មកទល់ពេលនេះ គេមិនទាន់ដឹងច្បាស់លាស់ពីមូលហេតុដែលនាំឱ្យកើតជំងឺមហារីកសុដន់ នៅឡើយទេ ហេតុនេះ ស្រីៗតម្រូវឱ្យតាមដានសុខភាព និងពិនិត្យសុដន់ឱ្យបានដិតដល់។ ក្នុងករណីមានប្រវត្តិគ្រួសារ ទោះខាងឪពុក ខាងម្តាយ ឬមានសមាជិកគ្រួសារកើតជំងឺមហារីកសុដន់ លោកសាស្ត្រាចារ្យវេជ្ជបណ្ឌិត អ៊ាវ សុខា ថាយើងត្រូវជួបគ្រូពេទ្យជំនាញខាងជំងឺមហារីក។
បើតាមវេជ្ជបណ្ឌិតឯកទេសជំងឺមហារីក និងឈាមលោក អ៊ាវ សុខា បើមានប្រវត្តិគ្រួសារកើតជំងឺមហារីកសុដន់ យើងត្រូវពិនិត្យសុដន់តាំងពីអាយុ២០ឆ្នាំ។ កាលពីមុនគ្រូពេទ្យជំនាញត្រឹមថតសុដន់មើលប៉ុណ្ណោះ តែបច្ចុប្បន្នបច្ចេកវិទ្យាទំនើប យើងអាចបូមឈាមស្រ្តីនោះទៅមើលហ្សែនដែលឲ្យកើតមហារីកសុដន់ អាចដឹងថាប្រឈមនឹងជំងឺមហារីកសុដន់ ឬអត់។
បើសិនជាលទ្ធផលបញ្ជាក់ថា អត់មានហ្សែនដែលដូរទ្រង់ទ្រាយឲ្យកើតជំងឺមហារីកនោះទេ មានន័យថាស្ត្រីនោះអត់មានហានិភ័យកើតជំងឺមហារីកសុដន់នោះទេ ទោះបីជាគ្រួសារមានប្រវត្តិកើតជំងឺមហារីកសុដន់ក៏ដោយ។
