ក្រោយសម្រាលរួច ម៉ាក់ៗភាគច្រើនជួបបញ្ហាឆាប់ប្រែប្រួលអារម្មណ៍ដូចជា ឆាប់តូចចិត្ត ខឹង ឆេវឆាវ ឬនៅសុខៗក៏ចង់យំជាដើមដែលបណ្តាលឱ្យម៉ាក់ៗភាគច្រើនតែងតែយល់ថា ខ្លួនមាន ជំងឺធ្លាក់ទឹកចិត្តក្រោយសម្រាល ដោយពុំដឹងថា ម៉ាក់ៗអាចគ្រាន់តែមានបញ្ហាសោកសៅក្រោយសម្រាលទេ។ ចឹងធ្វើម៉េចដឹងថា ម៉ាក់ៗមានជំងឺធ្លាក់ទឹកចិត្តក្រោយសម្រាល ឬគ្រាន់តែសោកសៅក្រោយសម្រាល?
ខាងក្រោមជាភាពខុសគ្នារវាងរោគសញ្ញា និងអាការៈភាពសោកសៅក្រោយសម្រាល និងជំងឺធ្លាក់ទឹកចិត្តក្រោយសម្រាល។
១. ភាពសោកសៅក្រោយសម្រាល
ក្នុងអំឡុងពេលពពោះ រាងកាយម៉ាក់ៗមានការកើនឡើងខ្លាំងនូវ អ័រម៉ូនអ៊ឹស្ត្រូសែន និងប្រូហ្សេស្តេរ៉ូន ប៉ុន្តែបន្ទាប់ពីសម្រាលរួច អ័រម៉ូនទាំងពីរនេះមានការធា្លក់ចុះយ៉ាងគំហុក។ ការប្រែប្រួលយ៉ាងខ្លាំងនេះហើយដែលបណ្តាលឱ្យម៉ាក់ៗមួយចំនួនធំមានអារម្មណ៍សោកសៅក្រោយសម្រាល។
ម៉ាក់ៗមួយចំនួនអាចចាប់ផ្តើមមានអារម្មណ៍សោកសៅក្នុងអំឡុងពេលពីរបីថ្ងៃបន្ទាប់ពីសម្រាលរួច ហើយនឹងមានអារម្មណ៍សោកសៅខ្លាំងក្នុងអំឡុងពេលមួយសប្តាហ៍ ប៉ុន្តែអារម្មណ៍សោកសៅនេះនឹងថយបន្តិចម្តងៗ និងបាត់ទៅវិញដោយឯកឯងក្នុងរយៈពេលពីរសប្តាហ៍។
ក្នុងអំឡុងពេលនេះ ម៉ាក់ៗអាចឆាប់ប្រែប្រួលអារម្មណ៍ដែលមានរោគសញ្ញាដូចខាងក្រោម ៖
- សោកសៅ
- យំដោយគ្មានហេតុផលជាក់លាក់
- ធុញថប់
- ឆាប់ខឹង
- បាត់បង់ចំណង់អាហារ
- ពិបាកគេង
- ពិបាកផ្ចង់អារម្មណ៍
- ថប់បារម្ភ
ចង់គណនាថ្ងៃសម្រាលកូន ចុចទីនេះ!
ចង់គណនាទម្ងន់ស្រ្តីពពោះ ចុចទីនេះ!
ចង់គណនាថ្ងៃមេជីវិតញីទុំធ្លាក់ ចុចទីនេះ!
ចង់ដឹងអត្ថន័យពណ៌ និងរូបរាងលាមកទារក ចុចទីនេះ!
២. ជំងឺធ្លាក់ទឹកចិត្តក្រោយសម្រាល
បន្ទាប់ពីសម្រាលរួច ការថយចុះយ៉ាងខ្លាំងនៃកម្រិតអ័រម៉ូនអ៊ឹស្ត្រូសែន និងប្រូហ្សេស្តេរ៉ូន បូករួមនឹងសម្ពាធក្នុងការមើលថែទាំកូន ការគេងពុំបានគ្រប់គ្រាន់ ភាពនឿយហត់ក្នុងការមើលកូន ការឈឺចាប់មុខរបួស ការប្រែប្រួលជីវភាពក្រោយពេលកូនកើតមក ការប្រែប្រួលរូបរាងដែលអាចធ្វើឱ្យម៉ាក់ៗលែងមានភាពជឿរជាក់លើខ្លួនឯង ការលែងមានភាពផ្អែមល្ហែមរវាងប្តីប្រពន្ធដូចពេលកូនមិនទាន់កើត។ល។ ជាដើមចមនៃការធ្វើឱ្យម៉ាក់មានជំងឺធ្លាក់ទឹកចិត្តក្រោយសម្រាល ឬយើងតែងតែហៅថា ជំងឺបាក់ទឹកចិត្តក្រោយសម្រាល។
[embed-health-tool-vaccination-tool]
