មិនថាប្រុសមិនថាស្រី បើនិយាយពីបញ្ហាកើតឡើងលើប្រដាប់បន្តពូជដូចជាមានអារម្មណ៍អៀនៗ មិនសូវហ៊ានឲ្យអ្នកណាដឹងទេ សូម្បីតែទៅពិគ្រោះជាមួយគ្រូពេទ្យជំនាញក៏មិនចង់ដែរ។ សុខភាពប្រដាប់បន្តពូជ ដូចនឹងសុខភាពទូទៅដែរ បើមិនថែទាំបានល្អទេ ក៏អាចកើតជំងឺបានដែរ ឧទាហរណ៍ដូចជាជំងឺរន្ធនោមត្បៀតតូចលើមនុស្សប្រុសជាដើម។

មន្ទីរពេទ្យ កាល់ម៉ែត ឲ្យដឹងថា ជាធម្មតា បំពង់បង្ហួរនោមរបស់បុរស ជាបំពង់មូល ទន់ និងអាចរីករួមបានក្នុងអំឡុងពេលដែលយើងបត់ជើងតូច។ ការរួមត្បៀតតូចរបស់បំពង់ទឹកនោម ជាការរួមតូចទំហំនៃបំពង់បង្ហួរនោម។ ជំងឺរន្ធនោមត្បៀតតូចរបស់បុរសៗអាចកើតឡើងបានដោយសារមូលហេតុដូចជា៖

រន្ធនោមត្បៀតតូចពីកំណើត ដែលជាករណីកម្រ ព្រោះតែការបើកមិនពេញលេញនូវសន្ទះភ្នាស
រន្ធនោមត្បៀតតូចមកពីកំហុសបច្ចេកទេស ជាករណីដែលច្រើនកើតឡើងជាញឹកញាប់ កើតឡើងនៅក្រោយពេល ដាក់សុងទឹកនោម ឬការលូកចូលនូវឧបករណ៍ថតឆ្លុះ ដែលបណ្ដាលឲ្យរហែកភ្នាសខាងក្នុងរបស់បំពង់បង្ហូរទឹកនោម
រន្ធនោមត្បៀតតូចក្រោយការប៉ះទង្គិចខ្លាំងដែលបណ្ដាលឲ្យរហែកបំពង់បង្ហូរទឹកនោម
រន្ធនោមត្បៀតតូចក្រោយមានការឆ្លងជំងឺ រលាកបំពង់បង្ហូរទឹកនោម

គ្នាយើងប្រុសៗអាចចំណាំមើលរោគសញ្ញានៃជំងឺរន្ធនោមត្បៀតតូចនេះបានដោយសញ្ញាពាក់ព័ន្ធនឹងការស្ទះទឹកនោមដូចជា ពិបាកនោម ទឹកនោមហូរយឺត ហូរដាច់ៗ ឬស្រក់តក់ៗ និងការពិបាកនោមអាចកើតឡើងភ្លាមៗ ឬ ដោយយឺតៗ រហូតដល់នោមលែងចេញ។