តើអ្នកបារម្ភពីអ្វី?

close
មិនត្រឹមត្រូវ
ពិបាកយល់
ផ្សេងៗ

ឬ​ចម្លង​តំណភ្ជាប់

វីតាមីន ៥ ប្រភេទជួយឱ្យស្បែកភ្លឺស្រស់ថ្លាចេញពីខាងក្នុង

វីតាមីន ៥ ប្រភេទជួយឱ្យស្បែកភ្លឺស្រស់ថ្លាចេញពីខាងក្នុង

សុខភាពស្បែកមានទំនាក់ទំនងយ៉ាងជិតស្និទ្ធជាមួយរបបអាហារដែលយើងញុំា ព្រោះអាចជួយឱ្យ​ស្បែកយើង​ស្រស់ស្អាតចេញពីខាងក្នុងពេញទាំងរាងកាយ។ ក្នុងនោះមានរបបអាហារ​មួយចំនួន​សម្បូរទៅដោយវីតាមីនដែលជួយឱ្យស្បែកមានសុខភាពល្អ និងស្រស់ស្អាត។ តើវីតាមីន​អ្វី​ខ្លះ​ដែលល្អចំពោះស្បែក ហើយសម្បូរនៅក្នុងអាហារណាខ្លះ?

ពពួកវីតាមីនដែលជួយឱ្យស្បែកយើងស្រស់ស្អាតរួមមាន៖

១. វីតាមីន D

វីតាមីន D មានលក្ខណៈសម្បត្តិប្រឆាំងនឹងមេរោគ និងការរលាកដែលអាចជួយកាត់បន្ថយ​ស្បែក​ពី​ការរលាក ឡើង​ក្រហម និងកើតមុន។ មួយវិញទៀត វីតាមីន D ក៏ជួយការពារស្បែកពីភាពចាស់​ដែរ។ តាមការសិក្សាបានឱ្យដឹងថា អ្នកមានកម្រិតវីតាមីន D ខ្ពស់នៅក្នុងខ្លួន ក្មេងជាងអ្នក​​មានកម្រិតវីតាមីន D ទាបក្នុងខ្លួនដល់​ទៅប្រាំឆ្នាំ។ អាហារ​សម្បូរ​វីតាមីន D រួមមាន​ត្រី​សាល់ម៉ុន ធូណា ផ្សិត ស៊ុត។ល។

២. វីតាមីន C

វីតាមីន C ជួយឱ្យស្បែកយើងភ្លឺថ្លា កាត់បន្ថយស្នាមអុជខ្មៅ ការឡើងក្រហម​របស់ស្បែក​ដោយ​សារ​ការរលាក និងការខ្មៅរង្វង់ក្រោមភ្នែកជាដើម។ លើសពីនេះទៅទៀត វីតាមីន C ក៏ជំរុញការ​ផលិត​ខូឡាជែន​ដែលជួយស្បែកប្រឆាំង​នឹងភាពចាស់ កាត់បន្ថយភាពយារធ្លាក់ និងស្នាមជ្រីវជ្រួញ។ វីតាមីន C សម្បូរនៅក្នុងអាហារដូចជា ផ្លែឈើអម្បូរក្រូច គីវី ស្ត្របឺរី ម្ទេស ម្ទេសហាវៃ ប៉េងប៉ោះ ស្ពៃពួយឡេង ប្រូខូលី។ល។

៣. វីតាមីន A

វីតាមីន A ជួយ​ដល់​ការ​ផលិត​កោសិកា​ស្បែក​ថ្មីដែលជួយឱ្យស្បែកស្រស់ថ្លា និងមានផ្ទុកសារធាតុ Retinoids ដែលជាសមាសធាតុប្រឆាំងនឹងការខូចស្បែកដោយសារត្រូវពន្លឺព្រះអាទិត្យដូចជា ការ​ឡើងស្នាមអុជ អាចម៍រុយ ឬជាំជាដើម ជួយឱ្យមុខរបួសឆាប់ជា និងជំរុញការផលិតខូឡាជែន។ ជាងនេះទៅទៀត វីតាមីន A ក៏ជួយកម្ចាត់មុនផងដែរដោយជួយកាត់បន្ថយការផលិតជាតិខ្លាញ់​របស់ស្បែក​ និងជួយការពាររន្ធញើសពីការស្ទះ។ យើង​អាចទទួលបានវីតាមីន A ពីអាហារដូចជា ការ៉ុត ដំឡូងជ្វា ម្ទេសហាវៃក្រហម ស៊ុត។ល។

ដំឡូងជ្វា

ចង់គណនា BMR ចុចទីនេះ!
ចង់គណនា BMI ចុចទីនេះ!
ចង់គណនារង្វាស់ចង្វាក់បេះដូង ចុចទីនេះ!
ចង់ពិនិត្យសុខភាពប្រព័ន្ធរំលាយអាហារ ចុចទីនេះ!