ម៉ាក់ៗមួយចំនួនអាចមានជំងឺធ្លាក់ទឹកចិត្តក្រោយសម្រាល ក្នុងរយៈពេលមួយទៅបីសប្តាហ៍បន្ទាប់ពីសម្រាលរួច តែពេលខ្លះ ម៉ាក់ៗមួយចំនួនអាចធ្លាក់ទឹកចិត្តក្រោយសម្រាល បន្ទាប់ពីសម្រាលរួចបានមួយឆ្នាំក៏មាន។ ជំងឺធ្លាក់ទឹកចិត្តក្រោយសម្រាលអាចប៉ះពាល់ដល់សមត្ថភាពម៉ាក់ៗក្នុងការបំពេញកិច្ចការប្រចាំថ្ងៃ ដូចជាការមើលថែទាំកូន ញ៉ាំ គេង និងធ្វើការងារផ្សេងៗជាដើម។ ម៉ាក់ៗដែលធ្លាក់ទឹកចិត្តក្រោយសម្រាលអាចមានរោគសញ្ញា និងអាការៈដូចជា៖
- ធ្លាក់ទឹកចិត្ត
- ថប់បារម្ភ
- សោកសៅ
- ឆាប់ប្រែប្រួលអារម្មណ៍ ឬឆាប់ខឹង
- អស់សង្ឃឹម
- ពិបាកគេង
- រអៀសខ្លួន
- នៅតែឯង ឬផ្តាច់ខ្លួនចេញពីអ្នកនៅជុំវិញខ្លួន
- យល់ថាខ្លួនគ្មានតម្លៃ
- មិនចង់ស្និទ្ធស្នាលជាមួយកូន
- រវើរវាយ
- មានចំណងធ្វើបាបខ្លួនឯង ឬកូន
- មានបំណងគិតខ្លី
ជំងឺធ្លាក់ទឹកចិត្តក្រោយសម្រាលអាចមានរោគសញ្ញា និងអាការៈដូចការមានអារម្មណ៍សោកសៅក្រោយសម្រាលដែរ គ្រាន់តែមានរយៈពេលយូរជាង និងធ្ងន់ធ្ងរជាង។ បើក្រោយសម្រាលម៉ាក់ៗឆាប់ប្រែប្រួលអារម្មណ៍ យំដោយគ្មានហេតុផល សោកសៅ ពិបាកគេង និងឆាប់ខឹងជាដើមលើសពីពីរសប្តាហ៍ មានន័យថាម៉ាក់ៗអាចមានជំងឺធ្លាក់ទឹកចិត្តក្រោយសម្រាលហើយ ម៉ាក់ៗគួរទៅពិគ្រោះជាមួយគ្រូពេទ្យផ្នែកចិត្តសាស្រ្តដើម្បីទទួលការព្យាបាល។
អត្ថបទគួរអាន៖
- គួរដឹង! ទាំងនេះជាគន្លឹះថែរក្សាសុខភាពថ្លើមពេលកំពុងពពោះ
- ភាពតានតឹងផ្លូវចិត្ត អាចធ្វើឲ្យយើងប្រឈមបញ្ហាអត់កូន
- តិចនិចមួយចំនួន ជួយដោះស្រាយបញ្ហាមិនស្រួលសុដន់ពេលពពោះ
- ហេតុអ្វីគួរធ្វើតេស្តរកជំងឺកាមរោគពេលពពោះ?
- ឆ្លងប្រមេះទឹកបាយពេលពពោះអាចគ្រោះថ្នាក់ទាំងម្តាយ និងកូន
- គួរដឹង! ជំងឺឆ្លងពីលាមកឆ្មាអាចបណ្តាលឱ្យកូនក្នុងផ្ទៃគ្រោះថ្នាក់ ឬពិការ
វីដេអូពាក់ព័ន្ធ៖ ម៉េចបានធ្លាក់ទឹកចិត្តពេលពពោះនិងក្រោយសម្រាល?
ចំណុសំខាន់
- បើក្រោយសម្រាល ម៉ាក់ៗឆាប់ប្រែប្រួលអារម្មណ៍ យំដោយគ្មានហេតុផល សោកសៅ ពិបាកគេង ឆាប់ខឹងជាដើម ប៉ុន្តែអាការៈទាំងនេះបាត់ទៅវិញដោយឯកឯងក្នុងរយៈពេលពីរសប្តាហ៍នោះ ម៉ាក់ៗគ្រាន់តែមានអារម្មណ៍សោកសៅក្រោយសម្រាលប៉ុណ្ណោះ។
- តែបើម៉ាក់ៗមានអាការៈដូចរៀបរាប់ខាងដើមលើសពីពីរសប្តាហ៍ ហើយអាការៈកាន់តែធ្ងន់ធ្ងរទៅៗ ដែលប៉ះពាល់ដល់សមត្ថភាពម៉ាក់ៗក្នុងការបំពេញកិច្ចការប្រចាំថ្ងៃ និងមានបំណងបាបខ្លួនឯង និងកូនជាដើម ម៉ាក់ៗគួរទៅពិគ្រោះជាមួយវេជ្ជបណ្ឌិតផ្នែកចិត្តសាស្រ្ត ព្រោះទាំងនេះជាសញ្ញាធ្លាក់ទឹកចិត្តក្រោយសម្រាល។
