ម៉េចបានស្រីៗក្រោយអាយុ៣០ឆ្នាំ ងាយប្រឈមនឹងបញ្ហាតម្រងនោម?

បញ្ហាតម្រងនោម ដែលកើតឡើងចំពោះស្ត្រីក្រោយអាយុ៣០ឆ្នាំ កំពុងតែកើនឡើងគួរឲ្យកត់សម្គាល់។ នៅពេលដែលអាយុកាន់តែច្រើន ហានិភ័យក៏កើនឡើងដូចគ្នា។ យ៉ាងណាមិញ គ្នាយើងអាចចាត់វិធានការមួយចំនួន ដើម្បីកាត់បន្ថយហានិភ័យនៃការវិវត្តទៅរកជំងឺតម្រងនោមបាន។

ជំងឺតម្រងនោមអ្វីខ្លះដែលឧស្សាហ៍កើតចំពោះស្ត្រីក្រោយវ័យ៣០ឆ្នាំ?

១. ក្រួសតម្រងនោម

ស្ត្រីអាចកើតក្រួសតម្រងនោម ដែលមានលក្ខណៈតូច ប៉ុន្តែរឹងនៅក្នុងតម្រងនោម។ កត្តាមួយចំនួន ដូចជាការប្រែប្រួលអ័រម៉ូន ទម្លាប់ញ៉ាំអាហារ និងកត្តាហ្សែន អាចនាំឲ្យមានការកើតឡើងនៃក្រួសតម្រងនោម។ រោគសញ្ញារួមមាន ឈឺចាប់ខ្លាំងនៅខ្នង ឬពោះ នោមឈាម និងនោមញឹកញាប់។ ដូច្នេះហើយ ដើម្បីកាត់បន្ថយហានិភ័យនៃបញ្ហាក្រួសតម្រងនោម ស្រីៗយើងគួរញ៉ាំទឹកឲ្យបានច្រើន ញ៉ាំរបបអាហារល្អៗ និងជៀសវាងអាហារប្រៃខ្លាំង ព្រមទាំងគ្រប់គ្រងបញ្ហាសុខភាពមួយចំនួន ដូចជាជំងឺទឹកនោមផ្អែមឲ្យបានល្អ។

ចង់គណនា BMR ចុចទីនេះ !

ចង់គណនា BMI ចុចទីនេះ !

ចង់គណនារង្វាស់ចង្វាក់បេះដូង ចុចទីនេះ !

ចង់ពិនិត្យសុខភាពប្រព័ន្ធរំលាយអាហារ ចុចទីនេះ !

២. ការបង្ករោគលើផ្លូវទឹកនោម

ទន្ទឹមនឹងនេះដែរ ការបង្ករោគលើផ្លូវទឹកនោមតែងកើតលើស្ត្រីច្រើនជាងបុរស ហើយនឹងអាចប៉ះពាល់ដល់តម្រងនោមប្រសិនបើមិនធ្វើការព្យាបាលឲ្យបានទាន់ពេលវេលា។ ការបង្ករោគលើផ្លូវទឹកនោមកើតឡើងនៅពេលដែលបាក់តេរីជ្រាបចូលទៅក្នុងផ្លូវទឹកនោម និងបង្កមេរោគ។ រោគសញ្ញានៃជំងឺនេះរួមមាន នោមក្រហាយ នោមញឹក ទឹកនោមមានពណ៌ល្អក់ ឬមានឈាម និងឈឺចាប់នៅអាងត្រគាក។ ការព្យាបាលដែលស័ក្តិសមបំផុត គឺប្រើថ្នាំផ្សះដើម្បីបញ្ចៀសការរាលដាលនៃមេរោគទៅកាន់តម្រងនោម។

