ដើរកម្សាន្តតាមទីកន្លែងធម្មជាតិមិនថាក្នុងស្រុក ឬក្រៅស្រុក ជាទំនោរថ្មីទៅហើយសម្រាប់គ្នាយើង។ ការដើរកម្សាន្តជាមួយធម្មជាតិមិនត្រឹមតែជាការកម្សាន្ត លំហែអារម្មណ៍ សម្រាកកាយប៉ុណ្ណោះទេ ក្រៅពីនោះការដើរកម្សាន្តនៅតាមទីធម្មជាតិស្រស់ស្អាតនោះ ក៏នឹងជួយទៅដល់សុខភាពខួរក្បាលយើងឱ្យប្រសើរផងដែរ នេះបើផ្អែកតាមលទ្ធផលរបស់ក្រុមអ្នកស្រាវជ្រាវយកមកបង្ហាញ។
ត្រឹម ៩០ នាទី នៅជាមួយធម្មជាតិក៏ជួយសុខភាពខួរក្បាលដែរ
នៅក្នុងការស្រាវជ្រាវចំនួនពីរផ្សេងគ្នា បានបង្ហាញចេញនូវលទ្ធផលដូចគ្នាថា ការដើរលេងតាមទីកន្លែងធម្មជាតិ មិនថាព្រៃភ្នំ ទឹកជ្រោះនានា ពិតជាជួយសុខភាពខួរក្បាលបានប្រសើរ។
អត្ថបទពាក់ព័ន្ធ៖
- ដើរព្រៃបោះតង់ ផ្ដល់អត្ថប្រយោជន៍ទាំងផ្លូវកាយ និងផ្លូវចិត្ត
- ចំណាយ ២០នាទី ជាមួយធម្មជាតិ ជួយបន្ថយបញ្ហាស្ត្រេសយ៉ាងល្អ
លទ្ធផលស្រាវជ្រាវរបស់ក្រុមស្រាវជ្រាវ នៃសាកលវិទ្យាល័យ Stanford សហរដ្ឋអាមេរិក ដឹកនាំដោយលោកសាស្រ្តាចារ្យ Greg Bratman ដែលបានធ្វើពិសោធទៅលើអ្នកស្ម័គ្រចិត្តចំនួន៣៨នាក់។ អ្នកស្ម័គ្រចិត្តទាំងនោះ ត្រូវបានស្កេនខួរក្បាលពិនិត្យមើលកម្រិតស្រេ្តស នៅមុន និងក្រោយការដើរកម្សាន្ត។ បន្ទាប់ពីនោះ ពួកគេខ្លះត្រូវបានឱ្យជ្រើសរើសដើរកម្សាន្តតាមចំណូលចិត្ត ដោយមានក្រុមខ្លះ ទៅតាមតំបន់ធម្មជាតិ ព្រៃភ្នំ ដែលមានដើមឈើធំៗ ទឹកជ្រោះ តំបន់សមុទ្រ នៅក្នុងរយៈពេល៩០នាទី និងអ្នកមួយចំនួនទៀត ទៅដើរលេងនៅតាមតំបន់ទីប្រជុំជនមមាញឹកនៅតាមទីក្រុង។
អត្ថបទពាក់ព័ន្ធ៖
- នៅក្នុងផ្ទះយូរពេកអាចប្រឈមបញ្ហាផ្លូវចិត្ត សាកវិធីនេះអាចជួយដោះស្រាយបាន
- ស្ត្រេសនឹងការងារ ធ្វើឲ្យប៉ះពាល់ដល់សុខភាពបេះដូង
នៅក្រោយពេលដំណើរកម្សាន្តរួច លទ្ធផលបានបង្ហាញថា អ្នកដែលបានដើរកម្សាន្តនៅតាមទីកន្លែងធម្មជាតិ គឺមិនគ្រាន់តែមានកម្រិតអារម្មណ៍តានតឹងធ្លាក់ចុះទាបប៉ុណ្ណោះទេ តែថែមទាំងថយនូវអារម្មណ៍ក្រៀមក្រំ សោកស្តាយ និងតប់ប្រមល់ ព្រមទាំងឃើញថាខួរក្បាលមានភាពស្រស់ថ្លាឡើងវិញ។ លទ្ធផលនេះ គឺល្អជាង បើប្រៀបនឹងអ្នកដើរកម្សាន្តតាមទីប្រជុំជនក្នុងទីក្រុង។ លើសពីនេះ ក្រុមអ្នកស្រាវជ្រាវដដែលក៏បានបន្ថែមថា ការដើរកម្សាន្តនៅតំបន់ធម្មជាតិ ជួយកាត់បន្ថយការប្រឈមនឹងជំងឺផ្សេងៗ ដែលទាក់ទងនឹងខួរក្បាលផងដែរ។
ដោយផ្អែកលើលទ្ធផលស្រាវជ្រាវមួយទៀត នៅសាកលវិទ្យាល័យ Edge Hill ប្រទេសអង់គ្លេស ក៏បានរកឃើញលទ្ធផលដូចគ្នា ដោយឃើញថា ការដើរកម្សាន្តនៅទីនោះ បានធ្វើឱ្យអារម្មណ៍អ្នកដើរកម្សាន្តបានស្ងប់ និងស្មឹងស្មាធិ៍។ ជាមួយគ្នានោះ លោកស្រីសាស្រ្តាចារ្យផ្នែកវេជ្ជសាស្រ្ត Sara Warber មកពីសាកលវិទ្យាល័យ Michigan បានឱ្យយោបល់ថា យើងគួរមានពេលវេលាដើរលំហែតាមកន្លែងធម្មជាតិខ្លះ មិនត្រឹមតែមានផលប្រយោជន៍ដល់រាងកាយប៉ុណ្ណោះទេ ប៉ុន្តែថែមទាំងជួយដល់សុខភាពផ្លូវចិត្ត បំបាត់ស្រ្តេស ហើយពិតជាជួយឱ្យខួរក្បាលបានប្រសើរ៕
Hello Health Group និង “Hello គ្រូពេទ្យ” មិនចេញវេជ្ជបញ្ជា មិនធ្វើរោគវិនិច្ឆ័យ ឬព្យាបាលជូនទេ៕