រដូវភ្លៀង កុមារតូចៗងាយប្រឈមនឹងជំងឺផ្សេងៗណាស់ អ៊ឹចឹងហើយ ប៉ាម៉ាក់គួរអនុវត្តន៍គន្លឹះបែបណាខ្លះ ដើម្បីជួយកូនឲ្យជៀសផុតពីបញ្ហាមួយនេះ?
ពិតណាស់ នៅរដូវភ្លៀង ជាមួយនឹងសំណើមខ្ពស់ អាចបណ្តាលឲ្យក្មេងៗដែលមិនទាន់មានប្រព័ន្ធភាពស៊ាំរឹងមាំនៅឡើយ ងាយនឹងឆ្លងជំងឺផ្សេងៗតាមរដូវកាល ដូចនេះ យកល្អ ប៉ាម៉ាក់ត្រូវត្រៀមវិធានការការពារទុកជាមុនដូចខាងក្រោម៖
១. រក្សាអនាម័យ
ការរក្សាអនាម័យឲ្យបានខ្ជាប់ខ្ជួន អាចបញ្ចៀសការរីករាលដាលនៃជំងឺឆ្លងបាន។ ហេតុនេះហើយ ប៉ាម៉ាក់គួរបង្រៀនកូនឲ្យយល់ដឹងពីសារៈសំខាន់នៃការលាងសម្អាតដៃឲ្យបានត្រឹមត្រូវ ជាពិសេស មុនពេលញ៉ាំអាហារ និងក្រោយពីការបន្ទោរបង់រួច។ ការលាងសម្អាតដៃទៀតសោត គួរឲ្យកូនលាងជាមួយនឹងសាប៊ូ និងទឹកយ៉ាងហោចណាស់២០វិនាទី។
២. ពង្រឹងប្រព័ន្ធភាពស៊ាំជាមួយនឹងរបបអាហារ
របបអាហារតុល្យភាព ត្រូវរួមបញ្ចូលនូវវីតាមីន និងសារធាតុរ៉ែ ដើម្បីជួយពង្រឹងប្រព័ន្ធភាពស៊ាំ។ ប៉ាម៉ាក់គប្បីឲ្យកូនញ៉ាំបន្លែ ផ្លែឈើ និងប្រូតេអ៊ីនគ្មានខ្លាញ់។ អាហារដែលសម្បូរទៅដោយវីតាមីនC ដូចជាផ្លែក្រូច ស្រ្តប៊ឺរី និងម្ទេសប្លោក ក៏អាចជួយការពារកូនប៉ាម៉ាក់ពីជំងឺផ្សេងៗបានផងដែរ។ មួយវិញទៀត គួរកាត់បន្ថយការញ៉ាំអាហារដែលមានជាតិស្ករខ្ពស់ និងអាហារកែច្នៃ។
៣. កុំភ្លេចបន្ថែមជាតិទឹក
ម្យ៉ាងវិញទៀត ប៉ាម៉ាក់ចាំបាច់ណែនាំឲ្យកូនញ៉ាំទឹកឲ្យបានច្រើនក្នុងអំឡុងរដូវភ្លៀង នៅពេលដែលកម្រិតសំណើមឡើងខ្ពស់ ដើម្បីបញ្ចៀសបញ្ហាកង្វះជាតិទឹក។ យើងក៏អាចបន្ថែមជាប្រភេទផ្លែឈើដែលសម្បូរជាតិទឹក ដូចជាផ្លែឪឡឹក និងត្រសក់ជាដើម។
៤. ស្លៀកពាក់ឲ្យកូនឲ្យបានត្រឹមត្រូវ
ជាមួយគ្នានេះ ប៉ាម៉ាក់គួរឲ្យកូនស្លៀកពាក់សំលៀកបំពាក់ណាដែលមានខ្យល់ចេញចូល ហើយងាយស្ងួត ដើម្បីការពារកូនពីការកើតជំងឹផ្តាសាយ ឬបញ្ហាស្បែក។ ក្នុងអំឡុងរដូវភ្លៀង ចាំបាច់ត្រូវឲ្យកូនមានអាវភ្លៀវ និងឆ័ត្រជាប់ខ្លួន។ ប្រសិនបើកូនលេងខាងក្រៅ ប៉ាម៉ាក់ត្រូវណែនាំឲ្យកូនផ្លាស់ប្តូរសំលៀកបំពាក់ភ្លាមៗ ជៀសវាងកូនប្រឈមនឹងអាការៈគ្រុនក្តៅ។
៥. ឲ្យកូនគេងឲ្យគ្រប់គ្រាន់
យើងដឹងហើយថា ការគេងមានសារៈសំខាន់ណាស់ ក្នុងការជួយពង្រឹងប្រព័ន្ធភាពស៊ាំ។ នៅពេលដែលកូនគេងគ្រប់គ្រាន់ជាទៀងទាត់ នោះក្មេងនឹងមានប្រព័ន្ធភាពស៊ាំរឹងមាំ និងមិនងាយឈឺផ្តេសផ្តាសឡើយ។
៦. ចាក់វ៉ាក់សាំងតាមការណែនាំពីក្រសួងសុខាភិបាល
វ៉ាក់សាំងជាវិធីសាស្រ្តដ៏មានប្រសិទ្ធភាពបំផុតមួយ ដើម្បីការពារកូនពីជំងឺឆ្លងផ្សេងៗ ដូច្នេះហើយ ប៉ាម៉ាក់កុំភ្លេចនាំកូនទៅចាក់វ៉ាក់សាំងតាមការណែនាំពីរបស់ក្រសួងសុខាភិបាលកុំបីខាន។
ចំណុចសំខាន់
នៅរដូវភ្លៀង ជាមួយនឹងសំណើមខ្ពស់ អាចបណ្តាលឲ្យក្មេងៗដែលមិនទាន់មានប្រព័ន្ធភាពស៊ាំរឹងមាំនៅឡើយ ងាយនឹងឆ្លងជំងឺផ្សេងៗតាមរដូវកាល ដូចនេះ យកល្អ ប៉ាម៉ាក់ត្រូវត្រៀមវិធានការការពារទុកជាមុនដូចខាងក្រោម៖
១. រក្សាអនាម័យ
២. ពង្រឹងប្រព័ន្ធភាពស៊ាំជាមួយនឹងរបបអាហារ
៣. កុំភ្លេចបន្ថែមជាតិទឹក
៤. ស្លៀកពាក់ឲ្យកូនឲ្យបានត្រឹមត្រូវ
៥. ឲ្យកូនគេងឲ្យគ្រប់គ្រាន់
៦. ចាក់វ៉ាក់សាំងតាមការណែនាំពីក្រសួងសុខាភិបាល
