ត្រួតពិនិត្យដោយ វេជ្ជ. ចាន់ ស៊ីណេត · មន្ទីរពេទ្យបង្អែកមិត្តភាពកម្ពុជា-ចិន សែនសុខ
ជាទូទៅ ជំងឺមហារីកមាត់ស្បូនមិនលេចចេញរោគសញ្ញានៅដំណាក់កាលដំបូងឡើយ។ ប៉ុន្តែគ្នាយើងអាចនឹងសង្កេតឃើញរោគសញ្ញាមួយចំនួន នៅពេលដែលជំងឺមហារីកមួយនេះវិវត្តចូលដំណាក់កាលចុងក្រោយ។
ពិតណាស់ មានកត្តាជាច្រើនដែលអាចវិវត្តទៅជាជំងឺមហារីកមាត់ស្បូន។ កត្តាហានិភ័យមួយចំនួន រួមមាន មានដៃគូរួមភេទច្រើន អ្នកមានប្រព័ន្ធភាពស៊ាំខ្សោយ ប្រើប្រាស់គ្រឿងញៀន ឬជក់បារីជាដើម។ យ៉ាងណាមិញ យើងគប្បីតាមដានរោគសញ្ញាទាំងនេះឲ្យបានដិតដល់ មុននឹងយឺតពេល។
បើគ្នាយើងសង្កេតឃើញមានធ្លាក់ឈាមពីទ្វារមាសខុសប្រក្រតី ដូចជាក្រោយរួមភេទរួច ចន្លោះពេលមករដូវ ឬក្រោយពេលអស់រដូវ និងមករដូវច្រើនជាងធម្មតា ព្រមទាំងមានរយៈពេលយូរ អាចជាសញ្ញាព្រមាននៃជំងឺមហារីកមាត់ស្បូនហើយ។
ជាមួយគ្នានេះដែរ ការធ្លាក់ទឹករម្អិលអាចជាសញ្ញាព្រមាននៃបញ្ហាសុខភាពជាច្រើនប្រភេទ រួមទាំងជំងឺមហារីកមាត់ស្បូនដែរ។ ការធ្លាក់ទឹករម្អិលនេះ អាចមានពណ៌ស្លេកពណ៌ត្នោត ឬពណ៌ផ្កាឈូក ហើយក្រៅពីនេះ ក៏អាចមើលទៅដូចទឹក ឬមានឈាម ដោយមានក្លិនមិនល្អ ឬគ្មានក្លិនតែម្ដង។
ក្លិនឆ្អេះឆ្អាបចេញពីទ្វារមាសក៏អាចជាសញ្ញានៃជំងឺមហារីកមាត់ស្បូន ដែលកើតឡើងដោយសារតែសំណល់សេសសល់ក្នុងជញ្ជាំងទ្វារមាស និងបង្កើតបាក់តេរីប្រភេទជាក់លាក់មួយ។
អាការៈឈឺចាប់នៅពេលរួមភេទ ក៏អាចជាសញ្ញាព្រមាននៃជំងឺមហារីកមាត់ស្បូនដូចគ្នា។ ដូច្នេះហើយ សម្រាប់ស្រីៗដែលជួបប្រទះនឹងបញ្ហាមួយនេះ ចូរពិគ្រោះយោបល់ជាមួយនឹងគ្រូពេទ្យរោគស្រ្តី ទើបជាការប្រសើរ។
ការឈឺចាប់នៅតំបន់អាងត្រគាក ឬឈឺពោះអាចជាសញ្ញាព្រមានមួយទៀតនៃជំងឺមហារីកមាត់ស្បូន។ ក្រុមគ្រូពេទ្យបានឲ្យដឹងថា អ្នកជំងឺមហារីកមាត់ស្បូនអាចជួបរោគសញ្ញានេះនៅដំណាក់កាលដំបូង ប៉ុន្តែក៏អាចនឹងមានការភ័ន្តច្រឡំទៅនឹងជំងឺមួយចំនួនទៀត ដែលធ្វើឲ្យយើងមានការពិបាកក្នុងការកំណត់ជំងឺដោយខ្លួនឯង។
បន្ថែមពីនេះ ការឈឺចាប់នៅពេលនោម និងនៅពេលបន្ទោបង់ក៏អាចជាសញ្ញាព្រមាននៃជំងឺមហារីកមាត់ស្បូន។ លើសពីនេះ រោគសញ្ញាមួយទៀតដ៏គួរឲ្យខ្លាចនោះ គឺនោមមានឈាម ដែលទាមទារឲ្យយើងត្រូវទៅពិនិត្យសុខភាពដោយគ្រូពេទ្យជំនាញភ្លាមៗ។
អត្ថបទគួរអាន៖
បដិសេធ
Hello Health Group និង “Hello គ្រូពេទ្យ” មិនចេញវេជ្ជបញ្ជា មិនធ្វើរោគវិនិច្ឆ័យ ឬព្យាបាលជូនទេ៕
ផ្សព្វផ្សាយពាណិជ្ជកម្មតើអត្ថបទនេះមានប្រយោជន៍ដែរទេ?
ផ្សព្វផ្សាយពាណិជ្ជកម្មផ្សព្វផ្សាយពាណិជ្ជកម្ម
