ពេលវេលាសម្រាលកូនជាពេលដ៏លំបាកបំផុតរបស់ស្រីៗយើងដែលត្រូវទ្រាំទ្រនឹងការឈឺចាប់ដ៏ពិបាកពណ៌នារាប់ម៉ោង។ ចំពោះស្រីៗដែលធ្លាប់ឆ្លងកាត់ជីវិតជាម្តាយប្រហែលជាមិនសូវចោទជាបញ្ហាខ្លាំងនោះទេ តែបើម៉ាក់ៗដែលទើបមានកូនដំបូងច្បាស់ជាភ័យខ្លាំង មិនដឹងថាអាចទ្រាំ ឬក៏ឆ្លងកាត់ការឈឺចាប់បានដោយរបៀបណាទេ។
លោកស្រី អួង លីដា នាយសាល នៅផ្នែកបន្ទប់សម្រាល នៃមជ្ឈមណ្ឌលជាតិគាំពារមាតា និងទារក បានណែនាំឲ្យស្រីៗគ្នាយើងដែលត្រៀមសម្រាលកូនធ្វើតាម ៤ ចំណុចខាងក្រោមនេះ ដើម្បីកាត់បន្ថយការឈឺចាប់។
១- តាំងអារម្មណ៍ឲ្យល្អ
ទោះជាឈឺពោះតិច ឬខ្លាំង ម៉ាក់ៗត្រូវតាំងអារម្មណ៍ឲ្យបានល្អ ដកដង្ហើមវែងៗ កុំស្លន់ស្លោ ឬបាក់ទឹកចិត្តឲ្យសោះ ទើបអាចទប់ទល់នឹងការឈឺចាប់បានយូរ។ ម៉ាក់ៗត្រូវចាំថា ស្រីៗដទៃអាចឆ្លងកាត់វាបាន យើងក៏អាចឆ្លងកាត់បានដូចគ្នា។
២- ដើរឲ្យបានច្រើន
ពេលកំពុងតែឈឺពោះល្មមៗអាចទ្រាំទ្របាន ម៉ាក់ៗកុំអង្គុយ ឬដេកនៅមួយកន្លែង ត្រូវព្យាយាមដើរចុះដើរឡើង ធ្វើបែបនេះអាចឲ្យយើងបន្លប់ការឈឹពោះបានមួយចំណែក ឬឯក្បាលកូនកាន់តែចុះក្រោមខ្លាំង ឆាប់កើត។
[embed-health-tool-due-date]
៣- ម៉ាស្សាចង្កេះ ឬបាតជើង
ពេលឈឺពោះខ្លាំង ឯកូនក្នុងពោះកាន់តែចំកោង ស្រីៗគ្នាយើង ច្បាស់ជាចុករួយចង្កេះដែលពេលខ្លះចង់ដាច់ចង្កេះក៏មាន។ ការម៉ាស្សា ឬច្របាច់ចង្កេះ និងបាតជើងថ្នមៗដោយពេទ្យឆ្មប ឬប៉ាៗដែលទៅកំដរម៉ាក់ៗ អាចជួយសម្រាលការឈឺចុកចាប់បានខ្លះ។
៤- ងូត ឬត្រាំទឹកក្តៅឧណ្ហៗ
ការងូត ឬត្រាំទឹកក្តៅឧណ្ហៗពេលឈឺពោះពិតជាអាចកាត់បន្ថយអារម្មណ៍តានតឹង និងការឈឺចាប់បានច្រើន ហេតុនេះទើបមានការសម្រាលក្នុងទឹក។ បើពុំអាចងូតទឹកក្តៅឧណ្ហៗបាន យើងអាចត្រាំដៃ-ជើង ឬយកកន្សែងពោះគោជ្រលក់ទឹកក្តៅឧណ្ហៗមកដាក់ត្រង់ចង្កេះដែលឈឺខ្លាំង។
៥- ផឹកទឹកផ្លែឈើផ្អែមៗ
ទឹកផ្លែឈើផ្អែមៗ ដូចជាទឹកត្រឡាច ទឹកសណ្តែក ម៉ាក់ៗអាចផឹកពេលកំពុងឈឺពោះ ដើម្បីជាជំនួយឲ្យមានកម្លាំងក្នុងប្រឹងកើតអាអូន។
អត្ថបទគួរអាន៖
- ក្រោយសម្រាលកូន បើនៅមានបញ្ហាទាំងនេះ កុំទាន់រួមដំណេក
- ស្បែកយារធ្លាក់ក្រោយសម្រាល សាកអនុវត្តតិចនិក ៥ នេះ
- ក្រោយសម្រាលកូនដើមទ្រូងឡើងសរសៃខៀវខ្វាត់ខ្វែង ធ្វើម៉េចទើបបាត់វិញ?
- ហេតុអ្វីក្រោយសម្រាលកូន ពេទ្យឲ្យម៉ាក់ៗលេបថ្នាំទម្លាក់សត្វល្អិត?
- ហេតុអីសម្រាលកូនរួច វដ្តរដូវម៉ាក់ៗមិនទៀងដូចមុន?
- សម្រាលកូនរួច ពេលណាម៉ាក់ៗអាចងូតទឹកបាន?
