តើម៉ាក់ៗណាខ្លះ ដែលដើរចូលបន្ទប់មួយ ហើយមិនដឹងថាខ្លួនចូលទៅបន្ទប់នោះធ្វើអ្វី? ឬកំពុងតែស្វែងរកវ៉ែនតា ដែលកំពុងតែពាក់នៅលើក្បាលរបស់ខ្លួនដែរឬទេ? ប្រសិនបើរឿងរ៉ាវស្រដៀងនេះកើតឡើងម្ដងម្កាល ម៉ាក់ៗមិនចាំបាច់បារម្ភនោះទេ ប៉ុន្តែប្រសិនបើវាកើតឡើងញឹកញាប់ ហើយយើងទើបតែសម្រាលកូនរួចផងនោះ យើងអាចនឹងមានឱកាសកើតមានអាការៈភ្លេចភ្លាំងក្រោយសម្រាល។

ជាទូទៅ អាការៈនេះ កើតឡើងបន្ទាប់ពីមានផ្ទៃពោះ ហើយជួនកាល វាអាចបន្តរហូតដល់រយៈពេល៥ខែ បន្ទាប់ពីសម្រាលកូនរួច។ យោងតាមការសិក្សាមួយ បានបង្ហាញថា នៅពេលដែលយើងក្លាយខ្លួនជាអ្នកម៉ាក់ វាអាចមានឥទ្ធិពលជារៀងរហូតលើមុខងារនៃការយល់ដឹង។ វាក៏អាចធ្វើឲ្យមានការលូតលាស់ខួរក្បាល ហើយថែមទាំងអាចនាំឲ្យមានការផ្លាស់ប្ដូរនៅផ្នែកដែលទទួលខុសត្រូវចំពោះការយល់ដឹងសង្គម និងការអាណិតស្រឡាញ់ផងដែរ។

កត្តាអ្វីដែលបណ្ដាលឲ្យកើតមានការភ្លេចភ្លាំងក្រោយសម្រាល

ជាក់ស្ដែង មានកត្តាជាច្រើនដែលនាំឲ្យកើតមានអាការៈភ្លេចភ្លាំងក្រោយសម្រាលនេះ ហើយកត្តាចម្បងនោះ គឺជាតម្រូវការក្នុងការថែទាំទារកដែលទើបនឹងកើត ដែលជាញឹកញាប់ ម៉ាក់ៗតែងតែលះបង់ការគេងរបស់ខ្លួន។ មូលហេតុនេះហើយ ដែលបណ្ដាលឲ្យខួរក្បាលចុះខ្សោយ ក៏ដូចជាធ្វើឲ្យយើងភ្លេចភ្លាំងច្រើន។ ក្រៅពីនេះ ម៉ាក់ៗដែលមានផ្ទៃពោះឆ្លងកាត់ការផ្លាស់ប្ដូរប្រព័ន្ធប្រសាទក្នុងខួរក្បាល អំឡុងពេល និងក្រោយពេលមានផ្ទៃពោះ ដែលជះឥទ្ធិពលដល់ការចងចាំរបស់ម៉ាក់ៗយ៉ាងខ្លាំង។ ជាធម្មតា បញ្ហានេះនឹងបាត់ទៅវិញដោយខ្លួនឯងទៅតាមពេលវេលា។

យើងគួរដោះស្រាយអាការៈភ្លេចភ្លាំងក្រោយសម្រាលនេះយ៉ាងម៉េច?

ទោះបីជាយើងដឹងថា ការភ្លេចភ្លាំងតិចតួចគឺជាផ្នែកមួយនៃការក្លាយជាអ្នកម៉ាក់ក៏ពិតមែន ប៉ុន្តែ ពេលខ្លះ វាបានក្លាយជារឿងដ៏គួរឲ្យធុញទ្រាន់នៅពេលដែលយើងភ្លេចរឿងសំខាន់ៗ។ អាការៈនេះ មិនមានភាពធ្ងន់ធ្ងរ ឬមានអ្វីដែលគួរឲ្យបារម្ភឡើយ។ យ៉ាងណាមិញ យើងមិនអាចគេចផុតពីផលប៉ះពាល់នៃការមានផ្ទៃពោះនេះបានទេ ប៉ុន្តែម៉ាក់ៗអាចព្យាយាមដោះស្រាយវាបានតាមវិធីសាស្ត្រទាំងនេះ។

១. កត់ត្រាកិច្ចការចាំបាច់ដែលត្រូវធ្វើ

វិធីសាស្ត្រដែលល្អបំផុតដើម្បីដោះស្រាយបញ្ហាភ្លេចភ្លាំង គឺការកត់ត្រាកិច្ចការសំខាន់ៗដែលត្រូវធ្វើ នៅពេលដែលយើងចាំបាច់ត្រូវចងចាំរឿងរ៉ាវជាច្រើន។ ចូររក្សាទុកក្រដាសកត់ត្រានៅជិតខ្លួន ដូច្នេះហើយ យើងអាចកត់ត្រាភ្លាមៗចំពោះរឿងរ៉ាវដែលសំខាន់ៗ។ ជាមួយគ្នានេះដែរ យើងក៏អាចដាក់សំឡេងរោទិ៍ ឬកត់ត្រានៅក្នុងReminder ដែលមាននៅក្នុងទូរសព្ទបានដូចគ្នា។

ភ្លេចភ្លាំងក្រោយសម្រាល២

ចង់គណនាថ្ងៃមេជីវិតញីទុំធ្លាក់ ចុចទីនេះ !

