លំហាត់ប្រាណជំនួយបេះដូងមានរបៀបហាត់ពិសេសខុសពីលំហាត់ប្រាណធម្មតា ហើយតម្រូវឱ្យយើងហាត់ស្រាលៗទេ តែបានប្រយោជន៍ច្រើនដល់សុខភាពបេះដូង។ លំហាត់ប្រាណមានច្រើនប្រភេទ និងមានមុខងារផ្សេងៗគ្នា យើងមិនអាចចេះតែហាត់ៗតាមនឹកឃើញទេ ទាល់តែយើងហាត់ត្រូវតាមក្បួនទើបទទួលផល។
១- លំហាត់ប្រាណជំនួយបេះដូង និងសរសៃឈាម
លំហាត់ប្រាណនេះហៅថា អ៊ែរ៉ូបិក (Aerobics) គឺហាត់ប្រាណស្រាលៗ ដោយលើកដៃលើកជើង ដើម្បីបង្កើនការស្រូបអុកស៊ីហ្សែន ឬពង្រឹងភាពអំណត់រាងកាយ។ Aerobics ធ្វើឲ្យយើងដកដង្ហើមកាន់តែញាប់ បេះដូងលោតកាន់តែលឿន ដោយសារតែយើងប្រើសាច់ដុំច្រើន ទើបបណ្ដាលឲ្យរាងកាយប្រើអុកស៊ីហ្សែនកាន់តែច្រើនដូចគ្នា។
ការហាត់បែបនេះជួយពង្រឹងបេះដូង និងសួតឱ្យកាន់តែមានសុខភាពល្អ ជួយសម្រួលសរសៃឈាម បញ្ចុះសម្ពាធឈាម និងជាតិស្ករ សម្រួលអារម្មណ៍ កាត់បន្ថយការរលាក និងបង្កើនកម្រិតកូលេស្ដេរ៉ុលល្អ។ ចំណុចល្អផ្សេងទៀត គឺជួយកាត់បន្ថយការប្រឈមជំងឺបេះដូង ដាច់សរសៃឈាមខួរក្បាល និងបញ្ហាសុខភាពដទៃទៀតបានច្រើន។
បើសិនយើងធ្លាប់គាំងបេះដូងវិញ Aerobics ក៏អាចជួយបង្ការកុំឲ្យការគាំងបេះដូងកើតឡើងវិញម្ដងទៀតដែរ តែយ៉ាងណាគួរប្រឹក្សាជាមួយគ្រូពេទ្យមុនចាប់ផ្ដើមហាត់។
ក្រៅពីលើកដៃលើកជើង ការហែលទឹក ដើរ រត់ រាំ ធាក់កង់ ឬឡើងចុះជណ្ដើរក៏ជាការហាត់ប្រាណងាយៗសម្រាប់ចាស់ៗដែរ។ ដូច្នេះយើងគួរហាត់ឲ្យបានទៀងទាត់ ឬហោចណាស់ ១៥០ នាទីក្នុងមួយសប្ដាហ៍។
ចង់ពិនិត្យជំងឺសរសៃឈាមបេះដូង ចុចទីនេះ!
ចង់ពិនិត្យសញ្ញាព្រមានសរសៃឈាមខួរក្បាល ចុចទីនេះ!
