ទឹកដោះម្តាយល្អបំផុតចំពោះទារក ដូច្នេះហើយទើបអង្គការសុខភាពពិភពលោក និងក្រសួងសុខាភិបាល ណែនាំឲ្យម៉ាក់ៗបំបៅដោះកូនកូនមួយមុខគត់ឲ្យបានយ៉ាងតិច ៦ ខែ។ ទោះជាបែបនេះក្តី ម៉ាក់ៗមួយចំនួនពុំបានដំបៅដោះកូនជាប់លាប់ទេ ដោយសាររវល់នឹងការងារ ឬពុំសូវសម្បូរទឹកដោះឲ្យអូនៗម៉ឹម។
លោកជំទាវវេជ្ជបណ្ឌិត ប្រាក់ សោភ័ណនារី អនុរដ្ឋលេខាធិការ ក្រសួងសុខាភិបាល បានផ្តល់ជាដំបូន្មានពីវិធីងាយៗ ៣ ចំណុច ជួយឲ្យម៉ាក់ៗសម្បូរទឹកដោះសម្រាប់កូនម៉ឹម ក្នុងនោះមាន ញ៉ាំអាហារចម្រុះមុខ ឲ្យកូនបៅដោះញឹកញាប់ និងញ៉ាំទឹកឲ្យបានច្រើន។
១- ញ៉ាំអាហារចម្រុះមុខ
កាលណាម៉ាក់ញ៉ាំអាហារចម្រុះមុខ ទឹកដោះក៏សម្បូរទៅតាមនោះដែរ។ ការញ៉ាំអាហារចម្រុះមុខមានន័យដូចម្តេច? គឺម៉ាក់ៗត្រូវញ៉ាំអាហារសម្បូរជីវជាតិឲ្យបានគ្រប់គ្រាន់ មានទាំងត្រី សាច់ ស៊ុត បន្លែផ្លែឈើ ពិសេសពពួក សម្ល ឬស៊ុប ចៀសវាងការញ៉ាំអាហារក្រៀមក្រោះ ដូចជាសាច់ប្រឡាក់អាំង អាហារហឹរ ឬផ្អាប់។
ចង់ដឹងអត្ថន័យពណ៌ និងរូបរាងលាមកទារក ចុចទីនេះ!
២- ឲ្យកូនបៅដោះញឹកញាប់
ការញ៉ាំអាហារចម្រុះតែមួយមុខមិនគ្រប់គ្រាន់ទេ ទឹកដោះកាន់តែចេញច្រើន លុះត្រាម៉ាក់ៗឲ្យកូនបៅដោះញឹកញាប់ និងទៀងទាត់ដែរ។ ” សុដន់ស្រីៗយើងប្រៀបបានទៅនឹងអណ្តូងស្នប់អ៊ីចឹង កាលណាកូនជញ្ជក់ក្បាលដោះ នោះដោះយើងនឹងផលិតទឹកដោះបន្ថែមទៀតលឿន” លោកជំទាវវេជ្ជបណ្ឌិត ប្រាក់ សោភ័ណនារី បញ្ជាក់។
![ម្តាយបំបៅដោះកូន](https://cdn.hellokrupet.com/wp-content/uploads/2019/03/បំបៅដោះកូន២.jpg)
៣- ផឹកទឹកឲ្យបានច្រើន
ម៉ាក់ៗត្រូវញ៉ាំទឹកឲ្យបានច្រើន នោះបរិមាណនៃការផលិតទឹកដោះក៏ច្រើនដូចគ្នា។ ក្នុងទឹកដោះម៉ាក់មានជាតិទឹកដល់ ៨០% ឯណោះ។
ម៉ាក់ៗធ្វើបានប៉ុន្មានចំណុចខាងលើ ដឹងតែសម្បូរទឹកដោះ អាអូនសប្បាយម៉ឹមមិនខានទេ។