល​ផលិត និង​បញ្ចេញ​ដោយ​ក្រពេញ​អ៊ីប៉ូហ្វីស​ខាង​មុខ។ អ័រម៉ូន​ប្រូឡាក់ទីន ជា​អ័រម៉ូន​ដែល​មាន​តួច​នាទី​ក្នុង​ការ​ផលិត​ទឹក​ដោះ។ នេះ​បើ​តាម​ការ​ឲ្យ​ដឹង​ពី​លោក​វេជ្ជបណ្ឌិត ចាន់ ស៊ីណេត ឯក​ទេស​ជំងឺ​ទូទៅ។ បញ្ហា​នេះ​មាន​រោគ​សញ្ញា​បែប​ណា​វិញ? រោគ​សញ្ញា​នៃ​បញ្ហា​លើស​ជាតិ​ប្រូឡាក់ទីន​អាច​មាន​ភាព​ខុស​គ្នា​រវាង​មនុស្ស​ស្រី និង​មនុស្ស​ប្រុស។ ដោយសារ​កម្រិត​ប្រូឡាក់ទីន មាន​ឥទ្ធិពល​ដល់​ការ​ផលិត​ទឹក​ដោះ និង​វដ្ដ​រដូវ ដូច​នេះ​ទើប​ពិបាក​ដឹង​ពី​បញ្ហា​នេះ​ចំពោះ​បុរស។ ចំពោះរោគ​សញ្ញា​រវាង​ភេទ​ទាំង​ពីរ​ដែល​កើត​មាន​បញ្ហា​នេះ​មាន​ដូច​ជា៖ មនុស្ស​ស្រី វិបត្តិ​អត់​កូន រដូវ​មិន​ទៀង ឬ​រាំង​រដូវ ហៀរ​ទឹកដោះ អត់​ចំណង់​ផ្លូវ​ភេទ ឈឺ​ក្បាល ស្រវាំង ឬ​ងងឹត​ភ្នែក មនុស្ស​ប្រុស វិបត្តិ​អត់​កូន អត់​ចំណង់​ផ្លូវ​ភេទ ហៀរ​ទឹកដោះ ឡើង​ដោះ ឈឺ​ក្បាល ស្រវាំង ឬងងឹត​ភ្នែក មាន​បញ្ហា​លឹង្គ​មិន​ឡើង​រឹង វេជ្ជបណ្ឌិត​រូប​នេះ​បន្ត​ទៀត​ថា ជា​ធម្មតា បញ្ហា​លើស​ជាតិ​ប្រូឡាក់ទីន​អាច​ព្យាបាល​បាន ហើយ​ការ​ព្យាបាល​នឹង​ពឹង​ផ្អែក​ទៅ​លើ​មូល​ហេតុ​ដែល​បណ្ដាល​ឲ្យ​មាន​បញ្ហា​នេះ។

អត្ថបទផ្សេងទៀតពី រោគសញ្ញា

រោគសញ្ញា

គ្នា​យើង​ដែល​ជួប​បញ្ហា​​ត្រូវ​ទៅ​បន្ទប់​ទឹក​បត់ជើង​តូច​ញឹក​ញាប់ ពិត​ជា​មាន​ការ​រំខាន​ចិត្ត និង​ពេល​ខ្លះ​រំខាន​ដល់​ការ​ប្រកប​ការងារ​ទៀត​ផង​។ ការ​នោម​ញឹក​លើស​ពី​ប្រាំ​បី​ដង​ក្នុង​មួយ​ថ្ងៃ​អាច​ជា​រោគ​សញ្ញា​មួយ​ក្នុង​ចំណោម​រោគ​សញ្ញា​ផ្សេងទៀត​នៃ​បញ្ហា​ប្លោក​នោម​ធ្វើការ​ខ្លាំង​ជ្រុល​។ ១. តើ​អ្វី​ជា​បញ្ហា​ប្លោក​នោម​ធ្វើ​ការ​ខ្លាំង​ជ្រុល? បញ្ហា​ប្លោក​នោម​ធ្វើ​ការ​ខ្លាំង​ជ្រុល(overactive bladder) ធ្វើ​ឲ្យ​យើង​ចង់​ទៅ​នោម​ភ្លាមៗ​ ហើយ​ក៏​អាច​ភ្ញោច​ឲ្យ​យើង​ពិបាក​ទប់​នោម​ផង​ដែរ​។ បញ្ហា​ប្លោក​នោម​ធ្វើ​ការ​ខ្លាំង​ជ្រុល​​នេះ​អាច​ថា​ពិបាក​ក្នុង​ការ​គ្រប់​គ្រង ដោយ​ហេតុ​ថា​វា​ធ្វើ​ឲ្យ​យើង​ពិបាក​ស្មាន​ថា​ពេល​ណា​ត្រូវ​​ឈឺ​​នោម​។​ បញ្ហា​នេះ នឹង​ធ្វើ​ឲ្យ​មនុស្ស​យើង​ពិបាក​ក្នុង​ការ​ធ្វើ​សកម្មភាព​សង្គម ឬ​ប្រកប​ការងារ​ជា​ដើម ព្រោះ​តែ​ត្រូវ​ទៅ​បន្ទប់​ទឹក​ញឹក​ញាប់​ពេក​។ លើស​ពី​នេះ​ទៀត​បញ្ហា​នេះ​ ក៏​ធ្វើឲ្យ​មនុស្ស​យើង​ខ្លះ​ជួប​បញ្ហា​ផ្លូវ​អារម្មណ៍​ផង​ដែរ​។​ យ៉ាងណា បញ្ហា​នេះ ក៏​មាន​វិធី​ព្យាបាល​ច្រើន​យ៉ាង អាច​ជួយ​គ្នា​យើង​ឲ្យ​អាច​គ្រប់​គ្រង​អាការៈ​ផ្សេងៗ​បាន​ដែរ​។​​​​​​ ២. រោគសញ្ញា​ ពេល​ខ្លះ​បើ​គ្នា​យើង​គ្រាន់​តែ​យូរៗ​ម្ដង​ជួប​បញ្ហា​ពិបាក​រឿង​បត់ជើង​តូច​នេះ មិន​ទាន់​ចាត់​ថា​មាន​បញ្ហា​ប្លោក​នោម​ធ្វើ​ការ​ខ្លាំង​ជ្រុន​នោះ​ទេ។ រោគ​សញ្ញា​ដែល​កំណត់​ថា​យើង​ជួប​បញ្ហា​ប្លោក​នោម​ធ្វើ​ការ​ខ្លាំង​ជ្រុល គឺ​ត្រូវ​ទៅ​នោម​ញឹក​ញាប់ ឬ​ឈឺ​ជុះ​​នោម​ភ្លាមៗ រួម​មាន៖ ឈឺ​នោម​ពិបាក​ទ្រាំ ចង់​ទៅ​នោម​ភ្លាមៗ​ មិន​អាច​ទ្រាំ​ទប់​នោម​បាន​ នោម​ញឹក​ញាប់ ច្រើនជាង​ប្រាំបី​ដង​ក្នុង​រយៈពេល​២៤​ម៉ោង​ ឡើង​បត់ជើង​តូច​លើស​ពី​ម្ដង​ក្នុង​មួយ​យប់​។​ បញ្ហា​នេះ​អាច​មាន​លក្ខណៈ​ខុស​ប្លែក​គ្នា​ពី​មនុស្ស​ម្នាក់​ទៅ​ម្នាក់ទៀត​ដែរ ដោយ​ហេតុ​នេះ​ចាំ​បាច់​ត្រូវ​មាន​ការ​ពិភាក្សា​ជាមួយ​គ្រូពេទ្យ​ជំនាញ​។ វិធី​ព្យា​បាល​មួយ​ចំនួន​ដូច​ជា​ការហាត់​ប្រាណ​ពង្រឹង​សាច់ដុំ​អាង​ត្រគាក ប្រើ​ប្រាស់​ថ្នាំ ឬ​វះកាត់​ជា​ដើម អាច​ជា​ជម្រើស​នៃ​ការ​ព្យា​បាល អាស្រ័យ​លើ​ការ​វិនិច្ឆ័យ​របស់​គ្រូពេទ្យ​។​​ ៣. មូល​ហេតុ​បង្ក​ឲ្យ​មាន​បញ្ហា​នេះ តម្រង​នោម​របស់​យើង​ផលិត​ទឹក​នោម