បញ្ហាផ្ទៃពោះ Archives - Page 18 of 55

បញ្ហាទ្វារមាសកើតឡើងទូទៅ អំឡុងពេលពពោះ ម៉ាក់ៗគួរយកចិត្តទុកដាក់

អំឡុងពេលពពោះ ម៉ាក់ៗតែងប្រឈមនឹងការប្រែប្រួលជាច្រើនចំពោះរាងកាយ ហើយកង្វះអនាម័យ អាចធ្វើឲ្យយើងជួបប្រទះបញ្ហាទ្វារមាសមួយចំនួន ដែលយើងគួរយកចិត្តទុកដាក់ឲ្យដិតដល់។ បញ្ហាទ្វារមាសទាំង៥ ដែលកើតឡើងជាទូទៅអំឡុងពេលពពោះ និងវិធីដោះស្រាយ ១. ការធ្លាក់ទឹករម្អិលទ្វារមាសកើនឡើង ការធ្លាក់ទឹករម្អិលទ្វារមាសនេះ មានសភាពស្តើង ពណ៌ស ខាប់ និងមានក្លិនតិចតួច។ បញ្ហាមួយនេះ កើតឡើងដោយសារតែការប្រែប្រួលអ័រម៉ូន និងការកើនឡើងលំហូរឈាមទៅកាន់តំបន់អាងត្រគាក។ យ៉ាងណាមិញ ម៉ាក់ៗអាចដោះស្រាយបញ្ហាមួយនេះ ដោយការពាក់ខោទ្រនាប់ធ្វើពីកប្បាស ដែលអាចឲ្យខ្យល់ចេញចូលបាន។ ជៀសវាងប្រើផលិតផលសម្អាតទ្វារមាសដែលមានជាតិកាត់ខ្លាំង និងចាំបាច់ត្រូវពិគ្រោះជាមួយនឹងគ្រូពេទ្យជំនាញ ក្នុងករណីដែលការធ្លាក់ទឹករម្អិលមានពណ៌មិនប្រក្រតី មានក្លិនឆួល (Foul-smelling) ឬអមជាមួយនឹងអាការៈរមាស់។ គណនាថ្ងៃសម្រាលកូន គណនាទម្ងន់ស្ត្រីអំឡុងពពោះ ២. ការឆ្លងមេរោគផ្សិត អ័រម៉ូនពពោះ និងបញ្ហាប្រព័ន្ធភាពស៊ាំចុះខ្សោយ អាចបង្កឲ្យមានការលូតលាស់នូវពពួកផ្សិត និងបណ្តាលឲ្យកើតមានការឆ្លងមេរោគផ្សិត។ រោគសញ្ញាអាចរួមមាន៖ រមាស់ ក្រហាយ និងមានធ្លាក់ទឹករម្អិលខាប់ និងមានពណ៌ស។ ដើម្បីបញ្ចៀស និងគ្រប់គ្រងការឆ្លងមេរោគផ្សិតប្រកបដោយប្រសិទ្ធភាព ម៉ាក់ៗគួរថែទាំអនាម័យឲ្យបានល្អ ដោយរក្សាតំបន់ពិសេសឲ្យស្ងួត និងស្អាត។ បន្ថែមពីនេះ យើងក៏ចាំបាច់ត្រូវញ៉ាំរបបអាហារតុល្យភាព និងពិគ្រោះជាមួយនឹងអ្នកជំនាញដើម្បីទទួលការព្យាបាលពពួកផ្សិត ក្នុងករណីចាំបាច់។ ៣. ការបង្ករោគលើផ្លូវទឹកនោម បញ្ហាមួយនេះ ក៏ឧស្សាហ៍កើតឡើងចំពោះស្ត្រីពពោះដូចគ្នា ដែលអាចបណ្តាលមកពីសម្ពាធនៃស្បូនកំពុងលូតលាស់លើប្លោកនោម ដែលពន្យឺតលំហូរទឹកនោម និងរារាំងការបញ្ចេញចោលទាំងស្រុងនៃទឹកនោម។ រោគសញ្ញានៃជំងឺមួយនេះ រួមមាន នោមញឹកញាប់ ក្រហាយ និងឈឺចាប់នៅផ្នែកខាងក្រោមពោះ។ វិធីសាស្ត្រនៃការបង្ការ គឺយើងចាំបាច់ត្រូវញ៉ាំទឹកឲ្យបានច្រើន […]

