ជំងឺរលាកថ្លើមដែលកើតឡើងញឹកញាប់មានបីប្រភេទគឺ ជំងឺរលាកថ្លើមប្រភេទA, B និងC។ រោគសញ្ញានៃប្រភេទជំងឺនីមួយៗមានលក្ខណៈខុសគ្នា និងមានវិធីព្យាបាលផ្សេងៗពីគ្នា។ ទោះបីជាជំងឺរលាកថ្លើម អាចឆ្លងតាមវិធីផ្សេងៗជាច្រើនក៏ពិតមែន ប៉ុន្តែជំងឺនេះឆ្លងញឹកញាប់បំផុតតាមការរួមភេទ ហើយគ្នាយើងជាច្រើនប្រហែលជាមិនដឹងទេថា ជំងឺរលាកថ្លើមប្រភេទB និងC ជាមូលហេតុចម្បងដែលធ្វើឲ្យគូស្នេហ៍មួយចំនួនគ្មានកូន។
តាមពិតទៅ មានមេរោគជាច្រើនដែលអាចប៉ះពាល់ដល់មេជីវិតឈ្មោល និងបណ្ដាលឲ្យប្រុសៗមិនអាចមានកូនបាន។ យ៉ាងណាមិញ បើយោងតាមការសិក្សាបានបង្ហាញថា ជំងឺរលាកថ្លើមប្រភេទC អាចនាំឲ្យមេជីវិតឈ្មោលមានភាពមិនប្រក្រតីកើនឡើង និងថយចុះនៃចលនារបស់មេជីវិតឈ្មោល។ ស្រដៀងគ្នានេះដែរ ប្រូតេអ៊ីន’S’ នៅក្នុងជំងឺរលាកថ្លើមប្រភេទB ក៏មានឥទ្ធិពលកាត់បន្ថយចលនារបស់មេជីវិតឈ្មោល និងអត្រានៃការបង្កកំណើតក្នុងមេជីវិតឈ្មោល ដល់ទៅជាងពាក់កណ្ដាលផងដែរ។ ហេតុនេះហើយ យើងគួរតែចាក់វ៉ាក់សាំងការពារជំងឺរលាកថ្លើមឲ្យបានគ្រប់ចំនួន ព្រមទាំងជៀសវាងប្រើប្រាស់សម្ភារៈផ្ទាល់ខ្លួនរួមគ្នា និងត្រូវប្រើប្រាស់ស្រោមអនាម័យឲ្យបានខ្ជាប់ខ្ជួន ប្រសិនបើយើងមានដៃគូច្រើន។
