ការចិញ្ចឹមកូនមិនមែនជារឿងងាយស្រួលទេ ហើយក៏មិនមានសាលាណាដែលអះអាងថាអាចបង្រៀនអំពីវិធីចិញ្ចឹមកូនឲ្យបានល្អគ្មានទាស់នោះដែរ។ ប៉ុន្តែមានវិធីមួយចំនួនអាចជួយដល់ការលូតលាស់ខួរក្បាលរបស់កូនដោយប្រើប្រាស់សកម្មភាពប្រចាំថ្ងៃដើម្បីបង្កើតជាឱកាសដល់កូន។
១. និយាយភាសាកូនក្មេងជាមួយកូន
សំឡេង និងកាយវិការដែលក្មេងបង្កើតឡើងអាចនឹងមិនមានអ្វីពិសេស ប៉ុន្តែនេះជាវិធីប្រាស្រ័យទាក់ទងដែលពួកគេអាចធ្វើបាន។ អំឡុងពេលលូតលាស់ដំបូងរបស់ក្មេង អ្នកវិទ្យាសាស្ត្របាននិយាយថាម៉ាក់ប៉ាគួរនិយាយភាសាកូនក្មេងជាមួយកូន និងធ្វើដូចសន្ទនាធម្មតា។ ម៉្យាងទៀត ម៉ាក់ប៉ាគួរឆ្លើយតបទៅនឹងសំឡេង និងសកម្មភាពផ្សេងៗរបស់កូន។ ការនិយាយជាមួយកូនអាចកំណត់ចំនួនពាក្យដែលកូនដឹងពេលពួកគេអាយុ២ឆ្នាំ និងកម្រិតនៃការអាននៅពេលក្រោយដែរ។ ដូចនេះម៉ាក់ប៉ាមិនគួរមើលរំលងពេលកូននិយាយកកែកករទេ។
២. អានឲ្យកូនស្តាប់
ទារកអាចនឹងមិនទាន់ចេះនិយាយ ឬអានទេ ប៉ុន្តែពួកគេនៅតែអាចរៀនពីអ្វីជាច្រើនបាន។ ទោះបីនៅអាយុ៣ខែ ពួកគេក៏អាចបែងចែកនូវសំឡេងនៃភាសាផ្សេងៗបាន។ រាល់ពេលដែលម៉ាក់ប៉ាអានឲ្យកូនស្តាប់ គឺដូចជាម៉ាក់ប៉ាបង្រៀនភាសាដល់កូន។ ក្រៅពីអាន ម៉ាក់ប៉ាគួរបង្ហាញរូបភាពក្នុងសៀវភៅ និងសួរសំណួរធម្មតាអំពីសាច់រឿង និងតួអង្គបាន។ ការអានឲ្យកូនស្តាប់មិនត្រឹមតែបង្រៀនពាក្យថ្មីៗដល់កូនទេ នៅអាចជំរុញឲ្យកូនស្រលាញ់ការអានទៀតផង។
៣. ប្រើប្រាស់សកម្មភាពប្រចាំថ្ងៃបង្រៀនកូន
សម្រាប់ក្មេង មិនថាពេលងូតទឹក ពេលបោកគក់ ឬពេលចម្អិនអាហារទេ សុទ្ធតែជាឱកាសក្នុងការរៀន។ ម៉ាក់ប៉ាអាចរៀបចំពីអ្វីដែលកំពុងធ្វើដើម្បីជំរុញការរៀនភាសារបស់កូន។ ការរាប់ និងបែងចែកសម្លៀកបំពាក់អាចបង្រៀនលេខដល់កូន រីឯការធ្វើទឹកមុខផ្សេងៗគឺជាវិធីល្អមួយក្នុងការបង្រៀនភាពឆ្លាតវៃផ្នែកផ្លូវអារម្មណ៍ (EQ) ដល់កូន។
៤. ការលេង
នៅពេលក្មេងលេង ពួកគេបង្កើតជំនាញជីវិតសំខាន់ផ្សេងៗ។ ការលេងជាមួយនឹងក្មេងដទៃ ពួកគេរៀនពីការបត់បែន និងការចែករំលែក។ ចំណែកឯការលេងបែបស្រមើស្រមៃអាចជំរុញដល់គំនិតច្នៃប្រឌិត និងភាសាដោយក្មេងៗរៀនបង្ហាញគំនិតរបស់ពួកគេតាមពាក្យសម្ដី។ ម៉្យាងទៀត នៅពេលក្មេងៗស្រមើស្រមៃពីអ្វីថ្មី ពួកគេរៀនអំពីការដោះស្រាយបញ្ហា និងបង្កើតជម្រើសថ្មីៗ។ ដូចនេះការលេងគឺជាឱកាសរៀនដ៏ល្អសម្រាប់កូន ហើយម៉ាក់ប៉ាគួរចៀសវាងប្រើប្រាស់គ្រឿងអេឡិចត្រូនិកច្រើននៅមុខកូនព្រោះអាចធ្វើឲ្យក្មេងមានអារម្មណ៍ថាពួកគេមិនសំខាន់។
៥. ធ្វើជាគំរូដល់កូន
ម៉ាក់ប៉ាដឹងហើយថាក្មេងងាយនឹងចាប់បានអ្វីថ្មីៗនៅពេលពួកគេឃើញ។ មុននឹងក្មេងចេះនិយាយ ពួកគេអាចដឹងពីអារម្មណ៍តាមរយៈទឹកមុខ និងកាយវិការផ្សេងៗ ហើយពួកគេនឹងរៀនធ្វើតាម។ តាមការមើលកាយវិការរបស់ម៉ាក់ប៉ាមិនថាការប្រាស្រ័យទាក់ទង ឬការដោះស្រាយបញ្ហាអ្វីមួយ ក្មេងនឹងរៀនពីអាកប្បកិរិយា និងសកម្មភាពទាំងនោះដោយខ្លួនឯង។ ដូចនេះសកម្មភាពដែលម៉ាក់ប៉ាធ្វើនៅមុខកូនអាចកំណត់ថាពួកគេធំឡើងនឹងក្លាយជាមនុស្សប្រភេទណា។
ម៉ាក់ប៉ាអាចរួមបញ្ចូលវិធីទាំង៥នេះដើម្បីជួយបង្កើតឱកាសជោគជ័យដល់កូននៅពេលអនាគត។ ការជួយឲ្យកូនជោគជ័យគឺមិនទាក់ទងនឹងប្រាក់ ឬធនធានដែលមានតម្លៃថ្លៃៗទេ ប៉ុន្តែគឺទាក់ទងនឹងពេលវេលា និងកម្រិតនៃការចូលរួមរបស់ម៉ាក់ប៉ា។
[embed-health-tool-vaccination-tool]
