យើងឃើញធ្មេញទារកតូចៗ cute cute អ៊ីចឹងមែន តែធ្មេញអាអូនមានសារសំខាន់ណាស់។ បើធ្មេញណាមួយរបស់កូនខូចលឿនពេក នោះធ្មេញដែលនៅសេសសល់អាចផ្លាស់ទី ហើយមិនទុកកន្លែងសម្រាប់ធ្មេញពេលពេញវ័យដុះមកនោះទេ។ ចំពោះម៉ាក់ប៉ាមានកូនបៅទឹកដោះគោម្សៅ យើងគួរប្រយ័ត្នបញ្ហាកូនពុកធ្មេញព្រោះកំប៉ុងទឹកដោះគោបន្តិច។

គណនាថ្ងៃសម្រាលកូន

លោកស្រីវេជ្ជបណ្ឌិត កុសល កណិការ ឯកទេសជំងឺកុមារ បានឲ្យដឹងថា បញ្ហាពុកធ្មេញព្រោះកំប៉ុងទឹកដោះគោ ឬ Baby bottle tooth decay ច្រើនកើតមានលើកុមារដែលបៅទឹកដោះគោ ឬទឹកផ្អែមពេលយប់ច្រើន ហើយមិនបានសម្អាតធ្មេញក្រោយបៅ។ ពុកធ្មេញព្រោះកំប៉ុងទឹកដោះគោ កើតឡើងនៅធ្មេញមុខជួរខាងលើ ប៉ុន្តែធ្មេញដទៃទៀតក៏អាចរងផលប៉ះពាល់ផងដែរ។

លោកស្រីបន្តថា បាក់តេរីក្នុងមាត់នឹងបំប្លែងជាតិស្ករទាំងនោះទៅជាអាស៊ីដដែលទៅធ្វើឲ្យពុកធ្មេញ។ ថ្វីដ្បិតតែធ្មេញកូនក្មេងនឹងត្រូវប្ដូរនៅអាយុ ៦ឆ្នាំក៏ដោយ ប៉ុន្តែប្រសិនបើធ្មេញពុកខូចមុនអាយុនឹងរំខានដល់ការញ៉ាំអាហាររបស់កុមារ។ បើកូនជួបបញ្ហាពុកធ្មេញព្រោះកំប៉ុងទឹកដោះគោ អាអូនអាច៖

-ឈឺធ្មេញ

-ឈឺអញ្ចាញ

-អាប់សែខ្ទុះក្នុងអញ្ចាញ ។ល។

វេជ្ជបណ្ឌិតសញ្ញាប័ត្រពីប្រទេសបារាំងរូបនេះបន្ថែមថា កាលណាកូនឈឺធ្មេញ ឈឺអញ្ចាញ វាអាចជះឥទ្ធិពលដល់ការលូតលាស់របស់ក្មេង (ព្រោះអាអូនឈឺធ្មេញពិបាកញ៉ាំអាហារ)។

ដូចនេះ ម៉ាក់ប៉ាត្រូវទម្លាប់សម្អាតអញ្ចាញ និងធ្មេញឲ្យកូនចាប់តាំងពីកូនដុះធ្មេញដំបូងៗ ដោយប្រើកំណាត់ជូតធ្មេញ ឬថ្នាំដុះធ្មេញសម្រាប់កុមារតូចអាចលេបបាន (Fluoride free) ។

វេជ្ជ. កុសល កណិការ

យើងអាចបង្ការបញ្ហាពុកធ្មេញព្រោះកំប៉ុងទឹកដោះគោបានដោយ សម្អាតធ្មេញឲ្យកូនមិនថាបៅដោះម្ដាយ ឬបៅទឹកដោះគោ កុំឲ្យកូនគេងបៀមកំប៉ុងទឹកដោះគោ ឲ្យកូនញ៉ាំទឹកពីកែវធម្មតា កាត់បន្ថយអាហារផ្អែម ឬស្អិតដែលកូនញ៉ាំ និងនាំកូនទៅពិនិត្យធ្មេញជាមួយទន្តពេទ្យឲ្យបានយ៉ាងតិចម្ដង មុនកូនចូលដល់អាយុ ១ឆ្នាំ។

ពុកធ្មេញព្រោះកំប៉ុងទឹកដោះគោ

អានបន្ថែម៖

កូនបៅទឹកដោះគោម្សៅ ត្រូវប្រយ័ត្នបញ្ហាពុកធ្មេញព្រោះកំប៉ុងទឹកដោះគោ

វេជ្ជ. កុសល កណិការ