បញ្ហាតម្រងនោម

៣. ជំងឺគីសតម្រងនោមច្រើន

ជំងឺគីសតម្រងនោមច្រើន ជាជំងឺហ្សែនដែលកំណត់ដោយការរីកលូតលាស់នៃដុំគីសជាច្រើននៅក្នុងតម្រងនោម។ ស្របពេលដែលជំងឺនេះ អាចកើតឡើងទៅលើទាំងបុរស និងស្ត្រី ស្រីៗអាចប្រឈមនឹងផលវិបាកដែលទាក់ទងនឹងបម្រែបម្រួលអ័រម៉ូនអំឡុងពេលពពោះ។ រោគសញ្ញាទូទៅ រួមមាន ការឈឺពោះ សម្ពាធឈាមខ្ពស់ នោមឈាម និងជួបប្រទះការបង្ករោគលើផ្លូវទឹកនោមញឹកញាប់។ អ្នកជំងឺនេះ គួរធ្វើការតាមដាន និងគ្រប់គ្រងជំងឺឲ្យបានល្អ ដើម្បីបញ្ចៀសការខូចតម្រងនោម និងផលវិបាកពាក់ព័ន្ធផ្សេងទៀត។

៤. ជំងឺតម្រងនោមរ៉ាំរ៉ៃ

ចំណែកឯជំងឺតម្រងនោមរ៉ាំរ៉ៃ អាចប៉ះពាល់ដល់សមត្ថភាពរបស់តម្រងនោមដើម្បីដំណើរការប្រក្រតី។ កត្តាផ្សេងៗដែលរួមចំណែកក្នុងការបង្កើនហានិភ័យនៃជំងឺតម្រងនោមរ៉ាំរ៉ៃ រួមមាន ជំងឺទឹកនោមផ្អែម សម្ពាធឈាមខ្ពស់ និងជំងឺប្រព័ន្ធភាពស៊ាំប្រឆាំងនឹងខ្លួនឯង។ មួយវិញទៀត ស្ត្រីក្នុងវ័យ៣០ឆ្នាំ ក៏អាចប្រឈមនឹងបម្រែបម្រួលអ័រម៉ូន និងបញ្ហាសុខភាពជាក់លាក់ផ្សេងទៀត។ ដូចនេះ ការរកឃើញ និងគ្រប់គ្រងជំងឺបានទាន់ពេលវេលា អាចជួយបញ្ចៀសការខូចតម្រងនោមកាន់តែធ្ងន់ធ្ងរ ក៏ដូចជាជួយរក្សាមុខងារតម្រងនោមឲ្យនៅដំណើរការល្អ។

ក្រោយចូលដល់វ័យ៣០ឆ្នាំឡើងទៅ ស្រីៗយើងគប្បីយកចិត្តទុកដាក់ជាមួយនឹងសុខភាពតម្រងនោម ដោយញ៉ាំទឹកឲ្យបានគ្រប់គ្រាន់ ញ៉ាំអាហារល្អៗ ធ្វើលំហាត់ប្រាណជាប្រចាំ គ្រប់គ្រងបញ្ហាសុខភាពផ្សេងទៀត ជៀសវាងជក់បារី និងផឹកគ្រឿងស្រវឹងច្រើនជ្រុល។ បន្ថែមពីនេះ យើងគួរតែពិនិត្យសុខភាពជាទៀងទាត់ ដើម្បីកំណត់ពីបញ្ហាតម្រងនោមឲ្យបានទាន់ពេលវេលា។

អត្ថបទគួរអាន៖

ត្រួតពិនិត្យដោយ

វេជ្ជ. ចាន់ ស៊ីណេត

ឯកទេសសម្ភព និងរោគស្ត្រី · មន្ទីរពេទ្យបង្អែកមិត្តភាពកម្ពុជា-ចិន សែនសុខ

អត្ថបទដោយ នូ សោភ័ណ្ឌ · កែ 26/06/2023

ម៉េចបានស្រីៗក្រោយអាយុ៣០ឆ្នាំ ងាយប្រឈមនឹងបញ្ហាតម្រងនោម?

ជំងឺ​តម្រង​នោម​​អ្វី​ខ្លះ​ដែល​ឧស្សាហ៍​កើត​ចំពោះ​ស្ត្រី​ក្រោយ​វ័យ​៣០​ឆ្នាំ?

១. ក្រួស​តម្រង​នោម​

២. ការ​បង្ក​រោគ​លើ​ផ្លូវ​ទឹក​នោម

៣. ជំងឺ​គីស​តម្រង​នោម​ច្រើន

៤. ជំងឺ​តម្រង​នោម​រ៉ាំរ៉ៃ