ម៉ាក់ប៉ាប្រសិនបើសង្កេតឃើញប្រដាប់ភេទកូនប្រុសមានសភាពមិនស្មើ ឬឡើងប៉ោងធំ បណ្ដាលឲ្យឈឺចាប់យំស្រែកមិនឈប់ គួរតែប្រញាប់ទៅជួបគ្រូពេទ្យ ហើយប្រសិនបើគ្រូពេទ្យរកឃើញថាមានជំងឺពោះវៀនធ្លាក់ចូលពងស្វាស ត្រូវស្វែងរកវិធីព្យាបាលភ្លាម។
លោកវេជ្ជបណ្ឌិត ចាន់ ស៊ីណេត ឯកទេសជំងឺទូទៅ បានឲ្យដឹងថាក្មេងប្រុសៗទាំងអស់អាចកើតមានជំងឺនេះ ប៉ុន្តែកើតមានភាគច្រើនចំពោះទារកទើបកើតភាគច្រើនជាង។ ជាធម្មតាជំងឺពោះវៀនធ្លាក់ចូលពងស្វាសនេះ ពិបាកសម្គាល់ណាស់ពេលដំបូងៗ ទាល់តែកូនចេះដើរទើបអាចមើលដឹង។ ចំពោះមូលហេតុវិញ ព្រោះដោយសាច់ដុំត្រង់ពោះខ្សោយធ្វើឲ្យធ្លាក់ពោះវៀនចូលទៅក្នុងថង់ពងស្វាស ឯជញ្ជាំងពោះមានចន្លោះប្រហោង ទើបធ្វើឲ្យមានថ្នក់ក្នុងពងស្វាស និងបណ្ដាលទៅជាឈឺចាប់ខ្លាំង ជាពិសេសនៅពេលក្អក ឱន ឬលើករបស់របរធ្ងន់ៗ។ យើងអាចដឹងដោយសារមានសម្ពាធក្នុងពោះកើតឡើង និងមានប៉ោងឡើងនៅតំបន់ក្រលៀនកូន។