បញ្ហាផ្ទៃពោះ

ស្រីៗពពោះច្រើនជួបបញ្ហាហ្គាសក្នុងពោះ សាកវិធីនេះជួយដោះស្រាយបានខ្លះ

ស្រីៗមានផ្ទៃពោះតែងជួបប្រទះបញ្ហាជាតិហ្គាសក្នុងពោះ។ អាការៈនេះកើតដោយសារការកើនឡើងនៃអ័រម៉ូន progesterone ដែលអ័រម៉ូននេះជាធម្មតាសម្រួលដល់ពោះវៀនអំឡុងពេលពពោះ តែក៏អាចពន្យឺតការរំលាយអាហារ នាំឲ្យមានការទល់លាមក និងហើមពោះជាដើម។ ភាគច្រើនស្ត្រីពពោះតែងជួបប្រទះបញ្ហានេះនៅត្រីមាសទី៣។ ទោះបីជាមិនមានវិធីក្នុងការបង្ការអាការៈនេះបាន ប៉ុន្តែមានវិធីអាចបន្ធូរបន្ថយអាការៈបាន។ ១. ផឹកទឹកឲ្យច្រើន យោងតាមវិទ្យាស្ថានវេជ្ជសាស្ត្រជាតិសហរដ្ឋអាមេរិក ស្ត្រីពពោះគួរផឹកទឹក ២,៣លីត្រក្នុងមួយថ្ងៃ។ ការផឹកទឹកមុន និងក្រោយញ៉ាំអាហារអាចជួយដល់ការរំលាយអាហារបាន។ អាហារដែលមិនអាចរំលាយបាននឹងទៅនៅក្នុងពោះវៀនតូចដែលបាក់តេរីនឹងបំបែកអាហារទាំងនោះ និងបង្កជាតិហ្គាសពេលបំបែក។ ដូចនេះការផឹកទឹកអាចជួយបន្ថយការកើនឡើងនៃហ្គាស។ ម៉្យាងទៀត ការផឹកទឹកអាចជួយបង្ការការទល់លាមកដែលជាមូលហេតុមួយទៀតក្នុងការបង្កជាតិហ្គាស។ នៅពេលខ្វះជាតិទឹក លាមកស្ងួត និងរឹង ហើយការផឹកទឹកច្រើនអាចជួយបន្ទន់លាមក។ យកល្អគួរផឹកម្ដងបន្តិចៗ កុំផឹកម្ដងច្រើនៗពេក។ ២. ចៀសវាងភេសជ្ជៈទាំងនេះ ស្ត្រីពពោះមួយចំនួនអាចមានអាការៈនេះក្រោយផឹកភេសជ្ជៈមួយចំនួនដូចជាភេសជ្ជៈមានជាតិហ្គាស (ទឹកក្រូច ឬភេសជ្ជៈកីឡា) ភេសជ្ជៈមានជាតិស្ករ Fructose និងភេសជ្ជៈមានជាតិស្ករ Sorbitol។ ៣. ហាត់ប្រាណឲ្យបានទៀងទាត់ ការស្រាវជ្រាវបានបង្ហាញថាការហាត់ប្រាណអាចពន្លឿនការរំលាយអាហារ និងបន្ថយការទល់លាមក។ សម្រាប់ស្ត្រីមានផ្ទៃពោះអាចហាត់ប្រាណដោយការដើរយ៉ាងតិច៣០នាទីក្នុងមួយថ្ងៃ។ ចំណែកឯលំហាត់ប្រាណផ្សេងទៀតគួរពិគ្រោះជាមួយគ្រូពេទ្យជាមុនសិន។ ៤. ពាក់អាវរលុង សម្លៀកបំពាក់ដែលរឹបនៅចង្កេះអាចបន្ថែមសម្ពាធទៅលើពោះបាន និងអាចបង្កើនការបង្កើតជាតិហ្គាសបានដែរ។ ដូចនេះស្ត្រីពពោះគួរស្លៀកពាក់សម្លៀកបំពាក់ណាដែលរលុងៗដើម្បីបន្ថយអាការៈជាតិហ្គាសក្នុងពោះ។ ៥. បន្ថយស្ត្រេស ស្ត្រីពពោះមួយចំនួនអាចមានបញ្ហាជាតិហ្គាសក្នុងពោះពេលស្ត្រេស។ ហ្គាសដែលបង្កដោយស្ត្រេសអាចជារោគសញ្ញាមួយនៃជំងឺរលាកពោះវៀន។ រោគសញ្ញាផ្សេងនៃជំងឺនេះមានដូចជាហើមពោះ ឈឺពោះ ទល់លាមក និងរាករូស។ ទោះបីជាគេមិនទាន់ដឹងច្បាស់ពីមូលហេតុបង្កជំងឺនេះ ប៉ុន្តែគេជឿថាស្ត្រេសអាចភ្ញោចរោគសញ្ញាទាំងនេះ។ ស្ត្រីពពោះដែលមានបញ្ហាហ្គាសក្នុងពោះដោយសារស្ត្រេសអាចគ្រប់គ្រងស្ត្រេសបានតាមរយៈការធ្វើសមាធិ និងយ៉ូហ្កា។ ស្ត្រីមានផ្ទៃពោះគួរទៅមន្ទីរពេទ្យប្រសិនជាមានជាតិហា្គសក្នុងពោះហើយមានចេញអាការៈនេះមកជាមួយ៖ ឈឺពោះខ្លាំង និងយូរជាង៣០នាទី ទល់លាមកយូរជាងមួយសប្ដាហ៍ រាករូសច្រើនជាង២ថ្ងៃ លាមកខ្មៅ ឬមានឈាម ចង្អោរ និងក្អួត។