ការភ័យពេលប្រឡងតែងតែកើតឡើងមុនពេលប្រឡង ជាពិសេសពេលប្រឡងសំខាន់ៗដូចជា ការប្រឡងឌីប្លូម បាក់ឌុប ចូលមហាវិទ្យាល័យ ឬបញ្ចប់ការសិក្សាជាដើមដែលអាចធ្វើឱ្យយើង បុកពោះ បេះដូងលោតញាប់ បែកញើស និងញ័រដៃជាដើម ហើយអាចបណ្តាលឱ្យយើងភ្លេចអ្វី ដែលបានរៀន មិនអាចផ្តោតអារម្មណ៍ក្នុងការប្រឡង និងធ្វើឱ្យយើងមិនអាចប្រឡងបានល្អ។ យើងគួរធ្វើម៉េចដើម្បីជំនះអារម្មណ៍មួយនេះ?
ខាងក្រោមនេះជាវិធីសាស្រ្តមួយចំនួនដែលអាចជួយយើងកាត់បន្ថយអារម្មណ៍ភ័យពេលប្រឡងបាន៖
១. រំលឹកមេរៀននៅកន្លែងដែលមានបរិយាកាសប្រហាក់ប្រហែលនឹងពេលប្រឡង
រៀបចំបរិយាកាសកន្លែងរំលឹកមេរៀនឱ្យស្រដៀងនឹងបិរយាកាសក្នុងបន្ទប់ប្រឡង ដូចជា រៀបតុ និងកៅអីជាជួរៗដាច់ពីគ្នា និងគ្មានសំឡេងរំខានជាដើម ដើម្បីឱ្យយើងមានអារម្មណ៍ស៊ាំជាមួយបរិស្ថាននៅពេលប្រឡង ដែលអាចជួយយើងផ្តោតអាម្មណ៍ និងចាំមេរៀនដែលយើងបានរំលឹកនៅពេលកំពុងប្រឡង។
២. ហ្វឹកហាត់បន្ធូរអារម្មណ៍
ភាពតានតឹង ឬការភ័យអាចរំខានដល់សមត្ថភាពក្នុងការផ្តោតអារម្មណ៍ ការគិត និងការប្រឡងរបស់យើង។ ការបន្ធូរអារម្មណ៍អាចជួយយើងដោះស្រាយបញ្ហាភ័យពេលប្រឡង និងជួយឱ្យអារម្មណ៍យើងស្ងប់។ បើយើងភ័យពេលប្រឡង យើងអាចបន្ធូរអារម្មណ៍តាមរយៈការដកដង្ហើមវែងៗឱ្យបានបីដង ដោយដកដង្ហើមចូលឱ្យវែងតាមច្រមុះរហូតដល់ខ្យល់ពេញពោះ រួចដកដង្ហើមចេញវិញតាមមាត់យឺតៗឱ្យអស់ខ្យល់ពីពោះ។
៣. គេងឱ្យបានគ្រប់គ្រាន់
ការគេងគ្រប់គ្រាន់មិនត្រឹមតែជួយឱ្យយើងយើងមានសុខភាពល្អទេ ថែមទាំងជួយឱ្យយើងមានអារម្មណ៍ល្អ ស្ងប់អារម្មណ៍ និងផ្តោតអារម្មណ៍បានល្អទៀត។ លើសពីនេះទៅទៀត ការគេងប្រាំពីរទៅប្រាំបួនម៉ោងក្នុងមួយយប់នឹងជួយយើងចាំមេរៀនដែលបានរំលឹកបានល្អ ព្រោះខួរក្បាលមាននាទីផ្ទុកព័ត៌មាន។
៤. ចៀសវាងញុំាជាតិកាហ្វេអ៊ីនច្រើន
ការញុំាជាតិកាហ្វេអ៊ីនដែលមានក្នុងកាហ្វេ ភេជ្ជៈប៉ូវកម្លាំង សុកូឡា និងតែជាដើមក្នុងកម្រិតមធ្យមអាចជួយបង្កើនការផ្តោតអារម្មណ៍ និងជួយឱ្យយើងមានថាមពល។ ផ្ទុយមកវិញការញុំាជាតិកាហ្វេអ៊ីនច្រើនជ្រុលនឹងបណ្តាលឱ្យយើងជួបបញ្ហាដូចជា ឈឺក្បាល គេងមិនលក់ ភ័យ ញ័រខ្លួន បេះដូងលោតញាប់ ឆាប់ខឹងជាដើមទៅវិញ។
ចង់គណនារង្វាស់ចង្វាក់បេះដូង ចុចទីនេះ!
