១. បង្កើតទម្លាប់ហាត់ប្រាណ
ការបង្កើតទម្លាប់ហាត់ប្រាណឲ្យបានជាប្រចាំចន្លោះពី ២០ ទៅ ៣០នាទី ជួយដល់សុខភាពបានច្រើន ក្នុងនោះក៏មានចំណែកជួយដល់មេតាប៉ូលីសផងដែរ។ វិធីហាត់ប្រាណអាចមានដូចជា ការដើរ ជិះកង់ រាំ ហែលទឹក ឬរត់។ យើងអាចអនុវត្ដដោយដើរផង រត់ផង អាចថាដើរ២នាទីបន្ទាប់មករត់១នាទី ធ្វើបែបនេះឲ្យបាន២០នាទី គឺល្អសម្រាប់សុខភាព។
ទន្ទឹមគ្នានោះដែរ វិធីហាត់ប្រាណលើកទម្ងន់ក៏ជួយជំរុញឲ្យរាងកាយត្រូវប្រើប្រាស់ថាមពលខ្លាំង ហើយប្រព័ន្ធរំលាយអាហារក៏ធ្វើការខ្លាំងដូចគ្នា។ ការហាត់ប្រាណប្រភេទនេះ អាចជួយពង្រឹងទៅដល់គ្រប់សរីរាង្គសាច់ដុំទាំងអស់ក្នុងរាងកាយ។ មធ្យមការហាត់ប្រាណបែបនេះ អាចអនុវត្ដចន្លោះពី២ ទៅ ៣ដងក្នុងមួយសប្ដាហ៍គឺសមល្មម។
២. កុំរំលងរបបអាហារពេលព្រឹក
អាហារពេលព្រឹកគឺជាចំណែកមួយយ៉ាងសំខាន់សម្រាប់សុខភាព។ ព្រោះអាហារពេលព្រឹកគឺជាប្រភពថាមពលផ្ដល់ឲ្យរាងកាយយើងអាចដំណើរការ និងពង្រឹងមុខងារប្រព័ន្ធរំលាយអាហារឲ្យរឹងមាំ។ ដូច្នេះរំលងអាហារពេលព្រឹកគឺអាចបំផ្លាញសុខភាពប្រព័ន្ធរំលាយដោយមិនដឹងខ្លួន។
៣. ញ៉ាំអាហារជួយបញ្ចុះជាតិខ្លាញ់
ជ្រើសរើសប្រភេទអាហារដែលអាចជួយបញ្ចុះជាតិខ្លាញ់ ពិសេសពពួកអាហារប្រូតេអ៊ីន អាហារហឹរល្មម និងតែបៃតង ដើម្បីជួយពង្រឹងមេតាប៉ូលីស។ អាហារប្រូតេអ៊ីន ដូចជាពពួកបន្លែ ផ្លែឈើសាច់គ្មានជាតិខ្លាញ់ នឹងអាហារមានជាតិសរសៃ ជួយឲ្យប្រព័ន្ធរំលាយរឹងមាំងដំណើរការបានល្អ។