ហើយ​ទឹក​នោម​ចូល​ទៅ​ក្នុង​ប្លោក​នោម។ បន្ទាប់​មក​ខួរ​ក្បាល​ក៏​បញ្ជូន​សញ្ញា​ប្រាប់​រាង​កាយ​យើង​ថា​ដល់​ពេល​ទៅ​បត់ជើង​តូច​ហើយ។ សាច់​ដុំ​បាត​អាង​ត្រគាក​ក៏​បាន​បន្ធូរ និង​បើក​ផ្លូវ​ឲ្យ​រាង​កាយ​យើង​បញ្ចេញ​ទឹក​នោម។ បញ្ហា​ប្លោក​នោម​ធ្វើ​ការ​ខ្លាំង​ជ្រុល​ធ្វើ​ឲ្យ​សាច់​ដុំ​ប្លោក​នោម​កន្ទ្រាក់​ដោយ​ឯកឯង​​ ដែល​នេះ​នាំ​ឲ្យ​យើង​មាន​អារម្មណ៍​ថា​ចង់​ទៅ​នោម​ញឹក​ញាប់ ទោះ​បី​ជា​ទឹក​នោម​មិន​ទាន់​ពេញ​ប្លោក​នោម​ក៏​ដោយ​។ លក្ខខណ្ឌ និង​កត្តា​មួយ​ចំនួន​ផ្សេង​ទៀត​ក៏​ធ្វើ​ឲ្យ​មាន​រោគ​សញ្ញា​ប្លោក​នោម​ធ្វើការ​ខ្លាំង​ជ្រុល​ដែរ រួម​មាន៖ ផឹក​ទឹក​ច្រើន​ពេក ប្រើ​ប្រាស់​ថ្នាំ​ដែល​នាំឲ្យ​បង្កើន​បរិមាណ​​ទឹក​នោម ឆ្លង​មេរោគ​នៅ​ផ្លូវទឹក​នោម​ ផឹក​កាហ្វេ ឬ​គ្រឿង​ស្រវឹង​ច្រើន និង​​ ប្លោក​នោម​ខុស​ប្រក្រតី […]

រោគសញ្ញា

គ្នា​យើង​ប្រហែលជា​​ធ្លាប់​បាន​ឃើញ​ដែរ​ហើយ​ដូច​ជា​ក្នុង​​ភាព​យន្ត​ជា​ដើម ពេល​មនុស្ស​យើង​ភ័យ​ខ្លាច​ មាន​អ្នក​ខ្លះ​លេច​នោម ហើយ​ក្នុង​ជីវិត​ប្រ​ចាំ​ថ្ងៃ​ក៏​ដូច​គ្នា បើ​យើង​មាន​អារម្មណ៍​ភ័យ​ខ្លាច​ក៏​អាច​ធ្វើ​ឲ្យ​យើង​មាន​អារម្ម​ណ៍​ចង់​ទៅ​បត់ជើង​តូច​ដែរ​​។​ ហេតុ​អ្វី​បាន​ជាង​ពេល​ភ័យ​មនុស្ស​យើង​ខ្លះ​មាន​អារម្មណ៍​ចង់​បត់ជើង​តូច? ​​ពេល​មនុស្ស​យើង​មាន​អារម្មណ៍​ធម្មតា ប្លោក​នោម​យើង​ក៏​ធ្វើ​ការ​ធម្មតា ដោយ​ផ្ដើម​បំពេញ​ទឹក​នោម​ចេញ​ពី​តម្រង​នោម​មក​ជា​រឿយៗ​រហូត​ពេញ​។ ជាទូទៅ​ប្លោក​នោម​មាន​សុខភាព​ល្អ​អាច​ដាក់​ទឹក​នោម​បាន​រហូត​ដល់​ពី​រ​ពែង ហើយ​ពេល​ថង់​ដាក់​ទឹក​នោម​ពេញ ប្លោក​នោម​នឹង​បញ្ជូន​សញ្ញា​ទៅ​កាន់​ខួរ​ក្បាល​ថា​យើង​ត្រូវ​ទៅ​បន្ទប់​ទឹក​ហើយ។ ទោះ​បី​ជា​មាន​ការ​បញ្ជូន​សញ្ញា​បែប​នេះ​ក៏​ដោយ សម្រាប់​មនុស្ស​យើង​ក្នុង​អារម្ម​ណ៍ធម្មតា