ស្រ្តីឆាប់អស់រដូវ អាចប្រឈមនឹងបញ្ហាសុខភាព ៣ យ៉ាងនេះ

ការឆាប់អស់រដូវ គឺសំដៅ​ដល់​ការអស់រដូវមុនអាយុ ៤០ ឆ្នាំ ព្រោះជាទូទៅស្រ្តីអស់រដូវនៅ​ចន្លោះអាយុ ៤៥ ដល់ ៥៥ ឆ្នាំ។ ហេតុអ្វីបានជាស្រ្តីមួយ​ចំនួនឆាប់អស់រដូវ? ហើយការឆាប់អស់​រដូវ​ធ្វើឱ្យស្រ្តីមានហានិភ័យសុខភាពអ្វីខ្លះ?

ហេតុផលមួយចំនួនធ្វើឱ្យស្រ្តីឆាប់អស់រដូវអាចរួមមាន៖

• ការវះកាត់យកក្រពេញអូវែរចេញ
• ការជក់បារី
• ការវះកាត់យកស្បូនចេញ (កាត់ស្បូន)
• ផលប៉ះពាល់នៃការព្យាបាលដោយប្រើគីមី ឬវិទ្យុសកម្ម
• ការមានប្រវិត្តគ្រួសារឆាប់អស់រដូវ
• ជំងឺហ្សែនដែលបណ្តាលមកពីក្រូម៉ូសូមខុសប្រក្រតី
• ជំងឺប្រព័ន្ធភាពសុំា (ជំងឺរលាកសន្លាក់ឆ្អឹង, រលាកពោះវៀន)
• ជំងឺអេដស៍
• ក្រពេញអូវែរមិនបញ្ចេញមេជីវិតញី

នៅពេលស្រ្តីឆាប់អស់រដូវ ក្រពេញអូវែរក៏ឈប់ដំណើរការមុនពេលដែរ​ ដែល​ធ្វើឱ្យលែងមានការ​បញ្ចេញ​មេជីវិតញី ហើយឈប់ផលិត​អ័រម៉ូន​អ៊ឹស្ត្រូសែន និងប្រូសេស្តេរ៉ូន។ ជាលទ្ធផល​ស្រ្តីនឹង​មាន​ហានិភ័យសុខភាពខ្ពស់ជាងស្រ្តីដែលអស់រដូវធម្មតា​។

១. ជំងឺ​សរសៃឈាម​បេះដូង

ការឆាប់អស់រដូវធ្វើឱ្យកម្រិតអ័រម៉ូនអ៊ឹស្ត្រូសែនឆាប់ថយចុះដែលបណ្តាល​ឱ្យស្ត្រីមានហានិភ័យខ្ពស់ក្នុងការកើតជំងឺបេះដូងព្រោះអ័រម៉ូនអ៊ឹស្ត្រូសែនអាចជួយការពារសរសៃឈាមពីការស្ទះ និងឡើងរឹង ហើយអាចកាត់បន្ថយបញ្ហាបេះដូងជាច្រើនដោយសារអ័រម៉ូនអ៊ឹស្ត្រូសែនអាចបង្កើនកម្រិត​កូលេស្តេរ៉ូលល្អ (HDL) នៅក្នុងឈាម។

២. ពុកឆ្អឹង

អ័រម៉ូនអ៊ឹស្ត្រូសែនជួយឱ្យរាងកាយស្រ្តីស្រូបយកជាតិកាល់ស្យូមបានល្អ។ នៅ​ពេលដែល​កម្រិត​អ័រម៉ូន​អ៊ឹស្ត្រូសែនក្នុងខ្លួនស្ត្រីចាប់ផ្តើមធ្លាក់ចុះ ស្រ្តីបាត់បង់ជាតិកាល់ស្យូម​ពីរាងកាយកាន់តែលឿន​ដែល​បណ្តាលឱ្យមានជំងឺ​ពុកឆ្អឹងព្រោះបាត់បង់ម៉ាសឆ្អឹង និងធ្វើឱ្យស្រ្តីប្រឈមនឹងការបាក់ឆ្អឹងត្រគាក កដៃ ឬឆ្អឹងខ្នង។

ចង់គណនា BMI ចុចទីនេះ!

ចង់គណនា BMR ចុចទីនេះ!

ចង់គណនារង្វាស់ចង្វាក់បេះដូង ចុចទីនេះ!

ចងពិនិត្យជំងឺសរសៃឈាមបេះដូង ចុចទីនេះ!

៣. ជំងឺផ្លូវចិត្ត

ការឆាប់អស់រដូវធ្វើឱ្យអារម្មណ៍ស្រ្តីឆាប់ប្រែប្រួលដូចជា ឆាប់ខឹង ឆាប់កើតទុក្ខ​ ឆាប់សោកសៅ​ដែល​អាចបណ្តាលឱ្យស្រ្តីងាយមានបញ្ហាថប់បារម្ភ និងបាក់ទឹកចិត្តដោយសារ​ការធ្លាក់ចុះរបស់កម្រិតអ័រម៉ូន​អ៊ឹស្ត្រូសែន​​​​ដែលប៉ះពាល់ដល់រចនាសម្ព័ន្ធ និងមុខងារខួរក្បាល។

លើសពីនេះទៅទៀត ស្រ្តីអាច​កើត​ទុក្ខ​ដោយសារការ “ការលែងអាចមានកូន ការបាត់បង់ភាពជាស្ត្រី” ឬ “ការបាត់បង់ភាពវ័យក្មេង” ដែលកំណត់​ដោយការអស់រដូវ។

ដូច្នេះស្រ្តីឆាប់អស់រដូវគួរយកចិត្តទុកដាក់ថែរក្សាសុខភាពឆ្អឹង បេះដូង និងផ្លូវចិត្តឱ្យបានល្អ។

អត្ថបទគួរអាន៖

• ​ធ្លាក់​ឈាម​ក្រោយ​វ័យ​អស់​រដូវ​ មក​ពី​មូលហេតុ​ទាំង​នេះ​
• ស្រីៗពេលអស់រដូវអាចជួប​បញ្ហាលើការ​ចងចាំ ហេតុអ្វី?
• បន្ថយ​ហានិភ័យ​ជំងឺ​បេះដូង​​ ក្រោយ​អស់​រដូវ​​តាម​តិចនិក​នេះ
• ស្រីៗឈឺចាប់ពេលរួមភេទ​ក្រោយ​អស់​រដូវ​ ​​​​មក​ពី​​មូលហេតុ​អ្វី​?
• ស្រីៗយើងដឹងអត់ វ័យកាន់តែច្រើនវដ្ដរដូវប្រែប្រួលបែបណា?
• ដល់ពេលជិត ឬអស់រដូវ ស្ត្រីនឹងជួបការប្រែប្រួលរាងកាយខ្លាំងប៉ុន្មានកន្លែងនេះ