ការឈឺចាប់អំឡុងពេលមករដូវ អាចបង្កឡើងដោយកត្តាមួយចំនួន ហើយលក្ខខណ្ឌសុខភាពដទៃទៀត ក៏អាចជាឫសគល់នៃការឈឺចាប់នេះដែរ។ មិនថាយើងអាយុប៉ុន្មាន ស្រីៗយើងតែងប្រឈមនឹងបញ្ហាមួយនេះ ហើយក៏មានអ្នកខ្លះត្រូវប្រើថ្នាំដើម្បីបំបាត់ការឈឺចាប់នេះផងដែរ។
មូលហេតុទូទៅបំផុតសម្រាប់ក្មេងស្រីៗ ដែលមានការឈឺចាប់អំឡុងពេលមករដូវ គឺអាចបណ្ដាលមកពីការមករដូវដំបូង ។ ដោយសារតែរាងកាយផលិតអ័រម៉ូន ដែលបណ្ដាលឲ្យមានការកន្ត្រាក់ស្បូន ជាមួយនឹងការរបើកស្រទាប់ស្បូន ទើបធ្វើឲ្យមានការឈឺចាប់។ ជាទូទៅ ការកន្ត្រាក់ស្បូននេះ អាចធ្វើឲ្យស្រីៗយើងមានអារម្មណ៍ចង្អោរ ចុកពោះ ឈឺជើង ឈឺខ្នង និងឈឺពាសពេញរាងកាយ។ យ៉ាងណាមិញ ការឈឺចាប់ពេលមករដូវដំបូងនឹងថយចុះទៅតាមវ័យ ហើយការឈឺចាប់នេះដែរ កើតឡើងរយៈពេលពីរបីថ្ងៃមុនមករដូវ។
ការឈឺចាប់អំឡុងពេលមករដូវដោយជំងឺអ្វីមួយ
មូលហេតុចម្បងមួយទៀត ដែលបង្កការឈឺចាប់អំឡុងពេលមករដូវ គឺការឈឺចាប់បង្កដោយជំងឺអ្វីមួយ។ ចំណែកឯការឈឺចាប់មួយនេះវិញ អាចកើតឡើងពេញមួយវដ្ដរដូវ ជាមួយនឹងអានុភាពដូចគ្នា។ កត្តាបង្កនៃការឈឺចាប់អំឡុងពេលមករដូវដោយមូលហេតុនេះអាចបណ្ដាលមកពីជំងឺ ឬការឆ្លងមេរោគដែលចាំបាច់ត្រូវការការថែទាំ និងយកចិត្តទុកដាក់ជាបន្ទាន់។ ការឈឺចាប់អំឡុងពេលមករដូវដោយជំងឺអ្វីមួយ មិនត្រឹមតែបង្កការឈឺចាប់ខ្លាំងប៉ុណ្ណោះទេ ប៉ុន្តែថែមទាំងធ្វើឲ្យយើងមករដូវច្រើនថែមទៀតផង។
ពិតណាស់ ថ្វីត្បិតតែកត្តាទាំងពីរខាងលើ ជាមូលហេតុទូទៅនៃការឈឺចាប់អំឡុងពេលមករដូវក៏ពិតមែន ប៉ុន្តែរាងកាយ ក៏ដូចជាប្រតិកម្មទៅនឹងការឈឺចាប់របស់ស្រីៗយើង គឺមិនដូចគ្នាទេ។ មួយវិញទៀត ការឈឺចាប់អំឡុងពេលមករដូវខ្លះ អាចបណ្ដាលមកពីមូលហេតុផ្សេងទៀត ដែលយើងគួរតែទៅពិនិត្យ និងពិគ្រោះយោបល់ជាមួយនឹងគ្រូពេទ្យជំនាញ ទើបជាការប្រសើរ។
ចំណុចសំខាន់
ការឈឺចាប់អំឡុងពេលមករដូវ កើតឡើងជាទូទៅចំពោះស្រ្តីភាគច្រើន។ យើងអាចកាត់បន្ថយអាការៈនេះបាន ដោយការគេងឲ្យគ្រប់គ្រាន់ ញ៉ាំអាហារល្អៗ និងធ្វើលំហាត់ប្រាណជាទៀងទាត់។ ប៉ុន្តែ ប្រសិនបើយើងស្រាប់តែមានអាការៈឈឺចាប់ភ្លាមៗ ទាំងដែលពីមុនមកមិនធ្លាប់ជួបប្រទះបញ្ហានេះទាល់តែសោះ យើងគួរតែទៅពិគ្រោះយោបល់ជាមួយនឹងគ្រូពេទ្យជំនាញ។