អាច​ទ្រាំ​យូរ​បន្តិច​ចាំ​ទៅ​បត់ជើង​តូច​ក៏​បាន​។ ប៉ុន្តែ​សម្រាប់​មនុស្ស​យើង​ពេល​មាន​អារម្មណ៍​ភ័យ​ខ្លាច​ ទំនងជា​ពិបាក​ទ្រាំ​បន្តិច។ នៅ​ពេល​យើង​ចាប់​ផ្ដើម​ភ័​យ​ អ្វីៗ​នៅ​ក្នុង​រាង​កាយ​របស់​យើង​នឹង​លែង​ដំណើរ​ការ​ល្អ​ដូច​មុន។ ​ប្លោក​នោម​របស់​យើង​មាន​ទំនាក់ទំនង​យ៉ាង​ជិត​ស្និទ្ធ​ទៅ​នឹង​ប្រព័ន្ធ​ភ័យ​ខ្លាច​ក្នុង​ខ្លួន​មនុស្ស​យើង​។ នៅ​ពេល​ដែល​ប្រ​ព័ន្ធ​នេះ​ចាប់​ផ្ដើម​ដំណើរ​ការ​ ធ្វើ​ឲ្យ​តម្រង​នោម​របស់​យើង​ផលិត​ទឹក​នោម​កាន់តែ​ច្រើន ហើយ​សាច់​ដុំ​ប្លោក​នោម​ចាប់​ផ្ដើម​កន្ត្រាក់ និង​​ដាក់​សម្ពាធ​ដល់​ប្លោក​នោម ហើយ​​ឲ្យ​សញ្ញា​មក​មនុស្ស​យើង​ថា​ត្រូវ​ទៅ​បន្ទប់​ទឹក។ ​ដូច​នេះ​ហើយ នៅ​ពេល​ដែល​យើង​មាន​អារម្មណ៍​ភ័យ ប្រព័ន្ធ​ឆ្លើយ​តប​នឹង​ភាព​ភ័យ​ខ្លាច​ក្នុង​ខ្លួន​យើង​នឹង​ត្រូវ​ភ្ញោច​ខ្លាំង​ជ្រុល​ទៅ​លើ​យន្ត​ការ​នានា​របស់​ប្លោក​នោម​ក្នុង​ការ​គ្រប់​គ្រង​ទឹក​នោម ដែល​នេះ​នាំ​ឲ្យ​យើង​មាន​អារម្មណ៍​ថា​ចង់​តែ​លេច​នោម​។ ដូច​គ្នា​ដែរ ការ​ភ័យ​ខ្លាច​នេះ​ក៏​បាន​ធ្វើ​តម្រង​នោម​ធ្វើ​ការ​ខ្លាំង​ជាង​ធម្មតា នាំឲ្យ​មនុស្ស​ដែល​ភ័យ​មាន​ទឹក​នោម​ច្រើន​ខុស​ប្រក្រតី។ ​ក៏​មាន​ដែរ​​ ពេល​យើង​ភ័យ យើង​អាច​មាន​អារម្មណ៍​ចង់​ទៅ​នោម តែ​ធាតុ​ពិត​យើង​មិន​មាន​ទឹក​នោម​ច្រើន​ដែល​ត្រូវ​តែ​ទៅ​បន្ទប់​ទឹក​បន្ទាន់​នោះ​ទេ។ អ្នក​ជំនាញ​ថា​នេះ​ជា​ការ​បញ្ឆោត​របស់​ខួរ​ក្បាល​នៅ​ពេល​យើង​​កំពុង​ភ័យ​។​​ ​បើ​តាម​អ្នក​ជំនាញ ពេល​យើង​មាន​អារម្មណ៍​ថា​ភ័យ​ ហើយ​ចង់​ទៅ​បត់ជើង​តូច​ទៀត​នោះ តែ​មិន​អាច​រក​កន្លែង​គួរ​សម​បាន យើង​អាច​សម្រាក​បន្តិច ធ្វើ​សមាធិ​រំងាប់​ចិត្ត និង​សាច់ដុំ ដែល​ការ​ណ៍​នេះ​អាច​ជួយ​សម្រួល​អារម្មណ៍​យើង​បាន​មួយ​ចំណែក​។