៤. វីតាមីន E

វីតាមីន E គឺជាសារធាតុប្រឆាំងអុកស៊ីតកម្ម និងអាចប្រឆាំងការរលាក ហើយជួយឱ្យ​ចរន្ត​ឈាម​រត់​បានល្អដែល​ជួយឱ្យស្បែកយើងរឹងមាំ និងមានសុខភាពល្អ​ ដោយជំរុញការផ្លាស់ប្តូរ​កោសិកា​ស្បែក​ថ្មី ការពារស្បែកពីពន្លឺព្រះអាទិត្យ និងជួយរក្សារសំណើមឱ្យស្បែក។ អាហារផ្ទុកវីតាមីន E មានដូចជា គ្រាប់ផ្កាឈូករ័ត្ន រីករាយ អាល់ម៉ុន សណ្តែកដី ប្រេងសណ្តែក ផ្លែបឺរ និងស្វាយជាដើម។

health-tool-icon

គណនា BMI

ប្រើ​រង្វាស់សុខភាព​BMI ដើម្បី​គណនា​រាងកាយ ទម្ងន់ និង​កម្ពស់​សមសួន និង​សុខភាព​ល្អ

ប្រុស

ស្រី

៥. វីតាមីន B

វីតាមីន B ជួយបំប្លែងអាហារទៅជាថាមពលដែលជំនួយដល់សុខភាពប្រព័ន្ធសរសៃប្រសាទ ការ​រំលាយ​អាហារ សរីរាង្គ សាច់ដុំ ស្បែក និងសក់របស់យើង។ កោសិកាក្នុងរាងកាយ​ត្រូវការ​វីតាមីន B ដើម្បីលូតលាស់ ហើយកោសិកាស្បែករប​ស់យើងលូតលាស់មិនឈប់ ដូច្នេះវីតាមីន B ជួយឱ្យកោសិកាស្បែកលូតលាស់បានលឿន។ លើសពីនេះទៅទៀត វីតាមីន B ក៏​ជួយ​រក្សាសំណើមឱ្យស្បែកដែរ។ នៅពេលរាងកាយយើងខ្វះវីតាមីន B ស្បែកយើងអាចឡើងកន្ទួល ស្ងួត ឬប្រេះបបូរមាត់ ឬមានបញ្ហាស្បែកផ្សេងៗទៀត។ វីតាមីន B សម្បូរក្នុងអាហារដូចជា ផ្លែបឺរ ចេក សណ្តែក សណ្តែកដី ផ្សិត សាច់មាន់ ស៊ុត។ល។

អាហារសម្បូរវីតាមីនមិនត្រឹមតែល្អចំពោះសុខភាពស្បែកទេ ថែមទាំងល្អចំពោះសុខភាពទូទៅរបស់យើងទៀត។

អត្ថបទគួរអាន៖

ចំណុចសំខាន់

ពពួកវីតាមីនដែលជួយឱ្យស្បែកយើងស្រស់ស្អាតរួមមាន៖
  • វីតាមីន D៖ ជួយកាត់បន្ថយស្បែកពីការរលាក ឡើងមុន និងប្រឆាំងភាពចាស់
  • វីតាមីន C៖ ជួយឱ្យស្បែកយើងស្រស់ថ្លា កាត់បន្ថយ​ស្នាមអុជ និងស្នាមជ្រីវជ្រួញ
  • វីតាមីន A៖ ការពារការកើតមុន និងការខូចស្បែក​ដោយពន្លឺព្រះអាទិត្យ
  • វីតាមីន E៖ ជួយឱ្យស្បែកមានសំណើម និងមានសុខភាពល្អ
  • វីតាមីន B៖ ជំរុញដល់ការលូតលាស់កោសិកាស្បែកថ្មី និងជួយរក្សាសំណើមឱ្យស្បែក

Hello Health Group និង “Hello គ្រូពេទ្យ” មិន​ចេញ​វេជ្ជបញ្ជា មិន​ធ្វើ​រោគវិនិច្ឆ័យ ឬ​ព្យាបាល​ជូន​ទេ៕

ប្រភព

5 Vitamins to Add to Your Diet for Healthy, Glowing Skin
https://scitechdaily.com/5-vitamins-to-add-to-your-diet-for-healthy-glowing-skin/

B Vitamins: Your Secret to Good Skin Health
https://www.tricitymed.org/2018/08/b-vitamins-secret-good-skin-health/

5 Vitamins For Glowing Skin, Why You Need Them + Food Sources
https://www.stylecraze.com/articles/vitamins-to-make-your-skin-glow/

5 Essential Vitamins For Healthy And Glowing Skin
https://biomedj.org/skin-care/5-essential-vitamins-healthy-glowing-skin/

រូបថត​របស់​អ្នក​និពន្ធbadge
ដោយ សុខ វណ្ណ កែសម្រួល​ចុងក្រោយ 2 សប្ដាហ៍​កន្លងទៅ
ត្រួតពិនិត្យដោយ វេជ្ជ. ចាន់ ស៊ីណេត