ឆាប់បាញ់ទឹកកាម តូចពេក មិនឡើងរឹង ប្រើបានតែមួយតង់ សុទ្ធតែជាបញ្ហាព្រួយបារម្ភពីសមត្ថភាពលិង្គរបស់ប្រុសៗ។ ប្រុសៗខ្លះហ៊ានចំណាយទិញថ្នាំផ្ដេសផ្ដាសមកប្រើទាំងប្រថុយប្រថាន ដើម្បីឲ្យលិង្គមានសមត្ថភាពខ្លាំង។ ការពិត ចង់ឲ្យលិង្គមានសមត្ថភាពខ្លាំង គេអាចញ៉ាំវីតាមីនប៉ុន្មានប្រភេទជាជំនួយ៖
១– វីតាមីន E
ប្រុសៗមានបញ្ហាលិង្គកោង បណ្ដាលមកពីជាលិការឹងរបស់ប្រដាប់ភេទទាញឲ្យកោងខុសធម្មតានោះ វីតាមីន E ត្រូវគេជឿថាអាចជួយបន្ថយភាពឈឺចាប់ នៅពេលលិង្គឡើងរឹងបាន។ ពេទ្យអាចណែនាំយើងពីវិធីព្យាបាលមួយចំនួនទៀត ដូចជា ថ្នាំគ្រាប់ ថ្នាំចាក់ ឬវះកាត់តម្រង់រាងតែម្ដង។
ប៉ុន្តែ មិនត្រូវញ៉ាំវីតាមីន E លើសពី ១០០០ ទៅ ១៥០០ UI (International Unit) ទេ ព្រោះវាអាចបង្កឲ្យមានវិបត្តិកំណកឈាម។
ចង់ពិនិត្យសុខភាពប្រព័ន្ធរំលាយអាហារ ចុចទីនេះ!
២– វីតាមីន D
នៅអាមេរិក គេរកឃើញថា វីតាមីន D និងរោគស្លាប់កាមរបស់ប្រុសៗ មានជាប់ពាក់ព័ន្ធគ្នាគួរឲ្យកត់សម្គាល់ ខណៈតាមតួលេខច្បាស់ការពីសាកលវិទ្យាល័យ John Hopkins ថា ក្នុងចំណោមបុរសមានបញ្ហាសមត្ថភាពផ្លូវភេទ ៣.៤០០ នាក់ មាន ៣២% ជួបវិបត្តិកង្វះវីតាមីន D ព្រោះវីតាមីន D ជួយចិញ្ចឹមកោសិកាសរសៃឈាមបន្តរត់ទៅចិញ្ចឹមលិង្គ។ ដូច្នេះ កង្វះវីតេមីន D ក៏ជាហេតុនាំឲ្យលិង្គពិបាកឡើងរឹង។
![ចង្អោរក្រោយរួមភេទ](https://cdn.hellokrupet.com/wp-content/uploads/2020/10/T-ចង្អោរក្រោយរួមភេទ.jpg)
៣– វីតាមីន C
វីតាមីន C មានតួនាទីសំខាន់ជួយឲ្យរាងកាយយើងលូតលាស់បានល្អ និងជួសជុលជាលិកាខូចខាត រួមទាំងជាលិកាលិង្គផងដែរ។ មនុស្សគ្រប់រូបត្រូវការវីតាមីន C ដើម្បីផលិតកូលេជែន ជាប្រូតេអ៊ីនចាំបាច់សម្រាប់ផលិតកោសិកាស្បែក និងសរសៃឈាមនៃរាងកាយយើង រួមទាំងប្រដាប់ភេទ ជាដើម។
បញ្ហាផ្លូវភេទ ដូចជា លិង្គមិនឡើងរឹង បាញ់ទឹកកាមលឿនពេក វីតាមីន C អាចជួយបានដូចគ្នា។ មានការណែនាំ ប្រើវីតាមីន C ចាប់ពី ២០០-២៥០ មិល្លីក្រាម (ម្ដង ឬ២ដងក្នុងមួយថ្ងៃ) ព្រោះកង្វះវីតាមីន C អាចប៉ះពាល់លើលទ្ធភាពបន្តពូជទៀតផង។
៤– វីតាមីន B9
អាស៊ីដផូលីក (B9) ជាប្រភេទវីតាមីន B មានប្រយោជន៍សំខាន់សម្រាប់សុខភាព អាចជួយការពារជំងឺដាច់សរសៃឈាមខួរក្បាល និងជំងឺបេះដូង រួមទាំងសម្រួលដំណើរឈាមរត់។ ជាក់ស្ដែង សម្រួលលំហូរឈាមរត់ទៅលិង្គគ្រប់ពេលវាឡើងរឹងម្តងៗ។
អត្ថបទគួរអានបន្ថែម៖
៥– វីតាមីន B3
ញ៉ាំវីតាមីន B3 អាចជួយឲ្យសុខភាពបេះដូង និងសរសៃឈាមធ្វើមានដំណើរប្រសើរជាងមុន។ មនុស្សមួយចំនួនប្រើវីតាមីន B3 ដើម្បីបន្ថយកូឡេស្តេរ៉ូល និងបន្ថយហានិភ័យគាំងបេះដូង។ នៅពេលណាសរសៃឈាមរត់ស្រួល ពេលមានអារម្មណ៍រួមភេទម្ដងៗ លិង្គនឹងពុះកញ្ជ្រោលងាយឡើងរឹងតាមតម្រូវការ។
៦– វីតាមីន B5
វីតាមីន B5 ជួយបានច្រើនមុខចំពោះសុខភាពផ្លូវភេទ និងដំណើរការរបស់លិង្គ ដូចជា ចិញ្ចឹមកោសិកាផ្សេងៗ។ វីតាមីន B5 អាចទប់ទល់ប្រឆាំងនឹងការបង្ករោគ និងពង្រឹងថាមពលរបស់លិង្គ។