ចង់គណនាថ្ងៃសម្រាលកូន ចុចទីនេះ !

ចង់គណនាទម្ងន់ស្រ្តីពពោះ ចុចទីនេះ !

ចង់ដឹងអត្ថន័យពណ៌ និងរូបរាងលាមកទារក ចុចទីនេះ !

២. គេងឲ្យបានគ្រប់គ្រាន់

ជាទូទៅ ការគេងមិនគ្រប់គ្រាន់ គឺកើតឡើងនៅអំឡុងពេលពីរបីខែដំបូង បន្ទាប់ពីសម្រាលកូនរួច ដោយម៉ោងគេងរបស់ម៉ាក់ៗ ត្រូវផ្អែកទៅលើពេលវេលាគេងរបស់កូនដែលទើបនឹងកើត។ យូរៗទៅ ម៉ាក់ៗច្បាស់ជាមានអារម្មណ៍ហត់នឿយ និងគួរឲ្យធុញទ្រាន់មិនខាន។ ពិតណាស់ ការគេងគ្រប់គ្រាន់ គឺមានសារសំខាន់ណាស់សម្រាប់ដំណើរការធម្មតានៃខួរក្បាល និងរាងកាយរបស់យើង។ ដូច្នេះហើយ ចូររៀបចំពេលវេលាគេងរបស់ម៉ាក់ៗ ឲ្យត្រូវគ្នាជាមួយនឹងអាអូនដែលទើបនឹងកើត ទើបជាការប្រសើរ។

អត្ថបទគួរអាន៖

៣. ថែរក្សាខុសភាពផ្លូវកាយ និងផ្លូវចិត្ត

នៅពេលដែលម៉ាក់ៗមានពេលវេលា ម៉ាក់ៗគួរចូលរួមជាមួយនឹងសកម្មភាពជំនួយដល់រាងកាយ និងការចងចាំ ដោយការលេងហ្គេមផ្គុំពាក្យ ហ្គេមជំនួយប្រាជ្ញា ឬក៏ធ្វើលំហាត់ប្រាណមួយចំនួនទៀត។ ការថែទាំសុខភាពរាងកាយ និងផ្លូវចិត្តអាចជួយកាត់បន្ថយអាការៈភ្លេចភ្លាំងបានមួយកម្រិតផងដែរ។

ចំណុចសំខាន់

ការភ្លេចភ្លាំងក្រោយសម្រាលអាចជារឿងធម្មតាសម្រាប់ស្រីៗយើងដែលទើបសម្រាលកូនរួច ដោយសារតែមានការប្រែប្រួលរាងកាយច្រើនអំឡុងពេលពពោះ និងពេលសម្រាល ក៏ដូចជាការចាប់ផ្ដើមធ្វើជាម៉ាក់ៗគេផងដែរ។ ដើម្បីដោះស្រាយបញ្ហានេះ ម៉ាក់ៗគួរព្យាយាមគេងឲ្យបានគ្រប់គ្រាន់ ថែទាំសុខភាពផ្លូវចិត្ត និងចេះកត់ត្រានូវអ្វីដែលខ្លួនបានធ្វើ ឬត្រៀមនឹងធ្វើ ដើម្បីកុំឲ្យភ្លេចកិច្ចការទាំងនោះ។

ម៉េចបានម៉ាក់ៗភ្លេចភ្លាំង​ក្រោយ​សម្រាល​? ដោះស្រាយ​បែប​ណា​?

​កត្តា​អ្វី​ដែល​បណ្ដាល​ឲ្យ​កើត​មាន​ការ​ភ្លេចភ្លាំង​ក្រោយ​សម្រាល

យើង​គួរ​ដោះស្រាយ​អាការៈ​ភ្លេចភ្លាំង​ក្រោយ​សម្រាល​នេះ​យ៉ាង​ម៉េច​?

​១. កត់ត្រា​កិច្ចការ​ចាំបាច់​ដែល​ត្រូវ​ធ្វើ​

​​​២. គេង​ឲ្យ​បាន​គ្រប់គ្រាន់​

៣. ថែរក្សាខុសភាពផ្លូវកាយ និង​ផ្លូវ​ចិត្ត​​​​