វីរុសកូវីដ-១៩ អាចចូលទៅបំផ្លាញសួតធ្ងន់ធ្ងរ ក៏ដូចជាបង្កគ្រោះថ្នាក់ដល់អាយុជីវិតថែមទៀតផង ហើយវីរុសឆ្លងមួយនេះ ក៏មានសមត្ថភាពក្នុងការបំផ្លាញសរីរាង្គជាច្រើនទៀតនៅក្នុងរាងកាយ រួមទាំងបេះដូង ខួរក្បាល និងតម្រងនោម។ ពិតណាស់ កង្វល់ដ៏ធំមួយទៀតនោះ គឺបើទោះបីជាយើងជាសះស្បើយពីវីរុសកូវីដ-១៩ហើយក៏ដោយ ក៏អាចឆ្លងម្ដងទៀតបានដែរ។
ជាទូទៅ ការឆ្លងវីរុសជាលើកដំបូងលើអ្នកដែលបានចាក់វ៉ាក់សាំង មានរោគសញ្ញាស្រាលជាងអ្នកដែលមិនបានចាក់វ៉ាក់សាំង។ ដូចគ្នានេះដែរ ប្រសិនបើយើងឆ្លងម្ដងទៀត នោះរោគសញ្ញានឹងមានសភាពស្រាលជាងមុន ដោយសារតែយើងមានប្រព័ន្ធការពារស្រាប់។ យោងតាមទិន្នន័យនាពេលថ្មីៗនេះបង្ហាញថា សមាមាត្រនៃអ្នកដែលរាយការណ៍ពីរោគសញ្ញានៃការឆ្លងម្ដងទៀត គឺមានភាពខុសៗគ្នា ដោយអាស្រ័យទៅតាមវ៉ារ្យង់ជាក់ស្ដែង។
