អាការៈចាញ់កូនចាប់ផ្តើមថយក្នុងសប្តាហ៍នេះ ខ្លួនយើងហាក់ធូរស្បើយ និងមានកម្លាំងហែងជាងមុនបន្តិច។ យ៉ាងណាមិញ កុំទាន់គិតថារួចខ្លួនអី អាការៈមួយចំនួនផ្សេងទៀត ដូចជាការទល់លាមកអាចកើតឡើងក្នុងសប្តាហ៍នេះ។ បម្រែបម្រួលអ័រម៉ូនពេលមានផ្ទៃពោះ អាចឲ្យសាច់ដុំសរីរាង្គរំលាយអាហារមួយចំនួនធ្វើការយឺតជាងមុន ដូច្នេះយើងពិបាកបន្ទោរបង់លាមក ឬក៏អាចបន្ទោរបង់រាល់ ៣ ថ្ងៃ/ម្តង។
ដើម្បីកាត់បន្ថយបញ្ហាទល់លាមកនេះ គួរព្យាយាមញ៉ាំទឹក អាហារជាតិសរសៃឲ្យបានច្រើន ដូចជា ផ្លែឈើស្រស់ៗ (ល្ហុង ឪឡឹក និង ចេកទុំ) បន្លែឆៅ (គប្បីលាងសម្អាតឲ្យស្អាតជាមុនសិន) និង នំបុ័ងដែលមានគ្រាប់ធញ្ញជាតិច្រើន ជៀសវាងការអង្គុយមួយកន្លែងយូរពេក។ ការធ្វើបែបនេះអាចជួយឲ្យប្រព័ន្ធរំលាយអាហារធ្វើការលឿនជាងមុន កាត់បន្ថយអាការៈមិនរំលាយអាហារ និងហើមពោះ។