បញ្ហារលាកទ្វារមាសដែលបង្កឡើងដោយបាក់តេរីច្រើនជ្រុល កើតឡើងនៅពេលដែលតុល្យភាពបាក់តេរីមានការរំខាន ដោយបាក់តេរីអាក្រក់មានច្រើនជាងបាក់តេរីល្អ។ ការឆ្លងមេរោគទ្វារមាសនេះ កើតឡើងជាទូទៅលើស្ត្រីយើងប្រហែលជា៣៥% ដែលមានអាយុចន្លោះពី១៥ឆ្នាំ ដល់៤៤ឆ្នាំ។ ប្រសិនបើយើងមានបាក់តេរីអាក្រក់នៅទ្វារមាសអំឡុងពេលពពោះ នោះអាចបណ្តាលឲ្យកូនកើតមិនគ្រប់ខែ។ យ៉ាងណាមិញ បញ្ហារោគស្ត្រីមួយនេះ អាចធ្វើការព្យាបាលបានដោយប្រើថ្នាំផ្សះដែលចេញដោយគ្រូពេទ្យជំនាញ និងជួនកាល អាចបាត់ទៅវិញដោយខ្លួនឯង។
រលាកទ្វារមាសដោយបាក់តេរីច្រើនជ្រុលពេលពពោះ បង្កបញ្ហាអ្វីខ្លះ?
រោគសញ្ញានៃការរលាកទ្វារមាសដោយបាក់តេរីច្រើនជ្រុល
- ធ្លាក់ទឹករម្អិលទ្វារមាសមានពណ៌ប្រផេះ
- ទឹករម្អិលទ្វារមាសមានក្លិនឆ្អាប ពិសេសក្រោយពេលរួមភេទ
- រមាស់ ឬរលាកទ្វារមាស
- ឈឺក្នុងទ្វារមាស
- ក្រហាយនៅពេលនោម
រោគសញ្ញានៃបាក់តេរីច្រើនជ្រុលនៅទ្វារមាស ស្រដៀងទៅនឹងការឆ្លងមេរោគទ្វារមាសផ្សេងទៀតផងដែរ ដូច្នេះហើយគ្នាយើងគួរទៅពិនិត្យឲ្យបានច្បាស់លាស់ជាមួយគ្រូពេទ្យជំនាញ។
ហានិភ័យនៃបញ្ហាបាក់តេរីទ្វារមាស
- មិនប្រើស្រោមអនាម័យនៅពេលរួមភេទ
- មានដៃគូរួមភេទច្រើន
- មានផ្ទៃពោះ
ម៉េចបានស្រ្តីពពោះងាយប្រឈមបញ្ហាបាក់តេរីច្រើនជ្រុលនៅទ្វារមាស?
អំឡុងពេលពពោះ អ័រម៉ូនរបស់យើងមានការប្រែប្រួលដែលអាចបណ្តាលឲ្យស្ត្រីពពោះងាយនឹងប្រឈមបញ្ហាបាក់តេរីច្រើនជ្រុលនៅទ្វារមាស។ ក្នុងករណីដែលម៉ាក់ៗប្រឈមនឹងបញ្ហានេះ អំឡុងពេលពពោះ គួរទទួលការព្យាបាលភ្លាមៗ ពីព្រោះបញ្ហានេះ អាចនាំឲ្យកូនសម្រាលមិនគ្រប់ខែ ឬសម្រាលមិនគ្រប់គីឡូ។ ជាទូទៅ ការឆ្លងមេរោគនេះ អាចជាសះស្បើយទាំងស្រុងនៅពេលដែលយើងញ៉ាំថ្នាំផ្សះបានត្រឹមត្រូវតាមវេជ្ជបញ្ជា។
អត្ថបទគួរអាន៖
- ក្រោយសម្រាលកូន បើនៅមានបញ្ហាទាំងនេះ កុំទាន់រួមដំណេក
- ស្បែកយារធ្លាក់ក្រោយសម្រាល សាកអនុវត្តតិចនិក ៥ នេះ
- ក្រោយសម្រាលកូនដើមទ្រូងឡើងសរសៃខៀវខ្វាត់ខ្វែង ធ្វើម៉េចទើបបាត់វិញ?
- ហេតុអ្វីក្រោយសម្រាលកូន ពេទ្យឲ្យម៉ាក់ៗលេបថ្នាំទម្លាក់សត្វល្អិត?
- ហេតុអីសម្រាលកូនរួច វដ្តរដូវម៉ាក់ៗមិនទៀងដូចមុន?
- សម្រាលកូនរួច ពេលណាម៉ាក់ៗអាចងូតទឹកបាន?
ត្រួតពិនិត្យដោយ គ្រូពេទ្យឯកទេស.វេជ្ជ. ចាន់ ស៊ីណេតឯកទេសសម្ភព និងរោគស្ត្រី · មន្ទីរពេទ្យបង្អែកមិត្តភាពកម្ពុជា-ចិន សែនសុខ
អត្ថបទដោយ នូ សោភ័ណ្ឌ · កែ 10/05/2023