ចង់ពិនិត្យជំងឺសរសៃឈាមបេះដូង ចុចទីនេះ!
៥. ញុំាឱ្យបានគ្រប់គ្រាន់
ខួរក្បាលរបស់យើងត្រូវការអាហារ និងទឹកដើម្បីដំណើរការ។ ដូច្នេះ យើងត្រូវញ៉ាំអាហារល្អចំពោះសុខភាព និងញុំាទឹកឱ្យបានគ្រប់គ្រាន់ ព្រមទាំងចៀសវាងភេសជ្ជៈមានជាតិស្ករច្រើនដូចជា ទឹកក្រូច ឬទឹកផ្លែឈើកំប៉ុងជាដើមដែលអាចបណ្តាលឱ្យជាតិស្ករក្នុងឈាមឡើង និងធ្លាក់ចុះខ្លាំង ព្រមទាំងអាចបង្កការរលាកក្នុងរាងកាយ។ ការញុំាគ្រប់គ្រាន់ក៏ជួយឱ្យយើងមានកម្លាំងក្នុងការប្រឡងដែរ។
៦. ហាត់ប្រាណឱ្យបានទៀងទាត់
ការហាត់ប្រាណដូចជា ដើរ រត់ត្រឹកៗ ឬហាត់យូហ្កាជាដើមមិនត្រឹមតែជួយពង្រឹងសុខភាពរាងកាយទេ ថែមទាំងជួយពង្រឹងសុខភាពផ្លូវចិតទៀត ព្រោះអាចជួយកាត់បន្ថយភាពតាន់តឹង ជួយឱ្យយើងមានអារម្មណ៍ល្អស្រស់ស្រាយ មានការចងចាំ និងផ្តោតអារម្មណ៍បានល្អប្រសើរជាងមុន។
[embed-health-tool-pregnancy-weight-gain]
៧. ស្រមៃពីភាពជោគជ័យក្នុងការប្រឡង
នៅពេលយើងស្រមៃថាឃើញភាពជោគជ័យក្នុងការប្រឡង យើងបង្កើតរូបភាពផ្លូវចិត្តដែលយើងប្រឡងបានល្អ និងប្រឡងជាប់ ឬទទួលបានលទ្ធផលដែលយើងចង់បាន។ ការហាត់សមផ្លូវចិត្តនេះអាចជួយយើងត្រៀមចិត្ត និងកាយសម្រាប់ប្រឡង។ នៅពេលយើងស្រមៃថាខ្លួនចេះឆ្លើយសំណួរ និងធ្វើលំហាត់នានា យើងចាប់ផ្តើមជឿជាក់លើសមត្ថភាពរបស់យើង និងបន្តផ្តោតលើគោលដៅជោគជ័យរបស់យើង ដែលអាចជួយយើងចៀសផុតពីការរំខាននានាដូចជា ការភ័យ ឬភាពតានតឹងពេលប្រឡង។
អត្ថបទគួរអាន៖
- តិចនិកខ្លះៗជួយយកឈ្នះភាពភ័យខ្លាចមួយចំនួន ធ្លាប់ជួបកន្លងមក
- ក្លិនពីរុក្ខជាតិទាំង ៤ នេះអាចកាត់បន្ថយភាពតានតឹងបាន
- គុណសម្បត្តិសុខភាពធំៗទាំង ៥ ពីការមុជទឹកសមុទ្រ គ្នាយើងភាគច្រើនអត់ដឹង !
- ស្តាប់តន្រ្តី ផ្ដល់គុណប្រយោជន៍ច្រើនយ៉ាងដល់សុខភាពផ្លូវចិត្ត
- ដឹងតិចនិកនេះ អាចជួយទប់កំហឹងមិនឲ្យចេះតែបញ្ចេញដាក់អ្នកផ្សេងងាយៗ
- ឲ្យតែស្ត្រេស ស្មុគស្មាញច្រើន សញ្ញាគួរឲ្យព្រួយបារម្ភទាំងនេះអាចកើតឡើង
ចំណុចសំខាន់
- រំលឹកមេរៀននៅកន្លែងដែលមានបរិយាកាសប្រហាក់ប្រហែលនឹងពេលប្រឡង
- ហ្វឹកហាត់បន្ធូរអារម្មណ៍
- គេងឱ្យបានគ្រប់គ្រាន់
- ចៀសវាងញុំាជាតិកាហ្វេអ៊ីនច្រើន
- ញុំាឱ្យបានគ្រប់គ្រាន់
- ហាត់ប្រាណឱ្យបានទៀងទាត់
- ស្រមៃពីភាពជោគជ័យក្នុងការប្រឡង
