ទារកគេងច្រើន ជាពិសេសទារកទើបកើត។ ទារកទើបកើតគេងប្រហែល ១៦-២០ ម៉ោងក្នុងមួយថ្ងៃ ប៉ុន្តែទារកទើបកើតក្រោមអាយុ ១ ខួបងាយមានហានិភ័យស្លាប់ភ្លាមៗដោយសារការគេងណាស់។ តើម៉ាក់ប៉ាគួរដាក់ទារកទើបកើតគេងបែបណា និងក្នុងបរិយាកាសបែបណាទើបមានសុវត្ថិភាព?
- ដាក់ទារកគេងផ្ងារគ្រប់ពេលដើម្បីការពារការថប់ដង្ហើមពេលកំពុងគេង
- កន្លែងគេងរបស់ទារកត្រូវរាបស្មើ និងមិនទន់ពេក ព្រោះពូក ឬកម្រាលទន់ៗមិនអាចទ្រទម្ងន់អូនតូចបានល្អដែលធ្វើឱ្យអូនតូចទ្រុឌចុះក្រោមដែលអាចបាំងមុខ ឬច្រមុះអូនតូច
- ដាក់ទារកឱ្យគេងដាច់តែឯង ចៀសវាងម៉ាក់ប៉ាគេងសង្កត់ពីលើអូនតូចដែលធ្វើឱ្យអូនតូចថប់ដង្ហើម
- មិនត្រូវដាក់របស់របរនៅកន្លែងគេងទារកទេ ព្រោះអាចបាំងមុខ ឬច្រមុះអូនតូច
- កន្លែងគេងទារកមិនត្រូវមានផ្សែងទេ ព្រោះអាចបណ្តាលឱ្យទារកពុល ឬពិបាកដកដង្ហើម
- មិនត្រូវដាក់អូនតូចគេងពោបលើម៉ាក់ប៉ាទេដែលអាចបណ្តាលឱ្យថប់ដង្ហើម
- ចៀសវាងដណ្តប់ភួយឱ្យទារក ព្រោះភួយអាចគ្របមុខ និងច្រមុះអូនតូច ប្រសិនបើអូនតូចរើ ឬក្រឡាប់