សម្រាប់ម៉ាក់ៗមានផ្ទៃពោះពេទ្យនឹងណែនាំឲ្យលេបថ្នាំជាតិដែក និងអាស៊ីដហ្វូលិក ដើម្បីជាជំនួយដល់កូន និងខ្លួនឯង។ ចំពោះថ្នាំអាស៊ីដហ្វូលិកលោកវេជ្ជបណ្ឌិត ច័ន្ទ រស្មី បានផ្ដល់យោបល់ឲ្យស្រីៗត្រៀមខ្លួនយកកូន លេបតាំងពីមុនមានគភ៌ទៅទៀត។
ចំពោះហេតុផលវេជ្ជបណ្ឌិតឯកទេសសម្ភព និងរោគស្ត្រីរូបនោះបញ្ជាក់ថា ស្ត្រីមានគភ៌នៅត្រីមាសដំបូងត្រូវលេបថ្នាំនេះ ១ គ្រាប់ក្នុងមួយថ្ងៃ ជាមួយថ្នាំជាតិដែករយៈពេល ៩០ ថ្ងៃ ដើម្បីការពារកង្វះគ្រាប់ឈាមក្រហម និងការលូតលាស់របស់ទារកក្នុងផ្ទៃឲ្យបានពេញលក្ខណៈ ព្រមទាំងមិនស្លេកស្លាំង។
ចំណែកឯការលេបថ្នាំអាស៊ីដហ្វូលិក ស្ត្រីដែលមានបំណងចង់មានកូនត្រូវលេបវា ១ គ្រាប់ក្នុងមួយថ្ងៃរយៈពេលយ៉ាងហោច ៣ ខែ មុនពេលមានកូន វាអាចជួយឲ្យគភ៌លូតលាស់គ្រប់លក្ខណ: ជាពិសេសអាចការពារបានពីជំងឺឆ្អឹងខ្នងបិទមិនជិត (Spina Bifida) និងទារកឥតលលាដ៍ក្បាល (Anencephaly)។
លោកបានបន្ថែមទៀតថា ក្រៅពីបំពេញអវយវៈឲ្យកូនហើយអាស៊ីដហ្វូលិកនៅមានសារៈសំខាន់ច្រើនយ៉ាងទៀតចាប់ពីការបង្កើត និងជួសជុល DNA ផលិតកោសិកាគ្រាប់ឈាមក្រហមរហូតដល់បំពេញមុខងារដល់ខួរក្បាល។ ជាទូទៅស្ត្រីត្រូវការអាស៊ីដហ្វូលិកប្រហែល ៤០០ មីក្រូក្រាម/ថ្ងៃ ខណៈស្ត្រីមានផ្ទៃពោះត្រូវការ ៤០០-៨០០ មីក្រូក្រាមជាប្រចាំ។
[embed-health-tool-due-date]
ស្ត្រីមានផ្ទៃពោះគួរតែប្រើថ្នាំបំប៉នអាស៊ីដហ្វូលិកនេះជាពិសេស បើសិនជាមិនអាចទទួលបានជីវជាតិមួយនេះគ្រប់គ្រាន់ពីរបបអាហារ ដើម្បីកុំឲ្យកូនកើតមកពិការអវយវៈ។ ដូចនេះក្រៅពីលេបថ្នាំ យើងអាចញ៉ាំចំណីអាហារបន្លែផ្លែឈើមួយចំនួនដូចជា ពពួកគ្រាប់ធញ្ញជាតិ ក្រូច ឪឡឹក ចេក ការ៉ុត ផ្សិត ត្រសក់។ រីឯសាច់វិញមាននៅក្នុងត្រីធូណា សាច់មាន់ ជ្រូក គោ ជាដើម។
ស្ត្រីមានផ្ទៃពោះងាយនឹងកង្វះជីវជាតិមួយនេះណាស់ ហើយនៅពេលខ្វះមិនត្រឹមតែកូនទេ ម៉ាក់ក៏អាចជួយបញ្ហាជាច្រើនដូចជា ខ្សោយ អស់កម្លាំង ឆេវឆាវ ភ្លេចភ្លាំងច្រើន មិនឃ្លានអាហារ និងស្រកទម្ងន់។
អត្ថបទគួរអាន៖
- ក្រោយសម្រាលកូន បើនៅមានបញ្ហាទាំងនេះ កុំទាន់រួមដំណេក
- ស្បែកយារធ្លាក់ក្រោយសម្រាល សាកអនុវត្តតិចនិក ៥ នេះ
- ក្រោយសម្រាលកូនដើមទ្រូងឡើងសរសៃខៀវខ្វាត់ខ្វែង ធ្វើម៉េចទើបបាត់វិញ?
- ហេតុអ្វីក្រោយសម្រាលកូន ពេទ្យឲ្យម៉ាក់ៗលេបថ្នាំទម្លាក់សត្វល្អិត?
- ហេតុអីសម្រាលកូនរួច វដ្តរដូវម៉ាក់ៗមិនទៀងដូចមុន?
- សម្រាលកូនរួច ពេលណាម៉ាក់ៗអាចងូតទឹកបាន?
