ទារកចាប់ពីអាយុ ៦ ខែ ទៅឲ្យម៉ឹមតែទឹកដោះមួយមុខមិនគ្រប់គ្រាន់នោះទេ ម៉ាក់ៗត្រូវផ្តល់អាហារបន្ថែមឲ្យកូន។ អាហារបន្ថែមដំបូងដែលត្រូវផ្តល់ឲ្យក្មេងតូចៗចាប់ពីអាយុ ៦ខែ ឡើង ត្រូវតែជ្រាយ ទន់ ម៉ដ្ត សម្បូរដោយសារជាតិចិញ្ចឹម និងងាយស្រួលរំលាយ។
ក្មេងតូចៗអាចញ៉ាំត្រីសាច់បាន បើសិនជាម៉ាក់ប៉ាធ្វើរបៀបនេះ!
ត្រួតពិនិត្យដោយ វេជ្ជ. ចាន់ ស៊ីណេត · មន្ទីរពេទ្យបង្អែកមិត្តភាពកម្ពុជា-ចិន សែនសុខ
នៅឯកសារស្តីពីការចិញ្ចឹម និងគាំពារទារកនិងកុមារឲ្យមានសុខភាពរាងកាយមាំមួន ប្រាជ្ញាឈ្លាសវៃ បានបញ្ជាក់ថា ពេលចម្អិនបបរខាប់គ្រប់គ្រឿងឲ្យកូនញ៉ាំ យើងត្រូវចម្អិនឲ្យបានឆ្អិនល្អ ផុយ ហើយពាត (កិន) ឲ្យម៉ដ្តល្អ។
តើក្មេងតូចៗអាចញ៉ាំត្រីសាច់បានទេ? ចម្លើយ ក្មេងអាចញ៉ាំបាន តែយើងត្រូវរៀបចំរបៀបនេះ៖
– ត្រី៖ គួរស្ងោរឲ្យឆ្អិនល្អ ហើយបេះឲ្យល្អិតៗ កុំឲ្យដោយឆ្អឹង
– សាច់៖ ត្រូវចិញ្ច្រាំឲ្យម៉ដ្ត ហើយស្ងោរឲ្យបានឆ្អិន និងផុយល្អ
– បន្លែ៖ ត្រូវចិញ្ច្រាំឲ្យម៉ដ្ត ហើយស្ងោរឲ្យបានឆ្អិន និងផុយល្អ។
ខាងក្រោមជាប្រភេទអាហារ និងបរិមាណត្រូវផ្តល់ឲ្យទារកទៅតាមអាយុ៖
១. ក្មេងអាយុ ៦ ខែ
កូនអាយុបាន ៦ ខែ ម៉ាក់ត្រូវបំបៅដោះកូនឲ្យបានញឹកញាប់ មិនថាពេលយប់ ឬពេលថ្ងៃ ហោចណាស់ឲ្យបាន ៨ដង/ថ្ងៃ និងផ្តល់អាហារបន្ថែមឲ្យកូន។
ប្រភេទអាហារ៖ បបរខាប់គ្រប់គ្រឿង ដែលមានត្រីកិនឲ្យម៉ដ្ដ ស៊ុត ឬសាច់ ល្ពៅ
ចំនួនដង៖ ២ដង/ថ្ងៃ
បរិមាណ៖ ២-៣ ស្លាបព្រាបាយ/ពេល។
២. ក្មេងអាយុ ៧-៨ ខែ
ម៉ាក់ៗត្រូវបំបៅដោះកូនឲ្យបានញឹកញាប់ មិនថាពេលយប់ ឬពេលថ្ងៃ ហោចណាស់ឲ្យបាន ៨ ដង/ថ្ងៃ និងផ្តល់អាហារបន្ថែមឲ្យកូន។
ប្រភេទអាហារ៖ បបរខាប់គ្រប់គ្រឿង ដែលមានត្រីកិនឲ្យម៉ដ្ត ស៊ុត ឬសាច់ ល្ពៅ និងបន្លែស្លឹកបៃតងចាស់ដែលពាត ចិញ្ច្រាំម៉ដ្ត។
ចំនួនដង៖ ៣ ដង/ថ្ងៃ
បរិមាណ៖ ៣ ស្លាបព្រាបាយ-កន្លះចានចង្កឹះ/ពេល។
៣. ក្មេងអាយុ ៩-១២ខែ
កូនអាយុបាន ៩-១២ ខែ ម៉ាក់ៗត្រូវបំបៅដោះកូនឲ្យបានញឹកញាប់ មិនថាពេលយប់ ឬពេលថ្ងៃ ហោចណាស់ឲ្យបាន ៦ ដង/ថ្ងៃ និងផ្តល់អាហារបន្ថែមឲ្យកូន។
ប្រភេទអាហារ៖ បបរខាប់គ្រប់គ្រឿង ដែលមានត្រីកិនឲ្យម៉ដ្ត ស៊ុត ឬសាច់ ល្ពៅ និងបន្លែស្លឹកបៃតងចាស់ដែលពាត ចិញ្ច្រាំម៉ដ្ត។
ចំនួនដង៖ ៣ ដង/ថ្ងៃ
បរិមាណ៖ កន្លះ-១ចានចង្កឹះ/ពេល
និងត្រូវផ្តល់បន្ថែមនូវអាហារក្រៅពេល (អាហារសម្រន់) ១ដង/ថ្ងៃ ដូចជាចេកទុំ ល្ហុងទុំ ស្វាយទុំ ចេកស្ងោរ ដំឡូងជ្វា ត្រាវ ជាដើម។
ក្រៅផ្តល់បបរខាប់គ្រប់គ្រឿងឲ្យកូន យើងក៏អាចផ្តល់ចេក ស៊ុតផ្នែកលឿង ដំឡូងជ្វា ឬល្ពៅឲ្យកូនញ៉ាំបានដែរ ដោយយកបន្លែផ្លែឈើទាំងអស់ទៅស្ងោរឲ្យឆ្អិន រួចយកស្លាបព្រាកោសល្អិតៗ និងពាត(កិន)ឲ្យម៉ដ្ត។ ក្រោយពាតរួច បើសិនជាបន្លែផ្លែឈើទាំងនោះស្ងួតពេក ម៉ាក់ៗអាចយកទឹកដោះលាយជាមួយអាហារទាំងនោះឲ្យមានជាតិសើម និងទន់ ដើម្បីឲ្យកូនងាយស្រួលលេប។
បដិសេធ
Hello Health Group និង “Hello គ្រូពេទ្យ” មិនចេញវេជ្ជបញ្ជា មិនធ្វើរោគវិនិច្ឆ័យ ឬព្យាបាលជូនទេ៕
ផ្សព្វផ្សាយពាណិជ្ជកម្មតើអត្ថបទនេះមានប្រយោជន៍ដែរទេ?
ផ្សព្វផ្សាយពាណិជ្ជកម្មផ្សព្វផ្សាយពាណិជ្ជកម្ម