២- លំហាត់ប្រាណពង្រឹងសាច់ដុំ
យើងហាត់លំហាត់នេះដើម្បីឲ្យសាច់ដុំហាប់ណែនល្អ ជួយបញ្ចុះសម្ពាធឈាម ជាតិស្ករ ធ្វើឲ្យឆ្អឹងរឹងមាំ គ្រប់គ្រងដំណេកបានល្អ រក្សាគីឡូកុំឲ្យឡើងចុះ ព្រមទាំងមានជំហររាងកាយល្អ។ តែបើយើង ឬចាស់ៗមានជំងឺបេះដូង កុំហាត់បែបនេះ ព្រោះអាចបង្កបញ្ហាទៅវិញ។ ចំពោះក្បាច់ហាត់ គ្រូបង្ហាត់ ឬពេទ្យចលនា អាចមានរបៀបបង្ហាត់ ដើម្បីទទួលបានប្រសិទ្ធភាព។ ទោះរវល់យ៉ាងណាក៏ដោយ យើងក៏គួរឆ្លៀតហាត់យ៉ាងហោចណាស់ឲ្យបាន ២-៣ ដងក្នុងមួយសប្ដាហ៍ បើមិនបានរាល់ថ្ងៃ។
[embed-health-tool-heart-rate]
៣- លំហាត់ប្រាណពត់ខ្លួន
ដើម្បីរហ័សរហួន សម្រួលសាច់ដុំ មានចលនាប្រចាំថ្ងៃល្អ យើងគួរហាត់ពត់ខ្លួន។ ការហាត់បែបនេះ អាចល្អសម្រាប់ក្មេងៗ ប៉ុន្តែគួរកម្ដៅសាច់ដុំសិន (ពត់ដៃពត់ជើង) មុនចាប់ផ្ដើមហាត់ ដើម្បីកុំឲ្យរមួលសាច់ដុំ ឬយើងហៅថា រមួលក្រពើ។ ការពត់ខ្លួន យើងអាចបែងចែកផ្នែកដែលយើងចង់ហាត់ ដូចជា សាច់ដុំ កំភួនជើង ភ្លៅ ខ្នង ក ឬស្មាជាដើម។ យ៉ាងហោចណាស់ យើងគួរហាត់ឲ្យបាន ៣ ដងក្នុងមួយសប្ដាហ៍ បើរវល់ហាត់រាល់ថ្ងៃមិនបាន។
៤- លំហាត់ប្រាណរក្សាលំនឹងរាងកាយ
ប្រយោជន៍សំខាន់បំផុតពីលំហាត់ប្រាណមួយនេះ គឺជួយយើងរក្សាលំនឹង ការពារកុំឲ្យឆាប់ដួល ហើយជួយឲ្យរាងកាយមាំទាំ មានសុខភាពល្អ។ ហាត់យ៉ូហ្កា ឬថៃជី (កន្ធែកជើង ឬចលនារាងកាយ ផ្ដោតលើជំហរ) ជាជម្រើសហាត់ប្រាណល្អ ដែលចាស់ៗគួរហាត់។ បើចង់បានយោបល់ ឬការហាត់សមស្ថានភាពរាងកាយ ឬជំងឺ (បើមាន) ជាពិសេស ចាស់ៗមានជំងឺគាំងបេះដូង គួរពិគ្រោះជាមួយពេទ្យ ឬគ្រូបង្ហាត់ជាមុន។
លំហាត់ប្រាណប្រភេទនេះ មិនតម្រូវឲ្យយើងហាត់ទៀងទាត់ទេ ហាត់ពេលណាក៏បាន អាស្រ័យលើពេលវេលាអំណោយផលរបស់យើង តែយើងត្រូវហាត់យ៉ាងហោចឲ្យបាន ៣ ដងក្នុងមួយសប្ដាហ៍។
អត្ថបទគួរអាន៖
- លំហាត់ប្រាណ ៣ ប្រភេទនេះអាចបង្ការជំងឺខ្សោយបេះដូង កុំភ្លេច
- ហាត់ប្រាណមួយថ្ងៃ ១ម៉ោង ជួយកាត់បន្ថយហានិភ័យជំងឺបេះដូង
- ម៉េចបានឮសំឡេងបេះដូងលោតក្នុងត្រចៀក ក្រោយហាត់ប្រាណ?
- ហាត់ប្រាណមានទំនាក់ទំនងបែបណាជាមួយសុខភាពបេះដូង?
- ហាត់ប្រាណយូរម៉ោង និងខ្លាំងៗប៉ះពាល់ដល់បេះដូងឬអត់?
- ហាត់ប្រាណត្រឹមត្រូវ សរសៃឈាមបេះដូងក៏មានសុខភាពល្អដែរ
ចំណុចសំខាន់
- លំហាត់ប្រាណជំនួយបេះដូង និងសរសៃឈាម
- លំហាត់ប្រាណពង្រឹងសាច់ដុំ
- លំហាត់ប្រាណពត់ខ្លួន
- លំហាត់ប្រាណរក្សាលំនឹងរាងកាយ
